កីឡា

ព្រះខ័នរាជស្វាយរៀង បន្តកំណត់ត្រាមិនដែលចាញ់ក្នុងលីគ ក្រោយឈ្នះភ្នំពេញក្រោន ចុងម៉ោង

បានផុស

១ ខែ មុន

នៅ

ថ្ងៃអង្គារ ៥ កក្កដា ២០២២

ដោយ

ក្លិបបាល់ទាត់ព្រះខ័នរាជស្វាយរៀង បន្តកំណត់ត្រាមិនដែលចាញ់ក្នុងពានរង្វាន់ខេមបូឌានព្រីមៀរលីគ ឆ្នាំ២០២២ ក្រោយយកឈ្នះ ក្លិបភ្នំពេញក្រោន ១-០ ចុងម៉ោង ក្នុងជំនួបសប្ដាហ៍ទី៩ នៃជុំទី២ នាយប់ថ្ងៃទី០៥ ខែកក្កដា ឆ្នាំ២០២២។

មានផ្សាយផ្ទាល់នៅលើហ្វេសបុកផេក ‘កម្ពុជាថ្មី’ ការប្រកួតពិតជាតានតឹងតាំងពីការចាប់ផ្ដើមដំបូង ដោយក្រុមទាំងពីរនាមជាក្រុមខ្លាំងដូចគ្នា ប៉ុន្តែភ្នំពេញក្រោន ហាក់មានឱកាសច្រើនជាងជាមួយការទាត់ចូលទីច្រើនលើកច្រើនសារប៉ុន្តែបានត្រឹមរំលងរបាទី និងសង្គ្រោះដោយអ្នកចាំទី ព្រះខ័នរាជស្វាយរៀង ក៏មានឱកាសផងដែរប៉ុន្តែធ្វើមិនបានសម្រេចដូចគ្នា និងបានរក្សាលទ្ធផល ០-០ ដល់ចប់វគ្គទី១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចូលដល់វគ្គទី២ ព្រះខ័នរាជស្វាយរៀង មានសម្ទុះជាងវគ្គទី១ ប៉ុន្តែបានត្រឹមតែធ្វើឱ្យអ្នកគាំទ្ររំភើបមិនពេញលេញ ហើយការប្រកួតបានអូសបន្លាយដល់នាទី៩០ ទើបគ្រាប់បាល់កើតមានឡើងសម្រាប់ម្ចាស់ផ្ទះព្រះខ័នរាជស្វាយរៀង ធ្វើបានសម្រេចដោយកីឡាកររកគ្រាប់បាល់បានច្រើនជាងគេក្នុងលីគ Marcus Haber ជួយឱ្យក្លិបយកឈ្នះ ភ្នំពេញក្រោន ១-០ ដើម្បីទទួលបាន ៣ពិន្ទុដ៏មានសារៈសំខាន់បំផុត។

លទ្ធផលនេះ ធ្វើឱ្យ ព្រះខ័នរាជស្វាយរៀង បន្តកំណត់ត្រាមិនដែលចាញ់ក្នុងលីគ ៩ប្រកួតជាប់ៗគ្នា ហើយជាពិសេសនៅតែឈរកំពូលតារាងនៃលីគកំពូលកម្ពុជា ឆ្នាំ២០២២ ត្រឹមសប្ដាហ៍ទី៩ ដោយបន្ថែមដល់ ២៥ពិន្ទុ ដាច់ក្រុមលេខ២ បឹងកេត ដល់ទៅ ៩ពិន្ទុ៕

អត្ថបទ ៖ មន្នីរ័ត្ន