កីឡា

មកដឹងប្រវត្តិដៃគូរបស់ ពេជ្រ សម្បត្តិ ថ្ងៃអាទិត្យនេះ វ៉ៃនៅខ្មែររាប់ភ្លេច

បានផុស

២ ខែ មុន

នៅ

ថ្ងៃសុក្រ ១៣ មករា ២០២៣

ដោយ

ម្ចាស់ខ្សែក្រវាត់ថ្មីថ្មោង២គ្រឿង ពេជ្រ សម្បត្តិ ឡើងសង្វៀនទៀតហើយនាថ្ងៃអាទិត្យ ទី១៥ ខែមករា នេះនៅសង្វៀនខារ៉ាបាវ បាយ័នស្ទឹងមានជ័យចាប់ពីម៉ោង៦ល្ងាចតទៅ។

ដៃគូរបស់ ពេជ្រ សម្បត្តិ លើកនេះគឺកីឡាករថៃ ផេតណាមអេក ស.ស ប្រះកន (Petchnamek Sor.Sor Prakorn) ដែលធ្លាប់ប្រឡូកសង្វៀនគុនខ្មែររាប់ឆ្នាំមកហើយ ហើយក៏ជួបជើងខ្លាំងគុនខ្មែរជាច្រើនរូបដែរ ដូច្នេះរូបគេស្គាល់ច្បាស់ណាស់សង្វៀនគុនខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបង្ហាញជូនខ្លះៗពីប្រវត្តិដែលកីឡាករថៃរូបនេះធ្លាប់ប៉ះអ្នកលេងគុនខ្មែរកន្លងមក។ រូបគេធ្លាប់ផ្តួល ឡុង ឡា ក្នុងទឹកទី៤, ឈ្នះពិន្ទុ អេលីត សាន់, ឈ្នះពិន្ទុ ថា សារ៉ុន និងឈ្នះពិន្ទុ វ៉ែន រាជ។ ជាមួយគ្នានេះ រូបគេធ្លាប់ចាញ់ពិន្ទុ ម៉ឺន មេឃា ក្នុងការប្រកួតវគ្គពាក់កណ្តាលផ្តាច់ព្រ័ត្រដណ្តើមខ្សែក្រវាត់មួយ, ធ្លាប់ចាញ់សន្លប់ក្រោមស្នាដៃរបស់ ឡុង បេនលឿន និង វៀត ប៊ុនឌឿន។

បច្ចុប្បន្ននេះ ផេតណាមអេក មានអាយុប្រហែលជា២៧ឆ្នាំ និងមានកម្ពស់១,៦៥ម៉ែត្រ។ បើនិយាយពីអាវុធនៅលើសង្វៀនវិញ រូបគេពូកែកណ្តាប់ដៃ ទាត់ និងជង្គង់ជាផ្លែគួរឲ្យកត់សំគាល់ ហើយក៏មានកម្លាំងស៊ុហ្វស៊ូទ្រាំល្អដែរ។ ទោះជាយ៉ាងណា ដោយសារឆ្លងកាត់សង្វៀនច្រើនឆ្នាំ និងអាយុកាន់តែច្រើន កម្លាំងស៊ុហ្វរបស់គេបច្ចុប្បន្ននេះនឹងមិនខ្លាំងដូចមុនទេ។

ចំណែក ពេជ្រ សម្បត្តិ ទើបអាយុ២០ឆ្នាំ និងមានកម្ពស់ ១,៦៥ម៉ែត្រ ហើយកំពុងឡើងកូដខ្លាំង។ កីឡាករគុនខ្មែររូបនេះពូកែកណ្តាប់ដៃ និងកែងដែលមានទម្ងន់ធ្ងន់ ហើយកម្លាំងស៊ុហ្វខ្លាំងរឹងមាំ។

គូនេះពូកែប្រើកណ្តាប់ដៃដូចគ្នា ប៉ុន្តែច្បាស់ណាស់ថា ផេតណាមអេក នឹងព្យាយាមដើរថយក្រោយ ការពារ និងវាយបក។ បើពុំនោះទេរូបគេចាប់អោបដើម្បីឡើងជង្គង់ ពីព្រោះរូបគេវ៉ៃដោយប្រើបច្ចេកទេសច្រើនជាងកម្លាំងបាយ។ ស្របពេល ពេជ្រ សម្បត្តិ នឹងដើរចេញវ៉ៃកណ្តាប់ដៃផ្ទួន ហើយទំនងជាមានការដាក់សម្ពាធខ្លាំងដោយសារខ្លួនមានកម្លាំងស៊ុហ្វល្អជាង។

ជារួម ការប្រកួតរបស់ ពេជ្រ សម្បត្តិ ជាមួយ ផេតណាមអេក នឹងមិនចប់៥ទឹកទេ។ អ្នកលេងគុនខ្មែរមានភាគរយខ្ពស់ក្នុងការទទួលបានជ័យជម្នះសម្រាប់ការប្រកួតនេះ៕

អត្ថបទ៖ វីរបុត្រ