កីឡា

អស្ចារ្យណាស់! ក្លិបអាស៊ាន២ឡើងវគ្គផ្តាច់ព្រ័ត្រ ពានរង្វាន់អាស៊ីក្នុងឆ្នាំតែមួយ

បានផុស

១ year មុន

នៅ

ថ្ងៃសុក្រ ១៨ មេសា ២០២៥

ដោយ

ក្រុម Lion City Sailors របស់ប្រទេសសិង្ហបុរី និង ក្រុមព្រះខ័នរាជស្វាយរៀង របស់ប្រទេសកម្ពុជា ដែលទាំងពីរជាក្រុមនៅតំបន់អាស៊ានបានឡើងវគ្គផ្តាច់ព្រ័ត្រ និងទទួលបានធ្វើម្ចាស់ផ្ទះដូចគ្នាសម្រាប់ពានរង្វាន់ក្លិបអាស៊ីកម្រិតទី២ និងកម្រិតទី៣ ក្នុងរដូវកាល២០២៤-២៥។ កន្លងមកពុំធ្លាប់មានក្លិបអាស៊ានពីរបានឡើងដល់វគ្គផ្តាច់ព្រ័ត្រសម្រាប់ពានរង្វាន់២ផ្សេងគ្នាក្នុងឆ្នាំតែមួយទេ។

ពាន AFC Champions League Two

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់ក្លិបអាស៊ីលំដាប់ទី២ AFC Champions League Two ធ្លាប់បានរៀបចំការប្រកួតវគ្គផ្តាច់ព្រ័ត្រនៅតំបន់អាស៊ាន២លើកគឺ ឆ្នាំ២០១៩ និង២០២២ នៅប្រទេសម៉ាឡេស៊ី។ រដូវកាល២០២៤-២៥ វគ្គផ្តាច់ព្រ័ត្រនៅប្រទេសសិង្ហបុរី។

ឆ្នាំ២០១៩ វគ្គផ្តាច់ព្រ័ត្រ នៅម៉ាឡេស៊ី ក្រុមលីបង់ Al-Ahed ឈ្នះជើងឯក
ឆ្នាំ២០២២ វគ្គផ្តាច់ព្រ័ត្រ នៅម៉ាឡេស៊ី ក្រុមអូម៉ង់ Al-Seeb ឈ្នះជើងឯក
ឆ្នាំ២០២៤-២៥ វគ្គផ្តាច់ព្រ័ត្រ នៅសិង្ហបុរី

ក្រុម Lion City Sailors បានបង្កើតប្រវត្តិសាស្ត្រជាលើកដំបូងក្នុងការឡើងដល់វគ្គផ្តាច់ព្រ័ត្រ ពានរង្វាន់ក្លិបអាស៊ីលំដាប់ទី២ បន្ទាប់ពីឈ្នះក្រុមអូស្ត្រាលី Sydney FC ដោយលទ្ធផល ទាំងពីរជើង ២-១ (ជើងទី១ឈ្នះ ២-០ និងជើងទី២ចាញ់ ០-១)។

វគ្គផ្តាច់ព្រ័ត្រ Lion City Sailors ជួបក្រុមអារ៉ាប់រួម Sharjah នៅកីឡដ្ឋាន Jalan Besar ថ្ងៃទី១៨ ខែឧសភា ឆ្នាំ២០២៥ នៅប្រទេសសិង្ហបុរី។

ពាន AFC Challenge League

ពានរង្វាន់ក្លិបអាស៊ីលំដាប់ទី៣ ធ្លាប់ត្រូវបានរៀបចំការប្រកួតវគ្គផ្តាច់ព្រ័ត្រនៅតំបន់អាស៊ាន៣ដងគឺ ឆ្នាំ២០០៦ និង២០១៣ នៅប្រទេសម៉ាឡេស៊ី ហើយឆ្នាំ២០១០ នៅប្រទេសមីយ៉ាន់ម៉ា។ រដូវកាល២០២៤-២៥ វគ្គផ្តាច់ព្រ័ត្រ នៅកម្ពុជា។

ឆ្នាំ២០០៦ វគ្គផ្តាច់ព្រ័ត្រ នៅម៉ាឡេស៊ី ក្រុមគីជីស្ថាន Dordoi Dynamo ឈ្នះជើងឯក
ឆ្នាំ២០១០ វគ្គផ្តាច់ព្រ័ត្រ នៅមីយ៉ាន់ម៉ា ក្រុមមីយ៉ាន់ម៉ា Yadanarbon ឈ្នះជើងឯក
ឆ្នាំ២០១៣ វគ្គផ្តាច់ព្រ័ត្រ នៅម៉ាឡេស៊ី ក្រុមតួកមេនីស្ថាន Balkan ឈ្នះជើងឯក
ឆ្នាំ២០២៤-២៥ វគ្គផ្តាច់ព្រ័ត្រ នៅប្រទេសកម្ពុជា

ក្រុម ព្រះខ័នរាជស្វាយរៀង របស់ប្រទេសកម្ពុជា បានបង្កើតប្រវត្តិសាស្ត្រជាលើកដំបូងក្នុងការឡើងដល់វគ្គផ្តាច់ព្រ័ត្រ ពានរង្វាន់ក្លិបអាស៊ីលំដាប់ទី៣ បន្ទាប់ពីឈ្នះក្រុមឥណ្ឌូណេស៊ី Madura United ដោយលទ្ធផល ទាំងពីរជើង ៦-៣ (ជើងទី១ឈ្នះ ៣-០ និងជើងទី២ស្មើគ្នា ៣-៣ )។