កីឡា

ឆ្នាំនេះ កម្ពុជាត្រៀមប្រកួតព្រឹត្តិការណ៍កីឡាធំ៣

បានផុស

២ years មុន

នៅ

ថ្ងៃចន្ទ ៤ មីនា ២០២៤

ដោយ

គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡាត្រៀមខ្លួនរៀបចំ ក៏ដូចជាចូលរួមប្រកួតព្រឹត្តិការណ៍សំខាន់៣នៅក្នុងឆ្នាំ២០២៤ជាឆ្នាំចន្លោះគ្មានព្រឹត្តិការណ៍កីឡាស៊ីហ្គេម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាអូឡាំពិករដូវក្តៅ នៅប្រទេសបារាំង

តាមសេចក្តីថ្លែងការណ៍របស់គណៈកម្មាធិការជាតិអូឡាំពិកកម្ពុជាកាលពីថ្ងៃទី២ ខែមីនា ឆ្នាំ២០២៤ បានបង្ហាញថា កម្ពុជានឹងបញ្ជូនប្រតិភូកីឡាទៅចូលរួមប្រកួតកីឡាអូឡាំពិក រដូវក្តៅ នៅទីក្រុងប៉ារីស ប្រទេសបារាំង ចាប់ពីថ្ងៃទី២៦ ខែកក្កដា ដល់ថ្ងៃទី១១ ខែសីហា ឆ្នាំ២០២៤។ ទោះបីជាយ៉ាងណា នៅមិនទាន់ច្បាស់ថា កម្ពុជានឹងបញ្ជូនកីឡាប៉ុន្មានប្រភេទទៅចូលរួម ពីព្រោះកីឡាអូឡាំពិក ទាល់តែតែជាប់ជម្រុះ ឬឈ្នះមេដាយកីឡាទ្វីបអាស៊ីទើបមានសិទ្ធិចូលរួមប្រកួតបាន។

ប្រសិនបើមិនជាប់វគ្គជម្រុះ ឬឈ្នះមេដាយមាសកីឡាទ្វីបអាស៊ី កម្ពុជាអាចចូលរូមប្រកួត២ប្រភេទកីឡាគឺ ហែលទឹក និងអត្តពលកម្ម ក្នុងនាមជាសមាជិកបំពេញកាតព្វកិច្ច ពីព្រោះកីឡា២ប្រភេទត្រូវចូលរួមដាច់ខាត។

កីឡាក្នុងសាល និងយុទ្ធគុនចម្រុះអាស៊ី លើកទី៦

កម្ពុជាត្រៀមខ្លួនបញ្ជូនប្រតិភូកីឡាទៅចូលរួមប្រកួតកីឡាក្នុងសាល និងយុទ្ធគុនចម្រុះអាស៊ី លើកទី៦ (6^th Asian Indoor & Martial Games 2024) ចាប់ពីថ្ងៃទី២១ ដល់ទី៣០ ខែវិច្ឆិកា ឆ្នាំ២០២៤ នៅទីក្រុងបាំងកក ប្រទេសថៃ។ សម្រាប់កីឡានេះ កម្ពុជាអាចនឹងបញ្ជូនច្រើនប្រភេទកីឡាដើម្បីចូលរួមប្រកួត។

ទិដ្ឋភាពពិធីបើកកីឡាក្នុងសាល និងយុទ្ធគុនចម្រុះអាស៊ី លើកទី៥ នៅប្រទេសតួកមេនីស្ថាន

កីឡាជាតិលើកទី៤ និងកីឡាជាតិជនពិការលើកទី២

ក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជានឹងរៀបចំព្រឹត្តិការណ៍ប្រកួតពហុកីឡាគឺ«កីឡាជាតិ»លើកទី៤ និង«កីឡាជាតិជនពិការ» លើកទី២ ឆ្នាំ២០២៤ តាមរយៈចំណារអនុញ្ញាតពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ចុះថ្ងៃទី២ ខែវិច្ឆិកា ឆ្នាំ២០២៣ យោងតាមលិខិតលេខ៦៥៦៥ អយក.រពកឡ ចុះថ្ងៃទី២៣ ខែតុលា ឆ្នាំ២០២៣។

គោលបំណងនៃការរៀបចំព្រឹត្តិការណ៍ពហុកីឡានេះតាំងពីដំបូងមកគឺដើម្បីឲ្យមន្ត្រីបច្ចេកទេស និងភាគីពាក់ព័ន្ធមានបទពិសោធ ចំណេះដឹង ចំណេះធ្វើពីការរៀបចំព្រឹត្តិការណ៍កីឡាធំៗដើម្បីរៀបចំធ្វើម្ចាស់ផ្ទះកីឡាស៊ីហ្គេមកាលពីឆ្នាំ២០២៣។ បន្ទាប់ពីកីឡាស៊ីហ្គេម ឆ្នាំ២០២៣បានបញ្ចប់ កម្ពុជានៅតែបន្តរៀបចំព្រឹត្តិការណ៍កីឡាជាតិដើម្បីបង្កើនបច្ចេកទេស បទពិសោធ ចំណេះដឹង ចំណេះធ្វើបន្ថែមទៀត។ ជាពិសេសដើម្បីត្រៀមខ្លួនធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩ នៅប្រទេសកម្ពុជា។