កីឡា

ជិតមានដំណឹង កម្ពុជា កំពុងទាក់ទងជម្រើសជាតិផ្សេងដើម្បីប្រកួតមិត្តភាពអន្តរជាតិ

បានផុស

៦ ខែ មុន

នៅ

ថ្ងៃពុធ ២៨ មករា ២០២៦

ដោយ

សហព័ន្ធកីឡាបាល់ទាត់កម្ពុជា បានកំពុងព្យាយាមទាក់ទងជាមួយក្រុមបាល់ទាត់ជម្រើសជាតិផ្សេងដើម្បីប្រកួតមិត្តភាពអន្តរជាតិនៅថ្ងៃ FIFA Days នាខែមីនាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគាំទ្រពិតជាទន្ទឹងរង់ចាំដំណឹងនៃការប្រកួតមិត្តភាពអន្តរជាតិសម្រាប់ក្រុមបាល់ទាត់ជម្រើសជាតិកម្ពុជា បន្ទាប់ពីគ្មានការប្រកួតអន្តរជាតិអស់រយៈពេលជាច្រើនខែមកហើយ។ ក្រុមជម្រើសជាតិកម្ពុជាត្រូវការប្រកួតមិត្តភាពអន្តរជាតិដើម្បីកម្តៅសាច់ដុំមុនពេលព្រឹត្តិការណ៍ប្រកួតជើងឯកអាស៊ាន ASEAN Championship ចូលមកដល់។

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានប្រាប់«កម្ពុជាថ្មី» នៅព្រឹកថ្ងៃទី២៨ ខែមករា ឆ្នាំ ២០២៦ថា ៖«យើងកំពុងទាក់ទងរកដៃគូប្រកួតមិត្តភាពអន្តរជាតិហើយ។ ដើមឡើយ យើងបានទាក់ទងចង់ប្រកួតជាមួយក្រុមបាល់ទាត់ជម្រើសជាតិ បង់ក្លាដែស ប៉ុន្តែដោយសារគេជាប់មានកម្មវិធីប្រកួត ដូច្នេះយើងកំពុងទាក់ទងប្រទេសផ្សេងទៀត។ នៅពេលទទួលបានដំណឹងច្បាស់នឹងប្រកាសជូនសាធារណជនឲ្យបានដឹង»។

កាលពីឆ្នាំ ២០២៥ ក្រុមបាល់ទាត់ជម្រើសជាតិកម្ពុជាគ្មានពានរង្វាន់អន្តរជាតិសម្រាប់ការប្រកួតឡើយ បន្ទាប់ពីធ្លាក់ចេញអស់ពីការប្រកួតពានរង្វាន់ទាំងកម្រិតតំបន់ និងពិភពលោក ដូច្នេះមានតែការប្រកួតមិត្តភាពអន្តរជាតិចំនួន ៤ លើកគឺ ចាញ់ វៀតណាម ១-២, ចាញ់ អារូបា ១-២, ចាញ់ តាជីហ្ស៊ីស្ថាន ១-២ និងស្មើ ហុងកុង ១-១។

មុនព្រឹត្តិការណ៍ប្រកួតជើងឯកអាស៊ានឈានចូលមកដល់នាពាក់កណ្តាលឆ្នាំនេះ ក្រុមបាល់ទាត់ជម្រើសជាតិកម្ពុជាទំនងជាមានការប្រកួតមិត្តភាពអន្តរជាតិ ហោចណាស់ពីរបីលើក។ សហព័ន្ធកីឡាបាល់ទាត់កម្ពុជាបានផ្តល់ទំនុកចិត្តដល់លោកគ្រូសញ្ជាតិជប៉ុន Koji Gyotoku ដឹកនាំបន្តទៀតសម្រាប់ឆ្នាំ ២០២៦។

សូមបញ្ជាក់ថា ថ្ងៃ FIFA Days សម្រាប់ ៦ ខែដំបូង នៃឆ្នាំ ២០២៦ គឺលើកទី១ ចាប់ពីថ្ងៃទី២៣ ដល់ទី៣១ ខែមីនា និងលើកទី២ ពីថ្ងៃទី១ ដល់ទី៩ ខែមិថុនា ដែលជាទូទៅមាន ២ ប្រកួតសម្រាប់ក្រុមជម្រើសជាតិនីមួយៗ៕