ច្បាស់ហើយ! ពេជ្រ សម្បត្តិ ជាអ្នកត្រូវទទួលជើងខ្លាំងអេស្ប៉ាញ Mario Alvarez នៅទឹកដីកម្ពុជា

ជាដំណឹងផ្លូវការ គឺកីឡាករ ពេជ្រ សម្បត្តិ របស់កម្ពុជា នឹងត្រូវជួបគ្នាជាមួយជើងខ្លាំង អេស្ប៉ាញ Mario Alvarez នៅកោះពេជ្រ នាថ្ងៃ ពុធ ទី ១៤ ខែ ឧសភា ឆ្នាំ ២០២៥ ដែលនឹងផ្សាយផ្ទាល់លេីកញ្ចក់ទូរទស្សន៍ BTV News និងផេក BTV News ។

នៅក្នុងកម្មវិធីនោះផងដែរ គឺប្រជុំដោយជើងខ្លាំងគុនខ្មែរ ៤ នាក់ នឹងត្រូវជួបតទល់គ្នាជាមួយជើងខ្លាំងឆ្លងទ្វីបមកពី អេស្ប៉ាញ ៤ នាក់។ ក្នុងនោះក្រៅអំពីគូ ពេជ្រ សម្បត្តិ ជួបជាមួយ Alvarez គឺមាន ៣ គូទៀតដូចជា សំអឿន សុផា ត្រូវជួបជាមួយកីឡាករ វិចទ័រ កូនេសា, ស្តេចតុកែធន់ វណ្ណា ត្រូវជួបជាមួយ ម៉ាទីន សាន់ដ្រូ និង រិទ្ធី សុវណ្ណឃីម ត្រូវជួបជាមួយកីឡាករ ហ្គូនហ្សាឡូ ថេបារ។

យ៉ាងណា ក្នុងចំណោមគូប្រកួតទាំង ៤ ខាងលើ គឺគូ ពេជ្រ សម្បត្តិ និង Mario Alvarez ត្រូវបានគេចាត់ទុកគូប្រកួតដ៏គួរឱ្យចាប់អារម្មណ៍បំផុត ដោយសារ​កីឡាករ អេស្ប៉ាញ ធ្លាប់បានផ្តួលជើងខ្លាំងគីឡូ ៦០ របស់គុនខ្មែរ ២ រូបរួចមកហើយ​ដូចជា ឈុត សេរីវ៉ាន់ថង និង ឃីម បូរ៉ា ខណៈឥឡូវនេះរូបគេត្រូវជួប សម្បត្តិ ដែលជាកីឡាករកំពុងឡើងកូដរបស់កម្ពុជា។ ដូច្នេះហើយទើបអ្នកគាំទ្ររំពឹងថា ការប្រកួតនេះនឹងក្លាយជាការប្រកួតដ៏ជក់ចិត្ត និងមិនអាចរំលងបាន៕

អត្ថបទ៖ សេម កុសល