កីឡា

ក្រោយជោគជ័យនៅក្លិប សឿយ វិសាល មានក្តីស្រមៃធំក្នុងជម្រើសជាតិ

បានផុស

២ years មុន

នៅ

ថ្ងៃអង្គារ ៣០ មេសា ២០២៤

ដោយ

ខ្សែការពារ សឿយ វិសាល មានក្តីស្រមៃធំបំផុតដែលចង់សម្រេចក្នុងក្រុមបាល់ទាត់ជម្រើសជាតិកម្ពុជា បន្ទាប់ពីជួយក្លិបព្រះខ័នរាជស្វាយរៀងឲ្យទទួលបានជោគជ័យក្នុងរដូវកាល២០២៣-២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាប្រធានក្រុម សឿយ វិសាល បានជួយព្រះខ័នរាជស្វាយរៀងឈ្នះជើងឯកពានរង្វាន់សម្តេចតេជោ ហ៊ុន សែន លើកទី១៧ និងកំពុងឆ្ពោះទៅរកការគ្រងជើងឯកលីគកំពូលកម្ពុជាទៀតក្នុងរដូវកាលនេះ។ រូបគេពិតជារីករាយនឹងអ្វីដែលខ្លួនរួមចំណែកជួយដល់ក្លិបឲ្យទទួលលទ្ធផលល្អប្រសើរ ប៉ុន្តែរូបគេចង់មានអារម្មណ៍ពិសេសមិនធ្លាប់មានក្នុងក្រុមបាល់ទាត់ជម្រើសជាតិកម្ពុជា។

សឿយ វិសាល បាននិយាយថា ៖«គោលដៅធំរបស់ខ្ញុំមួយទៀត ខ្ញុំចង់សម្រេចគឺជួយឲ្យក្រុមជម្រើសជាតិមានឱកាសទៅលេងវគ្គផ្តាច់ព្រ័ត្រដើម្បីប្រទេសជាតិយើងម្តង។ មិនថាពានរង្វាន់អ្វី ឲ្យតែពានរង្វាន់អន្តរជាតិ ពីព្រោះខ្ញុំចង់ឃើញក្រុមជម្រើសជាតិយើងមានការប្រកួតប្រជែងជាមួយគេ។ និយាយទៅ ក្តីស្រមៃធំបំផុតគឺចង់លើកពានជាមួយក្រុមជម្រើសជាតិកម្ពុជា»។

សឿយ វិសាល បានជាប់ជម្រើសជាតិកម្ពុជាតាំងពីឆ្នាំ២០១៤គឺក្នុងក្រុមអាយុក្រោម២២ឆ្នាំ ក្រុមអាយុក្រោម២៣ឆ្នាំ និងក្រុមលំដាប់ទី១ជម្រើសជាតិកម្ពុជា ប៉ុន្តែក្រុមជម្រើសជាតិកម្ពុជាមិនទាន់ស្គាល់ជាតិពានរង្វាន់អន្តរជាតិទេក្នុងរយៈពេលប្រមាណជិត៥០ឆ្នាំចុងក្រោយ។

លេងឲ្យព្រះខ័នរាជស្វាយរៀងតាំងពីឆ្នាំ២០១៤ សឿយ វិសាល បានជួយក្លិបឈ្នះជើងឯកលីគកំពូលកម្ពុជា១លើក (ឆ្នាំ២០១៩) និងឈ្នះជើងឯកពានរង្វាន់សម្តេចតេជោ៣លើក (ឆ្នាំ២០១៥ ២០១៧ និង២០២៣-២៤) ព្រមជាមួយគ្នានេះក៏ជួយក្លិបទទួលបានចំណាត់ថ្នាក់លេខ២ លីគកំពូលកម្ពុជា៣លើក (២០១៧ ២០២០ ២០២១) និងលេខ២ពានពានរង្វាន់សម្តេចតេជោ៣លើក (២០១៦ ២០១៩ និង២០២១)៕