ការប្រកួតប្រជែងដ៏ស្អិតស្វាញ ក្នុងវិញ្ញាសារត់ម៉ាតុនផ្នែកបុរស ចំងាយ ៤២គីឡូម៉ែត្រ ១៩៥ម៉ែត្រ ក្នុងខេត្តសៀមរាប មេដាយមាស បានទៅលើកីឡាករ Agus Prayogo មកពីប្រទេស ឥណ្ឌូនេស៊ី, មេដាយប្រាក់ បានទៅលើកីឡាករ Arlan Estobo Arois មកពីប្រទេស ហ្វីលីពីន និងមេដាយសំរិទ្ធ បានទៅលើកីឡាករ Ngyen Thanh Hoang មកពីប្រទេសវៀតណាម។ ដោយឡែក វិញ្ញាសាផ្នែកនារី មេដាយមាស បានទៅលើ កីឡាការិនី Odekta Elvina មកពីប្រទេសឥណ្ឌនេស៊ី, មេដាយប្រាក់ កីឡាការិនី Thi Tuyet le មកពីប្រទេសវៀតណាម និង មេដាយសំរឹទ្ធ បានទៅលើ កីឡាការិនី Christine Organiza Hallasgo មកពីប្រទេសហ្វីលីពីន។

កីឡាករ Agus Prayogo ដែលជាអ្នកទទួលបានមេដាយមាស មកពីប្រទេសឥណ្ឌូនេស៊ី បានបង្ហាញពីចំណាប់អារម្មណ៍ចំពោះភាពជោគជួយរបស់ខ្លួន រួមទាំងបង្ហាញនូវការពេញចិត្តពីការរៀបចំការប្រកួតនេះ។ កីឡាការិនី Odekta Elvina ក៏ជាអ្នកទទួលបានមេដាយមាស មកពីប្រទេសឥណ្ឌនេស៊ី បានបង្ហាញនូវអារម្មណ៍រំភើប រីករាយជាខ្លាំងដែលទទួលបានជ័យលាភីនេះ។ កីឡាការិនីរូបនេះបានបន្ថែមថា ចំពោះការរៀបចំជាម្ចាស់ផ្ទះរបស់កម្ពុជា ជាពិសេសការប្រកួត មានដំណើរការល្អប្រសើរ ទោះបីអាកាសធាតុមានស្ថានភាពក្ដៅក៏ដោយ។

គួរបញ្ជាក់ថា វិញ្ញាសាអត្តពលកម្មក្នុងខេត្តសៀមរាប មានរយៈពេលមួយថ្ងៃ គឺនៅថ្ងៃទី៦ ខែ ឧសភា ឆ្នាំ២០២៣ ដែលមានវិញ្ញាសារត់ម៉ារ៉ាតុន និងដើរប្រណាំង នៅបរិវេណខាងមុខប្រាសាទអង្គរវត្ត ដោយមានអត្តពលិកចូលរួមចំនួន ២២រូប មកពី ៩ប្រទេស ក្នុងនោះផ្នែកបុរស ១១រូប ផ្នែកនារី ១១រូប ខណៈប្រទេសឡាវ និង ប្រទេសព្រុយណេ អវត្តមានមិនបានចូលរួម។

ក្នុងព្រឹត្តិការណ៍ប្រកួតកីឡាស៊ីហ្គេមលើកទី៣២ វិញ្ញាសារត់ម៉ារ៉ាតុន បុរស-នារី និង ការជិះកង់ភ្នំនៅលើទឹកដីប្រវត្តិសាស្ត្រសៀមរាបអង្គរនោះដែរ ប្រារព្ធក្រោមវត្តមានរបស់ លោក ទៀ សីហា អភិបាលនៃគណៈអភិបាលខេត្តសៀមរាប ព្រមទាំងលោក លោកស្រីនៃគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ថ្នាក់ដឹកនាំមន្ទីរ អង្គភាពជុំវិញខេត្ត និង ភ្ញៀវទេសចរណ៍ជាតិ អន្តរជាតិ សិស្ស និសិ្សត ក្រុមយុវជនកាយរិទ្ធកម្ពុជា យុវជនកាកបាទក្រហមកម្ពុជា និង ប្រជាពលរដ្ឋជាច្រើន៕

អត្ថបទ៖ គឿន វេត