«កីឡាសម្រាប់ទាំងអស់គ្នា» ជាកម្មវិធីសម្រាប់មហាជនចូលរួមដើម្បីកម្សាន្តតាមបែបវប្បធម៌ ភាពសប្បាយរីករាយ លើកកម្ពស់ សុខុមាលភាព

លោក​ វ៉ាត់​ ចំរើន​ រដ្ឋលេខាធិការ​ក្រសួង​អប់រំ​ យុវជន​ និង​កីឡា​ បាន​ដឹកនាំ​ប្រារព្ធ​កម្មវិធី​ «កីឡាសម្រាប់ទាំងអស់គ្នា» ជាកម្មវិធីសម្រាប់មហាជនចូលរួមដើម្បីកម្សាន្តតាមបែបវប្បធម៌ ភាពសប្បាយរីករាយ លើកកម្ពស់ សុខុមាលភាព នៅ​ខេត្ត​រតនគិរី កាល​ពី​ថ្ងៃ​ទី៣០​ ខែ​មិថុនា​ ឆ្នាំ​២០២៥។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក​ វ៉ាត់​ ចំរើន​ បាន​ឲ្យ​ដឹង​ថា​ កម្មវធី​ «កីឡាសម្រាប់ទាំងអស់គ្នា» (Sports For All) ឆ្នាំ២០២៥ ក្រោមប្រធានបទ “សុខភាពជាទ្រព្យសកម្មដ៏មានតម្លៃសម្រាប់មនុស្សគ្រប់រូប” នៅបឹងកន្សែង ខេត្តរតនគិរី។ ជា​កម្មវិធី​សម្រាប់​មហាជន​ទូទៅ​ក្នុង​សង្គម​ គ្រប់វ័យ គ្រប់ភេទ គ្រប់មជ្ឈដ្ឋាន បានចូលរួមក្នុងសកម្មភាពកីឡា ដើម្បីសកម្មភាពកម្សាន្តតាមបែបវប្បធម៌ភាពសប្បាយរីករាយ លើកកម្ពស់សុខភាព សុខុមាលភាព និងឈានទៅអភិវឌ្ឍវស័យកីឡាជាតិ។

អ្នក​ជំនាញ​ផ្នែក​កីឡា​រូប​នេះ​បន្ថែម​ទៀត​ថា​ សកម្មភាពលេងកីឡាក៏ធ្វើឱ្យមនុស្សគ្រប់រូបមានសុខភាពល្អ រូបរាងកាយមាំមួន អារម្មណ៍ស្រស់ថ្លា ស្មារតីរឹងមាំ ប្រាជ្ញាវាងវៃ ដោយបានបញ្ចេញជាតិពុលពីក្នុងខ្លួន កាត់បន្ថយភាពស្ត្រេស ភាពតានតឹងក្នុងអារម្មណ៍ ទប់ស្កាត់ជំងឺផ្សេងៗ និងបានកាត់បន្ថយថ្លៃព្យាបាល ជំងឺទៀតផង។

បញ្ជាក់​ដែរ​ថា​ កម្មវិធី​ «កីឡាសម្រាប់ទាំងអស់គ្នា» (Sports For All) ឆ្នាំ២០២៥​ ដែល​ធ្វើ​ឡើង​នៅ​ខេត្ត​រតនគីរី​នេះ​មាន​លេង​លើ​ប្រភេទ​កីឡា​ដូច​ជា​ ជិះកង់ រត់ចម្ងាយ កីឡាទាត់សី កីឡាល្បក្កតោ ហាត់ប្រាណតាមចង្វាក់ភ្លេង និងកីឡាទាញព្រ័ត្រ។​ ព្រឹត្តិការណ៍​នេះ​មាន​សិស្សានុសិស្ស មន្ត្រីរាជការ ប្រជាជននៅក្នុងខេត្តរតនគិរី គណៈកម្មការបច្ចេកទេសរបស់ក្រសួងអប់រំ យុវជន និងកីឡា មន្ទីរអប់រំ យុវជន និងកីឡាខេត្តរតនគិរី រដ្ឋបាលខេត្តរតនគិរីសរុបចំនួនប្រមាណ ១០០០ នាក់៕​

អត្ថបទដោយ៖ នួន ស៊ីណា