ក្រុម Trabzonspor រងការពិន័យលេងគ្មានអ្នកគាំទ្រចំនួន៦ប្រកួត

សហព័ន្ធបាល់ទាត់ប្រទេសតួកគីបានសម្រេចឲ្យក្រុម Trabzonspor ប្រកួតដោយ​គ្មាន​អ្នកគាំទ្រ​ចូល​ទស្សនា​ចំនួន៦ប្រកួត នៅក្នុងដីរបស់ខ្លួន បន្ទាប់ពីអ្នកគាំទ្ររបស់ពួក​គេ​បានធ្វើកុប្បកម្ម​ពេល​ប្រកួតក្នុងពានរង្វាន់ Super Lig កន្លង​មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចដាក់ពិន័យកើតមានឡើងនៅពេលក្រុម Fenerbahce បាន​យក​ឈ្នះ ៣-២ លើក្រុម Trabzonspor កាលពីថ្ងៃទី១៨ ខែមីនា ជាហេតុធ្វើឲ្យអ្នកគាំទ្រក្រុម Trabzonspor បានសម្រុកចូលទីលាន និង​​វាយប្រហារកងកម្លាំងសន្តិសុខ និងក្រុមកីឡាករ។

ក្លិប Trabzonspor ត្រូវបានពិន័យជាប្រាក់ចំនួន៣លានលីរ៉ាតួកគី (៩៤,០០០ ដុល្លារ) ខណៈគ្រូបង្វឹកលោក Egemen Korkmaz ត្រូវបានព្យួរ​១ប្រកួត។​ កីឡាករ Fenerbahçe İrfan Can Eğribayat និង Jayden Oosterwolde ក៏ត្រូវបានព្យួរ​១ប្រកួត។ ខ្សែការពារ Bright Osayi-Samuel របស់ក្រុម Fenerbahce ដែលបានវ៉ៃអ្នកគាំទ្រ Trabzonspor ដើម្បីការការពារខ្លួន មិនត្រូវបានពិន័យទេ។

បន្ទាប់ពីកុប្បកម្ម​នៅទីក្រុង Trabzon ថ្នាក់ដឹកនាំក្រុម Fenerbahce បានគំរាមដកខ្លួនចេញពីការប្រកួត​លីគ​តួកគី។ សមាជិកក្រុមទាំងមូលក៏បានត្រូវសម្រេចឲ្យបោះឆ្នោតចំពោះសំណើសុំដកខ្លួនចេញពី​លីគតួកគី Super Lig។

ក្រុម Fenerbahce ដែល​ជាក្រុមមួយជោគជ័យក្នុងប្រទេសតួកគី​ធ្លាប់​បាន​ឈ្នះ​ជើង​ឯក​លីគចំនួន១៩លើក។ បើ​មើលតារាងពិន្ទុសប្ដាហ៍ទី៣១ ក្រុម Fenerbahce កំពុងឈរនៅលេខ២ ក្រោយការប្រកួត៣១លើក ឈ្នះ២៦ ស្មើ៤ ចាញ់១ មាន៨២ពិន្ទុ ខណៈក្រុម Galatasaray ឈរនៅលេខ១​ មាន៨៤ពិន្ទុ ក្រោយ៣១លើក ឈ្នះ២៧ ស្មើ៣ ចាញ់១៕

ប្រែសម្រួល៖ ផា រតនា
ប្រភព៖ insideworldfootball