កីឡា

ក្រសួងអប់រំ ណែនាំ៣ចំណុចឲ្យ សហព័ន្ធគុនខ្មែរបោះឆ្នោតជ្រើសរើសប្រធានថ្មី

បានផុស

២ ខែ មុន

នៅ

ថ្ងៃអង្គារ ២១ មករា ២០២៥

ដោយ

ក្រសួងអប់រំ យុវជន និងកីឡាបានចេញគោលការណ៍ណែនាំ៣ចំណុចដល់សហព័ន្ធកីឡាប្រដាល់គុនខ្មែរសម្រាប់ការរៀបចំបោះឆ្នោតជ្រើសរើសប្រធាន និងគណៈកម្មការប្រតិបត្តិអាណត្តិទី៨។

ប្រធាន និងគណៈកម្មការប្រតិបត្តិ អាណត្តិទី៧ (២០២១-២០២៥) នឹងបញ្ចប់នាពេលដ៏ខ្លីខាងមុខនេះ ហើយត្រូវជ្រើសរើសប្រធាន និងគណៈកម្មការប្រតិត្តិថ្មី អាណត្តិទី៨ (២០២៥-២០២៩) តាមរយៈការបោះឆ្នោត។ សម្រាប់ការជ្រើសរើសសមាសភាពដឹកនាំអាណត្តិថ្មីនេះហាក់ដូចជាទទួលបានការចាប់អារម្មណ៍ខ្លាំងមែនទែនពីសាធារណជនដែលខុសប្លែកទៅនឹងអាណត្តិមុនៗស្ងប់ស្ងាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ន លោក ខូវ ឆាយ ជាប្រធានសហព័ន្ធគុនខ្មែរដែលបានដឹកនាំត្រឹមតែជាងមួយឆ្នាំចុងក្រោយនៃអាណត្តិទី៧ បន្តពីលោក តែម ម៉ឺន ដែលបានលាឈប់។ ដូច្នេះលោក ខូវ ឆាយ មិនមែនទទួលបានតួនាទីជាប្រធានតាមរយៈការបោះឆ្នោតឡើយ ប៉ុន្តែតាមរយៈការតែងតាំងពីថ្នាក់លើ។

សហព័ន្ធកីឡាប្រដាល់ខ្មែរស្ម័គ្រចិត្តត្រូវបានបង្កើតឡើងជាផ្លូវការនៅឆ្នាំ១៩៩៦ រហូតដល់ពេលនេះមានរយៈពេល២៨ឆ្នាំ។ សហព័ន្ធនេះគ្រប់គ្រងលើកីឡាប្រដាល់សកល និងកីឡាគុនខ្មែរ ប៉ុន្តែក្រោយមកក៏បំបែកជាសហព័ន្ធកីឡាប្រដាល់គុនខ្មែរ សហព័ន្ធកីឡាប្រដាល់សកលកម្ពុជា និងសហព័ន្ធកីឡាឃីកបុកស៊ីងកម្ពុជា។

គិតចាប់តាំងពីឆ្នាំ១៩៩៦រហូតដល់ឆ្នាំ២០២៥ មានបុគ្គល៤រូបបានកាន់តួនាទីជាប្រធាន។ ជាទូទៅ១អាណត្តិមានរយៈពេល៤ឆ្នាំ។ លោកព្រឹទ្ធាចារ្យ ព្រំ ភិច បានធ្វើជាប្រធានអាណត្តិទី១ ពីឆ្នាំ១៩៩៦ ដល់ឆ្នាំ២០០០។

ឧកញ៉ា អ៊ុំ យូរ៉ាន់ បានធ្វើជាប្រធាន២អាណត្តិគឺពីឆ្នាំ២០០០ ដល់ឆ្នាំ២០០៨។ ក្រោយមក លោក តែម ម៉ឺន បានធ្វើជាប្រធាន៤អាណត្តិគឺពីឆ្នាំ២០០៨ ដល់ឆ្នាំ២០២៤។ លោកបានកាន់តួនាទីជាប្រធានសហព័ន្ធកីឡាប្រដាល់គុនខ្មែរយូរជាងគេបំផុតគិតត្រឹមឆ្នាំ២០២៤។

លោក តែម ម៉ឺន បានលាឈប់ពីប្រធាននៅចុងខែមីនា ឆ្នាំ២០២៤ ក្នុងពេលអាណត្តិទី៧មិនទាន់ចប់ និងបានតែងតាំងលោក ខូវ ឆាយ ធ្វើជាប្រធាននៅថ្ងៃទី២៩ ខែមីនា ដើម្បីបន្តដឹកនាំរហូតចប់អាណត្តិទី៧ (២០២១-២០២៥)។ ក្នុងចំណោមប្រធាន៤រូប លោក ខូវ ឆាយ ជាប្រធានវ័យក្មេងជាងគេបំផុត៕