Ronaldo យករូប​ភាពស៊ុតបញ្ចូលទីលើ Man Utd មករចនាម៉ូដនាឡិកា​ថ្មី

កំពូល​តារា​បាល់ទាត់ Cristiano Ronaldo បាន​ជ្រើសរើស​រូបភាព​នៃ​ការ​ស៊ុត​បាល់​បញ្ចូល​ទី​ដ៏​ល្បីល្បាញ​របស់​ខ្លួន​​ទល់​នឹង​​ក្លិប Manchester United ដើម្បី​បង្ហាញ​ក្នុង​​នាឡិកា​ប្រណីត​ដែល​ទើប​នឹង​ចេញ​ថ្មី។

កីឡាករ Ronaldo និងក្រុមហ៊ុនផលិតនាឡិកាអាមេរិក Jacob & Co បានបង្ហាញ​នាឡិកាថ្មីចំនួន២ម៉ូដែលដែលមានឈ្មោះថា «Flight of CR7» និង «Heart of CR7»។ ម៉ូដែល​ Flight of CR7 ត្រូវបានបំផុសគំនិតដោយការតែតបញ្ចូលទីដ៏គួរឲ្យចងចាំរបស់ Ronaldo នៅ​ក្លិប​យក្ស​អេស្ប៉ាញ Real Madrid ទល់នឹងក្រុម Manchester United ក្នុង​ក្របខ័ណ្ឌ Champions League វគ្គ១៦ក្រុមចុងក្រោយ កាល​ពី​ឆ្នាំ​២០១៣ ។ នៅខាង​ក្រោយ​នាឡិកា​មាន​រូប​សញ្ញា​អបអរ​ “siuuu” ​ពណ៌​មាស។ ចំពោះម៉ូដែល Heart of CR7 បានភ្ជាប់ជាមួយរូបភាពនៃ​ការអបអរសាទរគ្រាប់បាល់ដ៏ល្បីរបស់ Ronaldo។

នាឡិកាទាំងពីរនេះមានបំពាក់គ្រីស្តាល់ត្បូងកណ្តៀងជាមួយអក្សរ CR7 និងហត្ថលេខារបស់កីឡាករ Cristiano Ronaldo។ ចំពោះតម្លៃវិញនាឡិកា Heart of CR7 មានតម្លៃ ២៥,០០០ដុល្លារ ខណៈ Flight of CR7 មានតម្លៃរហូតដល់ ៥៨,០០០ដុល្លារ។

Ronaldo បាន​ចែករំលែក​នៅលើ Instagram ថា ៖«ខ្ញុំ​តែងតែ​សុបិន​ចង់​មាន​ម៉ូដនាឡិកា​ផ្ទាល់ខ្លួន​។ Flight of CR7 និង Heart of CR7 ទទួលបាន​ការបំផុសគំនិត​ពី​ពេលវេលា​ដ៏​អស្ចារ្យ​បំផុត​របស់ខ្ញុំ​នៅលើ​ទីលាន។ ខ្ញុំ​សង្ឃឹម​ថា​អ្នក​ស្រឡាញ់​នាឡិកានេះដូច​​ខ្ញុំស្រឡាញ់វាដែរ»។

កីឡាករ Ronaldo លេងឲ្យក្លិប Manchester United ពីឆ្នាំ២០០៣ ដល់ឆ្នាំ២០០៩ បានឈ្នះពានរង្វាន់ Champions League ១លើក និងពានរង្វាន់ Premier League ៣លើក មុនពេលផ្លាស់ទៅ Real Madrid នៅឆ្នាំ២០០៩៕

ប្រែសម្រួល៖ ផា រតនា