ស្តេចអារ៉ាប៊ីសាអូឌីត ប្រកាសឱ្យឈប់សម្រាកជាសាធារណៈ ១ថ្ងៃ បន្ទាប់ពីឈ្នះការប្រកួត World Cup លើអាហ្សង់ទីន

ព្រះមហាក្សត្រនៃប្រទេសអារ៉ាប៊ីសាអូឌីត បានប្រកាសឱ្យឈប់សម្រាកជាសាធារណៈនៅថ្ងៃពុធនេះ បន្ទាប់ពីក្រុមបាល់ទាត់បានទទួលជ័យជម្នះដ៏ធំធេងក្នុងការប្រកួត World Cup លើជម្រើសជាតិអាហ្សង់ទីន ជាមួយលទ្ធផលគួរឱ្យភ្ញាក់ផ្អើល ២-១ ដោយក្រុមអារ៉ាប៊ីសាអូឌីត កាលពីថ្ងៃអង្គារម្សិលមិញ។

Messi បានស៊ុតបញ្ចូលទីគ្រាប់បើកឆាកក្នុងការប្រកួត ហើយអាហ្សង់ទីន មានគ្រាប់បាល់ ៣គ្រាប់មិនត្រូវបានអនុញ្ញាតដោយសារ offside ក្នុងតង់ទីមួយ។ ប៉ុន្តែក្រុមរបស់លោក Lionel Scaloni ស្ថិតនៅចុងបញ្ចប់នៃការវាយបកត្រលប់មកវិញដ៏គួរឲ្យកត់សម្គាល់ដោយអារ៉ាប៊ីសាអូឌីត តាមរយៈការស៊ុតដោយកីឡាករ Saleh Al Shehri និង Salem Al Dawsari។

ក្រោយទទួលជ័យជម្នះនេះ ព្រះមហាក្សត្រអារ៉ាប៊ីសាអូឌីត Salman bin Abdulaziz បានប្រកាសថ្ងៃឈប់សម្រាកជាតិសម្រាប់ថ្ងៃពុធ។ ប្រជាពលរដ្ឋដែលធ្វើការក្នុងវិស័យសាធារណៈ និងឯកជន បន្ថែមពីលើសិស្សនិស្សិត នឹងទទួលបានថ្ងៃឈប់សម្រាកដើម្បីអបអរសាទរភាពជោគជ័យដ៏គួរឱ្យកត់សម្គាល់របស់ក្រុមបាល់ទាត់។

ការទទួលជ័យជម្នះរបស់អារ៉ាប៊ីសាអូឌីត កាន់តែមានភាពរំជើបរំជួល វាបានបញ្ចប់ការមិនស្គាល់ពាក្យថាចាញ់ ៣៦ប្រកួតរបស់អាហ្សង់ទីន។ វាជាដំណើរដ៏វែងបំផុតមួយក្នុងប្រវត្តិសាស្ត្របាល់ទាត់អន្តរជាតិផងដែរ។

នេះគឺជាការឈ្នះក្នុងប្រកួតបើកឆាក លើកដំបូងផងដែរសម្រាប់ អារ៉ាប៊ីសាអូឌីត ក្នុងចំណោមនៃការបង្ហាញខ្លួនចំនួន​៥​លើក នៃព្រឹត្តិការណ៍បាល់ទាត់ធ្វើឡើងរៀងរាល់ ៤ឆ្នាំម្ដងមួយនេះ៕

ប្រភព៖ express.co.uk

អត្ថបទ៖ មន្នីរ័ត្ន