កីឡា

លោក Pep Muñoz បង្ហើបពីអនាគតមិនច្បាស់ ខណៈកុងត្រាក្លិបនៅចិនត្រឹមខែធ្នូ

បានផុស

១០ ខែ មុន

នៅ

ថ្ងៃពុធ ១៧ កញ្ញា ២០២៥

ដោយ

លោក Pep Muñoz អតីតគ្រូបង្វឹកព្រះខ័នរាជស្វាយរៀង បានបង្ហើបឲ្យដឹងពីអនាគតរបស់លោកក្នុងការដឹកនាំក្លិបនៅប្រទេសចិនមិនច្បាស់ឡើយ ដោយសារត្រូវតស៊ូដើម្បីបន្តឈរនៅលីគកំពូលចិនទៀត ហើយកុងត្រារបស់លោកត្រឹមខែធ្នូ ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pep Muñoz ដែលបានចាកចេញពីក្លិប ព្រះខ័នរាជស្វាយរៀង ទៅដឹកនាំក្លិប Shenzhen Peng City ក្រោយចប់លីគកម្ពុជារដូវកាលមុន បានប្រាប់សារព័ត៌មាន«កម្ពុជាថ្មី»ថា ៖«ខ្ញុំមិនទាន់ដឹងច្បាស់ពីអនាគតយ៉ាងណានោះទេ ពីព្រោះខ្ញុំបានចុះកុងត្រាជាមួយក្លិបត្រឹមបំណាច់ខែធ្នូ ចុងឆ្នាំនេះ។ អ្វីៗក៏អាចកើតឡើងបានដែរនៅពេលនេះ។ ខ្ញុំស្រឡាញ់កម្ពុជា ហើយឆាប់ៗខាងមុខ ខ្ញុំនឹងទៅលេងមិត្តភក្តិនៅកម្ពុជា។ សម្រាប់ថ្ងៃអនាគត គ្មាននរណាដឹងទេ»។

ស្របពេលកុងត្រាត្រឹមខែធ្នូ ឆ្នាំ ២០២៥ លោក Pep Muñoz ត្រូវដឹកនាំធ្វើយ៉ាងណាគេចឲ្យផុតពីតំបន់កាត់ចេញ ដើម្បីរក្សាខ្លួននៅលីគកំពូលចិនបន្តទៀត។ លោកបានលើកឡើងថា ការទៅដឹកនាំក្លិបនៅប្រទេសចិនគឺជាបទពិសោធដ៏ល្អមួយ កម្រិតលីគល្អ ប៉ុន្តែក្លិបនេះ Shenzhen កំពុងប្រយុទ្ធដើម្បីបន្តរក្សាខ្លួននៅលីគកំពូលចិនទៀត ខណៈនៅសល់តែ ៧ ប្រកួតទៀតប៉ុណ្ណោះចប់រដូវកាល ហើយក្លិបស្ថិតនៅលើតំបន់កាត់ចេញត្រឹមតែ ៤ ពិន្ទុ។

ស្របពេលជាមួយគ្នានេះ បុរសសញ្ជាតិអេស្ប៉ាញនៅតែបន្តតាមដានកីឡាបាល់ទាត់នៅកម្ពុជា បើទោះបីជាលោកមានភារកិច្ចធំក្នុងការដឹកនាំក្លិបនៅប្រទេសចិនក៏ដោយ។

លោកបាននិយាយថា ៖«ខ្ញុំតាមដានការប្រកួតលីគកម្ពុជារាល់ចុងសប្តាហ៍។ សូម្បីតែការប្រកួតក្រុមជម្រើសជាតិ U23 និងកីឡាករក្មេងៗក៏ខ្ញុំតាមដានដែរ។ ខ្ញុំសង្ឃឹមថា ក្រុមបាល់ទាត់ជម្រើសជាតិកម្ពុជា នឹងទទួលបានលទ្ធផល និងជោគជ័យឆាប់»។

លោកបានបន្ថែមថា លោកនៅតែមានការទំនាក់ទំនងជាមួយក្លិប ព្រះខ័នរាជស្វាយរៀង និងជូនពរពួកគេឲ្យទទួលបានជោគជ័យនៅរដូវកាលនេះទៀត។ ពួកគេបានចាប់ផ្តើមរដូវកាលថ្មីយ៉ាងល្អ ហើយសង្ឃឹមថា ពួកគេបន្តធ្វើបានល្អបែបនេះទៀត និងបង្ហាញកម្រិតគុណភាពលើឆាកអន្តរជាតិគឺពាន AFC និង Shopee Cup។

សូមបញ្ជាក់ថា បច្ចុប្បន្ន Pep Muñoz កំពុងដឹកនាំក្លិប Shenzhen នៅក្នុងលីគបាល់ទាត់កំពូលចិន។ លោកជាគ្រូបង្វឹកដ៏ជោគជ័យម្នាក់ជាមួយក្លិប ព្រះខ័នរាជស្វាយរៀង ដែលបានឈ្នះជើងឯកលីគបាល់ទាត់កំពូលកម្ពុជា ២ លើក ពានរង្វាន់សម្តេចតេជោ ហ៊ុន សែន ១ លើក និងជើងឯករងពានរង្វាន់ AFC Challenge League៕