កីឡា

បុរសម្នាក់ជាប់គុក៧ខែពីបទលួចព័ត៌មានសន្តិសុខកីឡាអូឡាំពិក២០២៤

បានផុស

២ សប្តាហ៍ មុន

នៅ

ថ្ងៃអង្គារ ៥ មីនា ២០២៤

ដោយ

បុរសលួចកាបូបស្ពាយដែលមានកំណត់ចំណាំ និងព័ត៌មានរសើបអំពីព្រឹត្តិការណ៍កីឡាអូឡាំពិក ពីវិស្វករនៅសាលាក្រុងប៉ារីស ត្រូវបានកាត់ទោសឱ្យជាប់ពន្ធនាគាររយៈពេល៧ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន AFP ប្រភពពីតុលាការបានបញ្ជាក់ថា បុរសលួចកាបូបយួរដៃដែលមានព័ត៌មានរសើបអំពីផែនការសន្តិសុខសម្រាប់កីឡាអូឡាំពិកទីក្រុងប៉ារីស ឆ្នាំ២០២៤ ត្រូវបានចាប់ខ្លួន និងកាត់ទោសឱ្យជាប់គុក៧ខែពីបទឧក្រិដ្ឋនេះ។ ចុងចោទបានបង្ហាញខ្លួននៅចំពោះមុខតុលាការក្នុងរដ្ឋធានីបារាំង កាលពីថ្ងៃសុក្រ បន្ទាប់ពីការលួចនៅលើរថភ្លើងកាលពីយប់ថ្ងៃចន្ទ។

កាបូបស្ពាយជារបស់វិស្វករម្នាក់ធ្វើការនៅសាលាក្រុងប៉ារីស ហើយបានទុកនៅក្នុងបន្ទប់ដាក់អីវ៉ាន់ពីលើកៅអីរបស់ខ្លួន។ ការភ្ញាក់ផ្អើលបានកើតឡើងនៅពេលឃើញបុរសវ័យ២៣ឆ្នាំបានលួចយក។ ឧក្រិដ្ឋកម្មនេះបានធ្វើឱ្យមានការព្រួយបារម្ភ នៅពេលប្រភពប៉ូលិសបាននិយាយថា នៅក្នុងកាបូបមានកុំព្យូទ័រ១គ្រឿង និង USB ២ដែលមានព័ត៌មានពីផែនការសុវត្ថិភាពសម្រាប់កីឡាអូឡាំពិកទីក្រុងប៉ារីស។

ទោះបីជាយ៉ាងណា ប៉ុន្មានថ្ងៃក្រោយមក ការិយាល័យរដ្ឋអាជ្ញាក្រុងប៉ារីសបាននិយាយថា USB “មានតែព័ត៌មានអំពីចរាចរណ៍ផ្លូវក្នុងទីក្រុងប៉ារីសក្នុងអំឡុងពេលកីឡាអូឡាំពិក និងគ្មានព័ត៌មានសុវត្ថិភាពរសើបឡើយ”។

ប្រភពតុលាការបាននិយាយថា ជនសង្ស័យធ្លាប់លួចម្តងហើយម្តងទៀតនៅលើការដឹកជញ្ជូនសាធារណៈ ជាពិសេសកាលពីដើមខែមករា។ ចុងចោទក៏ត្រូវបានចោទប្រកាន់ពីបទបដិសេធផ្តល់លេខកូដទូរស័ព្ទរបស់ខ្លួនដល់អាជ្ញាធរ។

សេចក្តីថ្លែងការណ៍របស់សាលាក្រុងប៉ារីសបាននិយាយថា បុគ្គលិកក្រុងកំពុងត្រូវបានស៊ើបអង្កេតដើម្បីកំណត់ថា តើគេបានបំពានច្បាប់សន្តិសុខផ្ទៃក្នុងណាមួយដោយការធ្វើដំណើរដោយប្រើសោ USB ដើម្បីបង្ហាញថា នេះមិនមែនជាឧបទ្ទវហេតុតូច ហើយខ្លឹមសារនៅក្នុងកាបូបគឺពាក់ព័ន្ធនឹងអាជ្ញាធរក្រុងប៉ារីស។

បុគ្គលិកសន្តិសុខប្រហែល ៣៥,០០០នាក់នឹងត្រៀមខ្លួនបំពេញការងារក្នុងកីឡាអូឡាំពិក ចាប់ពីថ្ងៃទី២៦ ខែកក្កដា ដល់ថ្ងៃទី១១ ខែសីហា រួមទាំងមន្ត្រីប៉ូលិសក្រុងប្រមាណ ២,០០០នាក់ទៀត។ ការគ្រប់គ្រងហ្វូងមនុស្ស និងការការពារឧក្រិដ្ឋកម្ម ប៉ូលិសនឹងប្រុងប្រយ័ត្នខ្ពស់ចំពោះការវាយប្រហារភេរវកម្មដែលអាចកើតមាន ដោយសារប្រទេសបារាំងជាគោលដៅរបស់ក្រុមឥស្លាមជ្រុលនិយមកន្លងមក៕