កីឡា

U-16 កម្ពុជា រងបរាជ័យប្រកួតដំបូង AFF U-16 Championship

បានផុស

៤ years មុន

នៅ

ថ្ងៃអង្គារ ២ សីហា ២០២២

ដោយ

ក្រុមជម្រើសជាតិអាយុក្រោម ១៦ឆ្នាំកម្ពុជា បានចាញ់ ម៉ាឡេស៊ី ដោយលទ្ធល ៣-០ ក្នុងជំនួបដំបូងពូល C នៃពានរង្វាន់បាល់ទាត់យុវជនអាស៊ានអាយុក្រោម១៦ឆ្នាំ (AFF U-16 Boys’s Championship 2022) នាល្ងាចថ្ងៃទី០២ ខែសីហា ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការប្រកួតនៅប៉ុន្មាននាទីដំបូង ក្រុមទាំងពីរហាក់ស្ទាបស្ទង់គ្នា ប៉ុន្តែ ៦នាទីម៉ាឡេស៊ី ក៏បើកការនាំមុខមុនដោយកីឡាករ Muhammad Arami Zakimi។ បន្ទាប់មកទៀតនាទីដែលសេសសល់ ម៉ាឡេស៊ី ហាក់មានប្រៀបជាងកម្ពុជា ជាមួយឱកាសទាត់ទីកម្ពុជា ប៉ុន្តែធ្វើមិនបានសម្រេច និងបានរក្សាលទ្ធផល ១-០ ដល់ចប់វគ្គទី១។

ចូលដល់វគ្គទី២ ម៉ាឡេស៊ី នៅតែបង្ហាញភាពខ្លាំង ជាមួយនឹងការគ្រប់គ្រងបាល់ និងឱកាសទាត់ទីរហូតដល់អាចរកគ្រាប់ទី២ បានសម្រេចដែលលើកនេះដោយកីឡាករ U-16 កម្ពុជា ធ្វើឱ្យចូលទីខ្លួនឯងដោយអចេតនានៅនាទី៥៩។ បន្ទាប់ពីត្រូវបានម៉ាឡេស៊ី នាំមុខ ២-០ កម្ពុជា ហាក់មានឱកាសគ្រប់គ្រងបាល់ជាងមុន និងឱកាសទាត់ទីគូប្រកួតមួយចំនួនផងដែរ ប៉ុន្តែធ្វើមិនបានសម្រេច។ លុះ ចូលដល់នាទី៧៨ កីឡាករ Faris Danish Asrul បានរកគ្រាប់ទី៣ ឱ្យម៉ាឡេស៊ី និងជាគ្រាប់ចុងក្រោយរក្សាដល់ចប់ការប្រកួត កម្ពុជា បានចាញ់ ម៉ាឡេស៊ី ដោយលទ្ធល ៣-០។

ក្រោយចាញ់ ៣-០ កម្ពុជា ស្ថិតនៅបាតតារាង មាន០ពិន្ទុ ខណៈប្រកួតបន្ទាប់ត្រូវជួបជាមួយក្រុមដែលមានកាយសម្បទាល្អ U-16 អូស្ត្រាលី នៅថ្ងៃទី០៥ ខែសីហា ឆ្នាំ២០២២៕

អត្ថបទ ៖ មន្នីរ័ត្ន