លើកទី១ ក្នុង៥០ឆ្នាំចុងក្រោយ Man Utd ចាប់ផ្ដើមរដូវកាលអន់បំផុត

ក្លិបបិសាចក្រហម Manchester United ធ្វើមិនបានល្អទេក្នុងរដូវកាលនេះ ក្រោយចាប់ផ្ដើមការប្រកួត៧លើកដំបូងក្នុង​លីគកំពូលអង់គ្លេស ពួកគេស៊ុតបញ្ចូលទីបាន៥គ្រាប់​ និង​រក​បាន​​៨ពិន្ទុ​ប៉ុណ្ណោះ។

ចំពោះការស៊ុតបញ្ចូលទី៥គ្រាប់ក្នុងការប្រកួត៧លើកដំបូងគឺជាការចាប់ផ្តើមដ៏អាក្រក់បំផុតរបស់ក្លិប Manchester United ចាប់តាំងពីរដូវកាលឆ្នាំ ១៩៧៣-៧៤ ក្នុងក្របខណ្ឌ Premier League ហើយនោះក៏ជាពេលវេលាចុងក្រោយដែលពួកគេបានធ្លាក់ទៅលីគទី២។ Man Utd ជាក្រុមដំបូងគេដែលមិនអាចរកគ្រាប់បាល់ស៊ុតបញ្ចូលទីទល់នឹងក្លិប Aston Villa នៅរដូវកាលនេះ ក្រោយបញ្ចប់ក្នុងលទ្ធផលស្មើ ០-០ កាលពីថ្ងៃអាទិត្យ។

លើកចុងក្រោយ​ដែល ក្លិប Man Utd ស៊ុតបញ្ចូលទីបានតិចជាង៥គ្រាប់ ក្នុងការប្រកួត៧លើកគឺនៅក្នុងរដូវកាល ១៩៧២-៧៣ ក្រោយ​ប្រកួត​បាន​៧​ប្រកួត​ស្មើ​៤ ចាញ់​៣ ស៊ុត​បាន​៤​គ្រាប់ និង​របូតវិញ៩​គ្រាប់ ហើយបញ្ចប់ក្នុងចំណាត់ថ្នាក់លេខ១៨ក្នុងតារាងពិន្ទុ។ រដូវកាលបន្ទាប់ ពួកគេ​រក​បាន​៦គ្រាប់ក្នុង៧ប្រកួតដំបូង ហើយបានបញ្ចប់ក្នុងចំណាត់ថ្នាក់លេខ២១ ត្រូវបានកាត់ទៅលីគទី២។

ចំពោះលទ្ធផលចាប់ផ្ដើមការប្រកួតបើករដូវកាលដំបូងមិនល្អបែបនេះមិនមានតែលោក Ten Hag ទេ ខណៈ​​រដូវកាលឆ្នាំ ១៩៨៩-៩០ ក្រោមការដឹកនាំរបស់លោក Sir Alex Ferguson ក្រុម Man Utd រកបានតែ៧ពិន្ទុប៉ុណ្ណោះ ក្នុងការប្រកួត៧លើកដំបូង និងបានបញ្ចប់រដូវកាលក្នុងចំណាត់ថ្នាក់លេខ១៣។

បច្ចុប្បន្នក្រុម Man Utd ក្រោមការដឹកនាំរបស់លោក Erik Ten Hag កំពុងឈរនៅលេខរៀងទី១៤ ដោយមាន៨ពិន្ទុ ខិតទៅជិតតំបន់កាត់ចោល ស្របពេលក្លិបធំៗផ្សេងទៀតដូចជា Liverpool, Chelsea, Man City, Arsenal និង Tottenham សុទ្ធតែស្ថិតក្នុងលំដាប់កំពូលទាំង៧៕

ប្រែសម្រួល៖ ផា រតនា