យប់នេះ សៀង ចន្ធា អាចនឹងបង្ហាញខ្លួន​ការ​ប្រកួតពាន Qatar FA Cup

ការ​ប្រកួត​វគ្គ​សន្សំ​ពិន្ទុ​ក្នុង​ពូល​ពាន​រង្វាន់ Qatar FA Cup 2023 រវាងក្លិប Al Shahaniya និង​ Mesaimeer វេលាម៉ោង ១១:៣០ យប់ថ្ងៃទី១៤ ខែកញ្ញា ឆ្នាំ២០២៣ អាច​ជាជំនួបដែលអ្នកគាំទ្រកម្ពុជារង់​ចាំ​ទស្សនា បន្ទាប់​ពីតារា​បាល់ទាត់​កម្ពុជា​ សៀង ចន្ធា ​បាន​វិល​ត្រឡប់​ទៅ​ចូល​រួមក្លិប​វិញ។

សៀង ចន្ធា ​បាន​ប្រញាប់​ត្រឡប់​ទៅ​ប្រទេស​កាតារ​វិញ​នា​ល្ងាច​ថ្ងៃទី​១២ ខែ​កញ្ញា​ បន្ទាប់​ពី​ចប់​ការ​ប្រកួត​មិត្តភាព​អន្តរជាតិ​ជា​មួយ ហុងកុង និង​ម៉ាកាវ កាល​ពី​ថ្ងៃ​ទី​១១ ខែ​កញ្ញា ឆ្នាំ​២០២៣។ កីឡាករ​បាន​ប្រាប់​ថា រូប​គេរំពឹង​​​បាន​លេង​ឲ្យ​ក្រុម​ Al Shahaniya សម្រាប់​ការ​ប្រកួត​យប់​នេះ ដូច្នេះ​ហើយ​បាន​ជា​រូប​គេ​ត្រឡប់​ទៅ​កាតារ​វិញ​ដោយមិនបាន​សម្រាកសោះ។

សៀង ចន្ធា​ បាន​និយាយថា ៖«សម្រាប់ការហ្វឹកហាត់នៅកាតារគឺខ្ញុំហ្វឹកហាត់ខ្លាំង។ សម្រាប់ទម្រង់លេងរបស់ក្លិបគឺត្រូវដាក់សម្ពាធ​លើគូប្រកួត ឆ្លងកាត់ពី១ប្រកួតទៅ​១ប្រកួត ខ្ញុំត្រូវលេងបែបនេះរហូត។ នេះហើយជាហេតុផលដែលធ្វើឲ្យកម្លាំងរបស់ខ្ញុំកើនឡើងជាងមុន»។

កាល​ប្រកួត​បើក​ឆាក​សន្សំ​ពិន្ទុ​ក្នុងពូល A ពានរង្វាន់ Qatar FA Cup សៀង ចន្ធា ត្រូវ​បាន​ដូរ​ចូល​នៅ​​នាទី​ទី​៨៦ និង​រក​បាន​១គ្រាប់​​នៅ​ពេល Al Shahaniya បានឈ្នះ Muaither SC ដោយលទ្ធផល ៧-០ ដើម្បី​ទទួល​បាន​៣​ពិន្ទុ​ឈរ​លេខ១​ក្នុង​ពូល។

យប់​នេះ សៀង ចន្ធា ទំនង​ជា​មិន​អាច​បង្ហាញ​ខ្លួន​ជម្រើស​១១​នាក់​ដំបូង​ទេ​ដោយសារ​រូប​គេ​​បាន​ចំណាយ​ពេល​ច្រើន​ម៉ោង​ក្នុង​ការ​ធ្វើ​ដំណើរ​ពី​កម្ពុជា​ទៅ​កាតារ បន្ទាប់​ពី​ចប់​ភារកិច្ច​ជា​មួយ​ជម្រើស​ជាតិ​។

ក្នុងការប្រកួតមិត្តភាពអន្តរជាតិ២លើកក្នុងថ្ងៃ FIFA Days សៀង ចន្ធា បង្ហាញ​ខ្លួន​លើ​ទី​លាន​ក្នុង​ជម្រើស​១១​នាក់​ដំបូង​​ពេល​ប៉ះ​ ហុងកុង និងម៉ាកាវ។ រូប​គេ​ស៊ុត​បាន​២​គ្រាប់​នៅ​ពេល​កម្ពុជា​ឈ្នះ​ម៉ាកាវ ៤-0៕

អត្ថបទ៖ ផា រតនា