កីឡា

U16 កម្ពុជា មានឱកាសយកលេខ១ក្នុងពូលថែមទៀតក្នុងពាន AFF-16 ក្រោយស្មើវៀតណាម

បានផុស

១ year មុន

នៅ

ថ្ងៃពុធ ២៦ មិថុនា ២០២៤

ដោយ

ការទទួលបាន១ពិន្ទុពីក្រុមខ្លាំងU16 វៀតណាម សម្រាប់ការប្រកួតសន្សំពិន្ទុកាលពីយប់មិញ ក្រុម U16 កម្ពុជា មិនត្រឹមមានឱកាសប្រជែងយកលេខ២ល្អបំផុតដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រប៉ុណ្ណោះទេ សូម្បីតែលេខ១ក្នុងពូល B ក៏ក្រុមយុវជនកម្ពុជាមានឱកាសដែរ ក្នុងពានរង្វាន់យុវជនអាស៊ានអាយុ១៦ឆ្នាំ (ASEAN U16 Boys’ Championship) ឆ្នាំ២០២៤ នៅប្រទេសឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតយប់ថ្ងៃទី២៥ ខែមិថុនា វៀតណាម បានសម្រុកយ៉ាងខ្លាំង ប៉ុន្តែក្រុមកម្ពុជាបានការពារយ៉ាងល្អនៅវគ្គទី១។ នៅវគ្គទី២ វៀតណាមបានបើកការនាំមុខ ០-១ នៅនាទី៥៧ដោយកីឡាករ Nguen Viet Long ប៉ុន្តែកីឡាករកម្ពុជា ផាន់ វិរៈ បានតែតចូលតាមស្មើ ១-១ នៅនាទី៦២។ លទ្ធផលនេះរក្សារហូតចប់ការប្រកួត បើទោះជាមានឱកាសស៊ុតជាច្រើនលើកដូចគ្នា ហើយចែកគ្នាបាន១ពិន្ទុម្នាក់។

ឆ្លងកាត់២ប្រកួតក្នុងពូល B កម្ពុជា មាន៤ពិន្ទុ ឈរលេខ២ តាមរយៈការឈ្នះលើ មីយ៉ាន់ម៉ា ២-១ និងស្មើ វៀតណាម ១-១ ខណៈ វៀតណាម ឈរលេខ១ក្នុងពូល តាមរយៈការឈ្នះ ព្រុយណេ ១៥-០ និងស្មើ កម្ពុជា ១-១។

ការប្រកួតសន្សំពិន្ទុចុងក្រោយ ក្រុមយុវជនកម្ពុជានឹងធ្វើការមិនធ្ងន់ទេដោយត្រូវប៉ះក្រុមយុវជនព្រុយណេ ដែលកំពុងស្ថិតនៅបាតតារាង ខណៈ វៀតណាម ត្រូវប៉ះ មីយ៉ាន់ម៉ា ដែលកំពុងស្ថិតនៅលេខ៣។

ក្នុងករណីការប្រកួតសន្សំពិន្ទុចុងក្រោយ កម្ពុជាអាចយកឈ្នះ ព្រុយណេ ចាប់ពី១៥គ្រាប់ឡើង ហើយ វៀតណាម ឈ្នះ មីយ៉ាន់ម៉ា ដោយលទ្ធផលតិចគ្រាប់បាល់ ឬស្មើគ្នា នោះកម្ពុជានឹងទទួលបានលេខ១ក្នុងពូល B។ ផ្ទុយទៅវិញ ប្រសិនបើ កម្ពុជា ឈ្នះ ព្រុយណេ ដោយលទ្ធផលគ្រាប់បាល់តិច ហើយវៀតណាម ឈ្នះ មីយ៉ាន់ម៉ា ដោយគ្រាប់បាល់ច្រើន គឺកម្ពុជាត្រូវអ៊ុតមើលក្រុមលេខ២ល្អបំផុតក្នុងពូលដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។

សូមបញ្ជាក់ថា ពានរង្វាន់យុវជនអាយុ១៦ឆ្នាំ ឆ្នាំ២០២៤ មានក្រុមចូលរួមចំនួន១២ ដែលត្រូវបានបែងចែកជា៣ពូល (A B និង C) ក្នុង១ពូលមាន៤ក្រុម។ តាមរូបមន្តនៃការប្រកួត ក្រុមលេខ១ នៃពូលទាំង៣ ឡើងទៅកាន់វគ្គពាក់កណ្តាលផ្តាច់ព្រ័ត្រ ខណៈ១ក្រុមទៀតត្រូវបានជ្រើសរើសជាក្រុមលេខ២ល្អបំផុតក្នុងពូល។

ក្នុងពានរង្វាន់នេះ ក្រុមយុវជនកម្ពុជា និងវៀតណាម ធ្លាប់ជួបគ្នា៧ដង គិតទាំងលើកនេះ ប៉ុន្តែកម្ពុជាមិនធ្លាប់មានប្រវត្តិឈ្នះវៀតណាមឡើយពោលគឺស្មើ២ប្រកួត និងចាញ់៥ប្រកួត។