លោកឧកញ៉ា ​ស្រី ចាន់ថន នៅថ្ងៃទី១០ ខែឧសភា ឆ្នាំ២០២៣ នេះ បានបង្ហោះសារនៅលើគណនីហ្វេសប៊ុកផ្ទាល់ខ្លួនដោយបានសំណូមពរប្រជាពលរដ្ឋ និងម្ចាស់ផេកមួយចំនួនកុំបង្ហោះរូបភាពជាមួយអត្ថន័យបែបញុះញុង បញ្ឆេះកំហឹង ខណៈដែលក្រុមកីឡាកឃីកបុកស៊ីងថៃ ដឹកនាំដោយ ប៊ួខាវ បានធ្វើដំណើរចេញពីប្រទេសរបស់ខ្លួនដើម្បីចូលរួមប្រកួតក្នុងព្រឹត្តិការណ៍ស៊ីហ្គេម ចាប់ពីថ្ងៃទី១៣ ខែឧសភា នេះតទៅ នៅប្រទេសកម្ពុជាដែលជាម្ចាស់ផ្ទះ។

បើតាមសំណេររបស់លោកឧកញ៉ា ​ស្រី ចាន់ថន បានបង្ហោះនៅមុននេះថា បងប្អូនជនរួមជាតិជាទីគោរព នៅថ្ងៃនេះ ប៊ួខាវ ចេញដំណើរមកហើយ មកជាមួយក្រុមកីឡាឃីកបុកស៊ីងរបស់គាត់ ដើម្បីធ្វើការប្រកួតចាប់ពីថ្ងៃទី១៣ ខែឧសភា តទៅនៅស៊ីហ្គេម២០២៣។ សង្ឃឹមថា បងប្អូនកម្ពុជាយើងទាំងអស់គ្នារក្សាសេចក្ដីថ្លៃថ្នូរក្នុងនាមម្ចាស់ផ្ទះ យើងចាំ៦៤ឆ្នាំហើយសំរាប់ការរៀបចំព្រឹត្តិការណ៍ស៊ីហ្គេម ជាពិសេសខ្ញុំសំណូមពរតាមផេកកុំបង្ហោះរូបភាពជាមួយអត្ថន័យបែបញុះញុងបញ្ឆេះកំហឹងថែម យើងត្រូវយល់ពីអត្ថន័យនៃស៊ីហ្គេម គឺដើម្បីចំណងមិត្តភាពអាស៊ាន។

គួររំលឹកថា កាលពីពេលកន្លងទៅនៅលើបណ្ដាញសង្គមមួយចំនួននៅក្នុងព្រះរាជាណាចក្រកម្ពុជា​ក៏ដូចជាក្នុងប្រទេសថៃ ហាក់មានការឌឺដងដាក់គ្នាទៅវិញទៅមកពីបញ្ហាក្បាច់គុន គុនខ្មែរ និងក្បាច់គុន Muay Thai ជាពិសេសគឺការលើកឡើងពីសំណាក់ ប៊ួខាវ នេះតែម្ដងរហូតមានការអំពាវនាវពីថ្នាក់ដឹងនាំកំពូលរបស់ប្រទេសទាំងពីរ ទើបមានការស្ងប់ស្ងាត់រហូតមកដល់បច្ចុប្បន្ន៕

អត្ថបទ៖ សុខុម