អស់ទាស់! Messi ស៊ុតវ៉ូលេមួយជើងឆ្វេងល្អដូចផ្កា ជួយឱ្យ Miami តាមស្មើ Toronto ១-១ (វីដេអូ)

នាព្រឹកថ្ងៃទី ០៧ ខែ មេសា នេះ (ម៉ោងនៅកម្ពុជា) ក្រុម Inter Miami បានបើកទ្វារ​កីឡដ្ឋាន Chase Stadium ទទួលស្វាគមន៍ក្រុមភ្ញៀវ Toronto នៅក្នុងការប្រកួតពានរង្វាន់ Major League Soccer របស់ សហរដ្ឋអាមេរិក។

ឆ្លងកាត់ការប្រកួត ៩០ នាទីពេញ គឺពិតជាស្វិតស្វាញមែនទែន ដោយក្រុមទាំង ២ បានត្រឹមចែកគ្នាម្នាក់ ១ ពិន្ទុប៉ុណ្ណោះ បន្ទាប់ពីស្មើគ្នាក្នុងលទ្ធផល ១ ទល់នឹង ១។ ក្រុម Toronto ជាអ្នករកគ្រាប់បាល់នាំមុខមុន ដែលស៊ុតបញ្ចូលទីដោយកីឡាករ Federico Bernardeschi នៅនាទីទី ៤៥+២។ លុះរំលងបានតែ ៣ នាទី​ប៉ុណ្ណោះ Lionel Messi ក៏បានស៊ុតបញ្ចូលទី ១ គ្រាប់ឱ្យ Miami តាមស្មើមកវិញ នៅនាទីទី ៤៥+៥។

សូមបញ្ជាក់ថា Miami បច្ចុប្បន្នកំពុងឈរនៅលេខរៀងទី ២ ក្នុងតារាងចំណាត់ថ្នាក់ប្រចាំតំបន់ខាងកើតនៃពាន MLS ក្រោយឆ្លងកាត់ ៦ ប្រកួត។ ពួកគេឈ្នះ ៤ និងស្មើ ២ មាន ១៤ ពិន្ទុ។ ចំណែកក្រុម Toronto វិញ កំពុងឈរនៅលេខរៀងទី ១៥ ក្នុងតារាងចំណាត់ថ្នាក់ ក្រោយឆ្លងកាត់ ៧ ប្រកួត ពួកគេស្មើ ៣ និងចាញ់ ៤ ប្រកួត មាន ៣ ពិន្ទុ។

សូមទស្សនាវីដេអូហាយឡាយខាងក្រោម៖

អត្ថបទ៖ សេម កុសល