កីឡា

ព្រំ សំណាង ថា ចាញ់មិនអស់ចិត្ត សុំសងសឹកកីឡាករអាមេរិក

បានផុស

៣ years មុន

នៅ

ថ្ងៃអង្គារ ៣ តុលា ២០២៣

ដោយ

កំណត់ត្រាមិនដែលចាញ់ជាង៣០ដងគិតចាប់តាំងពីឆ្នាំ២០២២របស់អ្នកលេងគុនខ្មែរ ព្រំ សំណាង ត្រូវបានបញ្ចប់ដោយកីឡាករអាមេរិក Banasak Pawell កាលពីថ្ងៃទី៣០ ខែកញ្ញា ឆ្នាំ២០២៣។

ព្រំ សំណាង បានលើកឡើងថា ខ្លួនបានចាញ់កីឡាករអាមេរិកទាំងមិនអស់ចិត្ត ពីព្រោះមិនមានកន្លែងហ្វឹកហាត់ត្រឹមត្រូវចាប់តាំងពីបានឈ្នះមេដាយមាសក្នុងកីឡាស៊ីហ្គេមមក។ ទើបតែពេលនេះមេបានរៀបចំកន្លែងថ្មីរួចរាល់។ សូមកុំថាមិនហ្វឹកហាត់ និងសុំទោសដែលធ្វើឲ្យបងប្អូនកម្ពុជាខកបំណង។ ស្នើសុំស្ថានីយ៍ទូទស្សន៍រៀបចំការប្រកួតដើម្បីសងសឹកឡើងវិញ។

ការប្រកួតប្រើពេលត្រឹមតែ៣ទឹកបង្ហាញឲ្យឃើញថា កីឡាករគុនខ្មែរ ព្រំ សំណាង មិនអាចធ្វើអ្វីកើតលើកីឡាករអាមេរិកបានទេ ស្របពេលកម្ពស់ចាញ់ប្រៀបកីឡាករអាមេរិក។ ថ្វីបើចាញ់ប្រៀបខាងកម្ពស់ ក៏ ព្រំ សំណាង មិនបានប្រើកណ្តាប់ដៃ កែង និងទាត់ឡើយ។ រូបគេព្យាយាមអោបដើម្បីឡើងជង្គង់ដែលរឹតតែពិបាក ពីព្រោះចាញ់ប្រៀបខាងកម្ពស់។

ផ្ទុយទៅវិញ Banasak Pawell ប្រើជង្គង់ដោយមានប្រសិទ្ធភាព និងបានល្អតាមរយៈការបុកលើពោះរបស់ ព្រំ សំណាង។ ជាពិសេសរូបគេបានប្រើកែងបកត្រូវមុខបណ្តាលឲ្យកីឡាករគុនខ្មែររេទៅប៉ះខ្សែរេញ។ ទីបំផុត Pawell បានឈ្នះដោយពីន្ទុដើម្បីបានក្លាយជាម្ចាស់ខ្សែក្រវាត់ IPCC អន្តរទ្វីប។

ការប្រកួតនេះ អ្នកគាំទ្រមួយចំនួនបានរិះគន់សមត្ថភាពរបស់ ព្រំ សំណាង ដោយគ្មានអាវុធច្បាស់លាស់។ ជាពិសេសកីឡាករមីយ៉ាន់ម៉ា Dave Leduc បាននិយាយថា ការប្រកួតរបស់ ព្រំ សំណាង និង Pawell គួរឲ្យធុញទ្រាន់ និងគ្រាន់តែជាការប្រកួតបង្ក្រប់កិច្ច។ ពួកគេនឹងរៀបការ បន្ទាប់ពីចប់ការប្រកួត។ ការលើកឡើងបែបនេះរបស់ Leduc ដោយសារឃើញអោបគ្នាច្រើនពេកទាំង៣ទឹក៕