កីឡា

យុវជនឡាវ ២ ឈុត បង្ហាញភាពខ្លាំងក្នុងតំបន់អាស៊ាន និងទ្វីបអាស៊ី ឆ្នាំនេះ គួរឲ្យភ្ញាក់ផ្អើល

បានផុស

៤ years មុន

នៅ

ថ្ងៃចន្ទ ១០ តុលា ២០២២

ដោយ

ក្រុមជម្រើសជាតិឡាវ U-17 និង U-19 នៅក្នុងឆ្នាំ ២០២២ នេះ បង្ហាញភាពភ្ញាក់ផ្អើលដល់បាល់ទាត់តំបន់អាស៊ាន ក៏ដូចជាអាស៊ី យ៉ាងមិនគួរឲ្យជឿ បន្ទាប់ពីធ្វើបានល្អតាមពានរង្វាន់រៀងខ្លួនក្នុងកម្រិតតំបន់ និងទ្វីប។

គួរឲ្យចាប់អារម្មណ៍ដូចនេះ បន្ទាប់ពីក្រុម U-17 ឡាវ ទើបតែជោគជ័យក្នុងការជម្រុះឡើងទៅលេងជុំផ្ដាច់ព្រ័ត្រ ពានរង្វាន់ជើងឯកយុវជនអាស៊ីអាយុក្រោម ១៧ ឆ្នាំ (2023 AFC U-17 Asian Cup) នៅឆ្នាំក្រោយ កាលពីយប់មិញ។

U-17 ឡាវ ដោយស្ថិតនៅពូល I ជាមួយអ៊ីរ៉ង់, កៀហ្សីស៊ីស្ថាន និងហុងកុង នៃវគ្គជម្រុះ។ ប្រកួតដំបូង បានចាញ់អ៊ីរ៉ង់ ៣-០ ដែលពេលនោះគេសឹងតែគិតថា ឡាវ នៅសល់ឱកាសតិចតួច ប៉ុន្តែចាប់ពីប្រកួតទី ២ មក ឡាវ បានយកឈ្នះជាប់ៗគ្នា ពោលគឺឈ្នះ ហុងកុង ដោយមិននឹកស្មានដល់ ៥-០ និងប្រកួតចុងក្រោយឈានទៅយកឈ្នះម្ចាស់ផ្ទះ កៀហ្សីស៊ីស្ថាន ១-២ ទៀត ដែលនាំឲ្យឈរលេខ២ ក្នុងពូល។ លុះក្រោយមកគេក៏បានក្លាយជាក្រុមលេខ ២ ល្អ ដែលឈរនៅលេខរៀងទី ៥ ហើយបានកៅអីឡើងទៅប្រកួតជុំផ្ដាច់ព្រ័ត្រ នៅឆ្នាំក្រោយ (២០២៣)។

លើសពីនេះ នៅមានក្រុមមួយទៀតបង្កការភ្ញាក់ផ្អើលផងដែរក្នុងតំបន់នោះ គឺក្រុម U-19 ឡាវ ដែលបានឡើងទៅដល់វគ្គផ្ដាច់ព្រ័ត្រ ពានជើងឯកយុវជនអាស៊ាន អាយុក្រោម ១៩ ឆ្នាំ (AFF U-19 Championship) ជាពានយុវជនផ្លូវការ ធ្វើនៅប្រទេសឥណ្ឌូណេស៊ី។

ឈុតនេះ ឡាវ បានឡើងទៅវគ្គផ្ដាច់ព្រ័ត្រ ជាមួយនឹងការឈ្នះ ៤ ប្រកួតជាប់ៗគ្នាក្នុងពូល។ ហើយបានឡើងដល់វគ្គពាក់កណ្ដាលផ្ដាច់ព្រ័ត្រ ឡាវ ត្រូវជួប ថៃ ក្នុងខណៈដែល ថៃ ធ្វើបានយ៉ាងល្អនៅក្នុងវគ្គជម្រុះក្នុងពូល។ អ្វីៗប្រែប្រួលទាំងស្រុង នៅពេលដែលមតិ ៨០/២០ បានគិតថា ថៃ នឹងឈ្នះ ហើយឡើងទៅវគ្គផ្ដាច់ព្រ័ត្រ ប៉ុន្តែ ឡាវ ឯណោះទៅវិញទេ ជាអ្នកដណ្ដើមកៅអីបាន ក្រោយយកឈ្នះ ថៃ មិនគួរឲ្យជឿ ២-០ ដូច្នេះ ឡាវ បានឡើងទៅវគ្គផ្ដាច់ព្រ័ត្រ ត្រូវជួបក្រុម U-19 ម៉ាឡេស៊ី ប៉ុន្តែគួរឲ្យសោកស្ដាយ ឡាវ បានត្រឹមរងជើងឯក ក្រោយចាញ់ ម៉ាឡេស៊ី ២-០។

យ៉ាងណាក៏ដោយ វាក៏ជាការបំបែកប្រវត្តិសាស្ត្រសម្រាប់បាល់ទាត់ឡាវ ដែលបានឡើងដល់វគ្គផ្ដាច់ព្រ័ត្រ ក្នុងពានរង្វាន់នេះ។

ដូច្នេះសរុបមក U-17 ឡាវ ឆ្នាំនេះ បានកៅអីឡើងទៅជុំផ្ដាច់ព្រ័ត្រ ពានជើងឯកយុវជនអាស៊ីអាយុក្រោម ១៧ ឆ្នាំ (2023 AFC U-17 Asian Cup) ជាលើកទី ៣។ ពាននេះ មានអាទិភាពសម្រាប់ការឡើងទៅប្រកួតបាល់ទាត់ពិភពលោក អាយុក្រោម ១៧ ឆ្នាំ (2023 FIFA U-17 World Cup) នៅប្រទេសប៉េរូ ផងដែរ។ ខណៈ U-19 ឡាវ បំបែកកំណត់ត្រាឡើងវគ្គផ្ដាច់ព្រ័ត្រពានផ្លូវការប្រចាំតំបន់អាស៊ាន៕

អត្ថបទ ៖ មន្នីរ័ត្ន