បញ្ជាការដ្ឋានអង្គរក្សឈ្នះពានឯកត្តជន២ ខណៈវិសាខាឈ្នះ៥ក្នុងតេជោលីគរដូវទី១

​​ក្រុម​បាល់ទះ​បញ្ជការដ្ឋាន​អង្គរក្ស​​​មាន​កីឡាករ​២​រូប​បាន​ឈ្នះ​ពាន​រង្វាន់​ឯកត្តជន​ក្នុង​នាម​ជា​ជើង​ឯក​ពាន​រង្វាន់​បាល់ទះ​តេជោលីគ​រដូវ​កាល​ទី១ បន្ទាប់​ពី​យក​ឈ្នះ​លើ​ក្រុមវិសាខា​​ដែល​មាន​កីឡាករ​៤​រូប​ឈ្នះ​ពាន​រង្វាន់​ឯកត្តជន ដោយ​លទ្ធផល ៣-១ ក្នុង​វគ្គ​ផ្តាច់​ព្រ័ត្រ នា​ល្ងាច​ថ្ងៃ​អាទិត្យ ទី​១៨ ខែ​កុម្ភៈ នៅ​សាល​វិមាន​ពហុកីឡដ្ឋាន​ជាតិ​អូឡាំពិក។

ការ​ប្រកួត​វគ្គ​ផ្តាច់​ព្រ័ត្រ​ពិត​ជា​ជក់​ចិត្ត​ខ្លាំង​មែន​ទែន​ក្រោម​ក្រសែ​ភ្នែក​អ្នក​ទស្សនា​ផ្ទាល់​ជិត​៥០​ពាន់​នាក់ និង​គ្មាន​សល់​កន្លែង​អង្គុយ ខណៈ​អ្នក​គាំទ្រ​ជា​ច្រើន​នៅ​ខាង​ក្រៅ​សាល។ នៅ​សិត​ទី១ និង​សិត​ទី​២ បញ្ជាការដ្ឋាន​អង្គរក្ស​ទទួល​បាន​ជ័យជម្នះ ខណៈ​សិត​ទី​៣​វិសាខា​បាន​យក​ឈ្នះ ប៉ុន្តែ​នៅ​សិត​ទី​៤ បញ្ជាការដ្ឋាន​អង្គរក្ស​ជា​អ្នក​ឈ្នះ​។

ស្នងការដ្ឋាននគរ​បាល​រាជ​ធានី​ភ្នំពេញ ទទួល​បាន​ចំណាត់​ថ្នាក់​លេខ​៣ បន្ទាប់​ពី​វាយ​បក​យក​ឈ្នះក្រសួង​មហា​ផ្ទៃ​​​ដោយ​លទ្ធផល ៣-២។ ក្រសួង​មហា​ផ្ទៃ​បាន​យក​ឈ្នះ​សិត​ទី​១ និង​ទី​២ ប៉ុន្តែ​ស្នងការដ្ឋាន​នគរ​បាល​រាជ​ធានី​ភ្នំពេញ​បាន​វាយបក​យក​ឈ្នះ​៣​សិត​ជាប់​គ្នា។

ក្នុង​នាម​ជា​ក្រុម​ជើង​ឯក​ប្រចាំ​រដូវ​កាល​ដំបូង​នេះ បញ្ជាការដ្ឋាន​អង្គរក្ស​មាន​កីឡាករ​២​រូប​ដែល​ទទួល​បាន​ពាន​រង្វាន់​ឯកត្តជន​គឺ​កីឡាករ​ឥណ្ឌូណេស៊ី Dio បាន​ឈ្នះ​ពាន​រង្វាន់​ជា​អ្នក​ប៉ះ​សេ​ឆ្នើម​បំផុត ខណៈ​កីឡាករ​វ័យ​ក្មេង Luvi បាន​ឈ្នះ​ពាន​រង្វាន់​​ជា​អ្នក​ផ្តាច់​ក្រៅ​ប្រអប់​ឆ្នើម​បំផុត។

ចំណែក​ក្រុម​ជើង​ឯង​រង វិសាខា​ មាន​កីឡាករ៥​រូប​ឈ្នះ​ពាន​រង្វាន់​ឯកត្តជន​គឺ គួន ម៉ុម បាន​ឈ្នះ​ពាន​រង្វាន់​២​ម្នាក់​ឯង (អ្នក​ផ្តាច់​ក្រៅ​ប្រអប់​ឆ្នើម​បំផុត និង​ជា​កីឡាករ​ល្អ​ប្រចាំ​ព្រឹត្តិការណ៍។ ពិន សារ៉ុន ឈ្នះ​ពាន​អ្នក​បិទ​ឆ្នើម, សេង គីមហាប់ ឈ្នះ​ពាន​ Libero ឆ្នើម និង​កីឡាករ​សញ្ជាតិ​គុយបា Henry ឈ្នះ​ពាន​អ្នក​ប្លុក​កណ្តាល​ឆ្នើម​បំផុត។

ជា​មួយ​គ្នា​នេះ កីឡាករ ឧក រដ្ឋា របស់​បញ្ជាការដ្ឋាន​នគរ​បាល​រាជ​ធានី​ភ្នំពេញ​បាន​ឈ្នះ​ពាន​រង្វាន់​​អ្នក​ប្លុក​កណ្តាល​ឆ្នើម​បំផុត​ដូច Henry ដែរ។

ប្រាក់​រង្វាន់ និង​ជយភាភី

• ជើង​ឯក៖ បញ្ជាការដ្ឋាន​អង្គរក្ស ទទួល​បាន​ពាន មេដាយ​មាស និង​ប្រាក់​រង្វាន់​៦០​លាន​រៀល
• ជើងឯក​រង៖ វិសាខា ទទួល​បាន​មេដាយ​ប្រាក់ និង​ប្រាក់​រង្វាន់​១០​លាន​រៀល
• លេខ​៣៖ ស្នងការដ្ឋាន​នគរ​បាល​រាជ​ធានី​ភ្នំពេញ ទទួល​បាន​មេដាយ​សំរិទ្ធ និង​ប្រាក់​រង្វាន់​១០​លាន​រៀល
• លេខ៤៖ ក្រសួង​មហា​ផ្ទៃ ទទួល​បាន​ប្រាក់​រង្វាន់​១០​លាន​រៀល
• Best Opposite (អ្នកបិទឆ្នើម) ៖ ពិន សារ៉ុន របស់ វិសាខា
• Best Outside Hitter (អ្នក​ផ្តាច់​​ក្រៅប្រអប់ឆ្នើម) ៖ គួន ម៉ុម របស់​ វិសាខា
• Best Outside Hitter (អ្នក​ផ្តាច់​​ក្រៅ​ប្រអប់ឆ្នើម) ៖ Luvi របស់​បញ្ជាការដ្ឋាន​អង្គរក្ស
• Best Setter (អ្នក​ប៉ះសេឆ្នើម) ៖ Dio របស់​បញ្ជាការដ្ឋាន​អង្គរក្ស
• Best Libero (អ្នក​ការពារ​ឆ្នើម)៖ សេង គីមហាប់ របស់ វិសាខា
• Best Middle Blocker (អ្នក​ប្លុក​កណ្តាល​ឆ្នើម)៖ Henry របស់​ វិសាខា
• Best Middle Blocker (អ្នក​ប្លុក​កណ្តាលឆ្នើម) ៖ ឧក រដ្ឋា របស់​ បញ្ជាការដ្ឋាន​នគរ​បាល​រាជធានី​ភ្នំពេញ
• MVP (កីឡាករ​​ឆ្នើម​ប្រចាំ​ព្រឹត្តិការណ៍)៖ គួន ម៉ុម របស់​ វិសាខា

អត្ថបទ៖ វីរបុត្រ
រូបថត៖ ស សុខា