Wayne Rooney អាចឈានជើងចូលសង្វៀនប្រដាល់

អតីតកីឡាករបាល់ទាត់ជម្រើសជាតិអង់គ្លេស និងជាវីរបុរសរបស់ក្លិប Manchester United លោក  Wayne Rooney ត្រូវបានរាយការណ៍ថាកំពុងពិភាក្សាជាមួយស្ថាប័ន Misfits Boxing ជាសង្វៀនប្រកួតកីឡាប្រដាល់​នៅ​ប្រទេស​អង់គ្លេស។

កាសែតធំ២គឺ​ The Daily Star និង The Mirror បានរាយការណ៍ថា អតីតកីឡាករបាល់ទាត់វ័យ ៣៨ឆ្នាំរូបនេះ កំពុងពិភាក្សាជាមួយសង្វៀនប្រដាល់ Misfits Boxing ដើម្បីឈានជើងចូល​រួមសង្វៀន​ប្រយុទ្ធ។ ក្តីស្រលាញ់ និងចំណង់ចំណូលចិត្តរបស់ Rooney ចំពោះកីឡាប្រដាល់ គឺមិនមានអ្វីថ្មីនោះទេ។ ទោះបីជារូបគេជាអតីតកីឡាករបាល់ទាត់ក៏ដោយ ក៏​រូប​គេ​ធ្លាប់បានបញ្ជាក់យ៉ាងច្បាស់ថា ខ្លួនចូលចិត្តប្រដាល់។ ឥឡូវនេះវាត្រូវបានគេរាយការណ៍ថា លោកបានពិភាក្សាជាមួយអ្នកផ្គូផ្គង (Promoter) ប្រដាល់អំពីលទ្ធភាព​ដែល​អាច​ឡើង​​សង្វៀន។

សង្វៀន Misfits មិនស្ថិតនៅក្រោមច្បាប់របស់គណៈកម្មាធិការគ្រប់គ្រងប្រដាល់របស់អង់គ្លេស​ទេ ដូច្នេះលោក​ Rooney មិនចាំបាច់ក្លាយជាអ្នកប្រដាល់អាជីពនោះទេ។ ទោះជាយ៉ាងណា ភាពទាក់ទាញ និង​​ល្បីល្បាញរបស់ Rooney នឹងក្លាយជាការធានារបស់ទស្សនិកជនយ៉ាងច្រើន។ ប្រព័ន្ធផ្សព្វផ្សាយក្នុងស្រុកប៉ាន់ស្មានថា អតីត​កីឡាករ​ប្រដាល់ Ricky Hatton ​នឹង​​អាច​ក្លាយ​ជា​ដៃ​គូ។ ប្រសិនបើអតីតកីឡាករបាល់ទាត់រូបនេះទទួលយកសំណើររបស់សង្វៀន Misfit ហើយសម្រេចចិត្តពាក់ហ្គង់ដៃចូលប្រកួត។

Rooney បានចាប់ផ្តើមអាជីពជាមួយក្លិប Everton ជាកន្លែងដែលបានចូលរួមតាំងពីអាយុ ១០ឆ្នាំ។ លោកបានបង្ហាញខ្លួនក្នុងកម្រិតអាជីពដំបូងក្នុងឆ្នាំ២០០២ បន្ទាប់ពីត្រូវបានតម្លើងទៅក្រុមធំ។

បន្ទាប់ពី ២រដូវកាល លោកក៏បានផ្លាស់ទៅ​ក្លិប​ Manchester United នៅរដូវក្តៅឆ្នាំ២០០៤ ក្នុងតម្លៃ ២៥.៦លានផោន។ លោកបានឈ្នះជើងឯកក្នុងស្រុកចំនួន១៣ដង ( Premier League ៥ ដង , FA Cup ១ ដង, English League Cup ៣ ដង និង Community Shields ៤ដង) និងពានរង្វាន់អន្តរជាតិចំនួន ៣ ( UEFA Champions League ១ដង UEFA Europa League ១ដង និង FIFA Club World Cup ១ដង។

លោកក៏កាន់កំណត់ត្រាស៊ុតបញ្ចូលទីច្រើនជាងគេសម្រាប់ Manchester United ដែលមាន ២៥៣គ្រាប់។ គ្រាប់បាល់ចំនួន ២០៨គ្រាប់របស់លោកនៅ Premier League ​បាន​ក្លាយជាអ្នកស៊ុតបញ្ចូលទីច្រើនជាងគេ​លំដាប់​ទី២ ក្នុងប្រវត្តិសាស្ត្រលីគ។ Rooney ក៏ធ្លាប់លេងក្នុងពានរង្វាន់បាល់ទាត់ពិភពលោក (FIFA World Cup) ៣ដងជាមួយអង់គ្លេស នៅឆ្នាំ២០០៦, ២០១០ និង ២០១៤៕

ប្រែសម្រួល៖ មន្នីរ័ត្
ប្រភព៖ Inside The Games