កីឡា

ជើងខ្លាំង ៣ រូប ទទួលបានប្រាក់រង្វាន់លើកទឹកចិត្ត ២០ ម៉ឺនដុល្លារ វ៉ៃកាលពីថ្ងៃសុក្រ

បានផុស

៤ years មុន

នៅ

ថ្ងៃចន្ទ ១៤ កុម្ភៈ ២០២២

ដោយ

ស្ថាប័ន ONE Championship កាន់តែធ្វើឲ្យអត្តពលិកមានកម្លាំងចិត្តទ្វេឡើង បន្ទាប់ពីការប្រកួតរបស់ពួកគេល្អឥតខ្ចោះ ដើម្បីទទួលបានប្រាក់រង្វាន់លើកទឹកចិត្តយ៉ាងច្រើនសន្ធឹកសន្ធាប់។ ជាក់ស្តែងក្នុងព្រឹត្តិការណ៍ប្រកួត ONE: BAD BLOOD កាលពីថ្ងៃសុក្រ ទី ១១ ខែកុម្ភៈ យប់មិញកន្លងទៅនេះ មានកីឡាករ ៣ នាក់វ៉ៃល្អ និងទទួលបានប្រាក់រង្វាន់លើកទឹកចិត្តសរុបទាំង ៣ នាក់ ចំនួន ២០ ម៉ឺនដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយការប្រកួតចប់ ប្រធាន និងជានាយកប្រតិបត្តិ ONE Championship លោក Chatri Sityodtong បានជ្រើសរើសយកកីឡាករអង់គ្លេស Jonathan Haggerty និងកីឡាករកូរ៉េខាងត្បូង Woo Sung Hoon ដែលម្នាក់ៗទទួលបានប្រាក់រង្វាន់លើកទឹកចិត្ត ៥ ម៉ឺនដុល្លារអាមេរិកដូចគ្នាសម្រាប់ការប្រកួតដ៏ល្អរបស់ពួកគេ។ អ្វីដែលកាន់តែអស្ចារ្យនោះ លោក Sityodtong បានសម្រេចផ្ដល់ប្រាក់រង្វាន់ ១០ ម៉ឺនដុល្លារដល់កីឡាករ Anatoly Malykhin សម្រាប់ការប្រកួតល្អឥតខ្ចោះ និងបានក្លាយជាម្ចាស់ខ្សែក្រវាត់គុនចម្រុះពិភពលោកទម្ងន់ធ្ងន់បណ្តោះអាសន្ន ONE Interim Heavyweight។

ប្រកួតក្នុងតំណែងគូឯកប្រចាំព្រឹត្តិការណ៍ ជើងខ្លាំងទម្ងន់យក្ស Malykh បានផ្ដួល Kirill Grishenko ដោយប្រើក្បាច់ខាវឆ្វេងនៅទឹកទី២ដើម្បីក្លាយជាម្ចាស់ខ្សែក្រវាត់ពិភពលោកថ្មី។ ចំណែក Haggerty ប្រើពេលវេលា៣ទឹកល្អឥតខ្ចោះដើម្បីយកឈ្នះកីឡាករថៃ Mongkolpetch។

កីឡាករអង់គ្លេសដាក់សម្ពាធឥតឈប់ឈរ ប្រើអាវុធកាចសាហាវ ធ្វើការងារខ្លាំង និងស្វែងរកចំណុចផ្ដួលដៃគូឲ្យសន្លប់ទៀតផង ដើម្បីទទួលបានប្រាក់រង្វាន់បន្ថែម ៥ ម៉ឺនដុល្លារ។

ដោយឡែក កីឡាករកូរ៉េ Woo ទើបតែបង្ហាញខ្លួនប្រកួតលើកដំបូងលើសង្វៀន ONE ប៉ុន្តែបានប្រើពេលវេលាត្រឹមតែ១៨វិនាទីប៉ុណ្ណោះដើម្បីផ្តួលកីឡាករថៃបទពិសោធន៍ច្រើន Yodkaikaew ឲ្យសន្លប់តែម្តង ហើយទទួលបានប្រាក់រង្វាន់លើកទឹកចិត្ត ៥ ម៉ឺនដុល្លារ៕