កីឡា

កីឡាករបាល់បោះ៣រូបមានកិច្ចសន្យាពេញមួយជីវិតជាមួយNike

បានផុស

៣ years មុន

នៅ

ថ្ងៃព្រហស្បតិ៍ ៥ តុលា ២០២៣

ដោយ

កីឡាបាល់បោះមានប្រជាប្រិយភាពខ្លាំងនៅសហរដ្ឋអាមេរិកដែលធ្វើឲ្យតារាឆ្នើម៣រូបទទួលបានកុងត្រាពេញមួយជីវីតជាក្រុមហ៊ុន Nike។ ក្រុមហ៊ុនមិនខ្លាចលើការចំណាយលុយដ៍ច្រើនសន្ធឹកសន្ធាប់ក្នុងការផ្តល់ឲ្យតំណាងផ្សព្វផ្សាយរបស់ខ្លួនពេញមួយជីវិតឡើយ។

ខាងក្រោមនេះជាកីឡាករបាល់បោះ៣រូបទទួលបានកុងត្រាពេញមួយជីវិត៖

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. កីឡាករ LeBron James

កីឡាករ LeBron James បច្ចុប្បន្នលេងឲ្យក្លិប Los Angeles Lakers បានក្លាយជាតំណាងផ្សព្វផ្សាយជាមួយ Nike តាំងពីមុនពេលចូលលេងបាល់បោះអាមេរិក NBA។ គាត់បានចុះហត្ថលេខាលើកិច្ចសន្យារយៈពេល៧ឆ្នាំ ជាមួយក្រុមហ៊ុនក្នុងឆ្នាំ ២០០៣ ដែលមានតម្លៃជាង ៩០ លានដុល្លារ។ ពេលនោះ មនុស្សជាច្រើនមានការងឿងឆ្ងល់ថា តើក្រុមហ៊ុនហ៊ានចំណាយលុយយ៉ាងច្រើនដល់កីឡាករអាយុទើប១៨ឆ្នាំ ដែលមិនទាន់បានមានជំនាញនិងភាពល្បីល្បាញទៅវិញ។

យោងតាមលោក Kurt Badenhausen នៅទស្សនាវដ្តី Forbes ការលក់ស្បែកជើងដែលមានហត្ថលេខារបស់ LeBron James ទទួលបានប្រាក់ចំណូលប្រមាណ ៣៤០ លានដុល្លារនៅចន្លោះខែកុម្ភៈ ឆ្នាំ២០១៤ ដល់ខែមករា ឆ្នាំ២០១៥ ដែលធ្វើឱ្យគាត់ក្លាយជាអ្នករកប្រាក់ចំណូលខ្ពស់បំផុតរបស់ក្រុមហ៊ុន។ ឆ្នាំ២០១៥ ភាពជាដៃគូរបស់ពួកគេកាន់តែមានភាពល្អប្រសើរ James បានចុះកិច្ចសន្យាពេញមួយជីវិតដែលមានតម្លៃប្រហែល១ពាន់លានដុល្លារ។

២. កីឡារ Michael Jordan

អតីតកីឡាករ Michael Jordan ជាកីឡាករបាល់បោះដំបូងដែលបានចុះហត្ថលេខាលើកិច្ចសន្យាពេញមួយជីវិតជាមួយក្រុមហ៊ុន។ លោកអាចរកប្រាក់ចំណូលបាន៥% ក្នុងការលក់ស្បែកជើងម៉ាក Jordan របស់ក្រុមហ៊ុន។ ឆ្នាំ ១៩៨៤ លោក Jordan បានចុះហត្ថលេខាលើកិច្ចព្រមព្រៀងជាមួយក្រុមហ៊ុន Nike ដែលមានតម្លៃត្រឹមតែ ២.៥ លានដុល្លារក្នុងរយៈពេល ៥ ឆ្នាំ។

រយៈពេល៤០ឆ្នាំជាមួយក្រុមហ៊ុនក្នុងនាមជាអត្តពលិក និងជាតំណាងផ្សព្វផ្សាយ លោកអាចរកបានប្រាក់ចំណូលប្រមាណ១.៨ ពាន់លានដុល្លារ។ ក្រុមហ៊ុនដំបូងឡើយបានព្យាករពីការលក់ស្បែកជើង Air Jordan ក្នុងទឹកប្រាក់ប្រមាណ៣លានដុល្លារប៉ុណ្ណោះ ប៉ុន្តែក្នុងឆ្នាំដំបូងក្រុមហ៊ុនអាចរកបានដល់ទៅ ១២៦ លានដុល្លារ ដោយសារឥទ្ធិពលរបស់លោក Michael Jordan។

៣. កីឡាករ Kevin Durant

Kevin Durant ជាកីឡាករបាល់បោះទី៣ ក្នុងក្របខណ្ឌបាល់បោះអាមេរិក NBA ដែលទទួលបានកុងត្រាពេញមួយជីវិតជាមួយក្រុមហ៊ុន Nike។ បច្ចុប្បន្នកីឡាករលេងឲ្យក្លិប Phoenix Suns។

កីឡាកររូបនេះបានចូលរួមជាមួយក្រុមហ៊ុនក្នុងឆ្នាំ២០១៤ ក្នុងកិច្ចព្រមព្រៀងរយៈពេល១០ឆ្នាំត្រូវបានគេប៉ាន់ប្រមាណថាមានតម្លៃ ៣០០លានដុល្លារ និងមានកញ្ចប់ថវិកាចូលនិវត្តន៍៥០លានដុល្លារមុនពេលលោកទទួលបានកុងត្រាពេញមួយជីវិត។

រហូតដល់ពេលនេះ ក្រុមហ៊ុនមានកុងត្រាពេញមួយជីវិតជាមួយអត្តពលិក៤រូបប៉ុណ្ណោះគឺកីឡាករបាល់បោះ Michael Jordan, LeBron James Kevin Durant និងកីឡាករបាល់ទាត់ Cristiano Ronaldo៕