ទីបំផុត ឡូហ្គោថ្មីរបស់ Twitter ដំណើរការឲ្យប្រើប្រាស់ជាផ្លូវការហើយ រួមទាំង កម្ពុជា ផងដែរ

នៅទីបំផុត អ្វីគ្រប់យ៉ាងរបស់និមិត្តសញ្ញា Twitter គឺរូបបក្សីខៀវ ត្រូវបានផ្លាស់ប្តូរទៅជា អក្សរ X ទាំងអស់​ជាផ្លូវការហើយ រួមទាំងនៅលើវេបសាយ និងលើ App ទូរស័ព្ទផងដែរ ជាពិសេសផ្ទាំងឡូហ្គោអក្សរ X យ៉ាងធំនៅទីស្នាក់ការកណ្តាលក្នុងរដ្ឋ San Francisco ។

បច្ចុប្បន្នអ្នកប្រើប្រាស់ Twitter ទាំងអស់នៅលើពិភពលោក រួមទាំងកម្ពុជាផងដែរនោះ នឹងឃើញឡូហ្គោថ្មីគឺអក្សរ X ស្របពេលដែលមហាសេដ្ឋី Elon Musk ក៏បានលើកផ្ទាំងឡូហ្គោថ្មីនេះយ៉ាងធំផងដែរនៅទីស្នាក់កណ្តាល​ក្នុងរដ្ឋ San Francisco ។ មិនត្រឹមតែប៉ុណ្ណោះ វេបសាយរបស់ក្រុមហ៊ុនក៏ត្រូវបានផ្លាស់ប្តូរទៅជា X.com ដូចគ្នា ​។

ចំពោះការផ្លាស់ប្តូរនិមិត្តិសញ្ញានេះ លោកមហាសេដ្ឋីលេខ ១ លើពិភពលោក បានបង្ហាញឲ្យដឹងតាំងតែពីថ្ងៃសៅរ៍ ទី២៤ សប្តាហ៍មុនមកម្ល៉េះ ហើយចំពោះការផ្លាស់ប្តូរដ៏ធំនេះ អ្នកវិភាគជំនាញយល់ថា ជាការកសាងទំនុកចិត្តពីអតិថិជនផ្សព្វផ្សាយពាណិជ្ជកម្មឡើងវិញ បន្ទាប់ពីបាត់បង់ចំណូលអស់ជាច្រើនពីការផ្សាយពាណិជ្ជកម្ម ។ ​

សូមបញ្ជាក់ថា មហាសេដ្ឋី Elon Musk បានទិញបណ្ដាញសង្គម Twitter ជាផ្លូវការក្នុងតម្លៃ ៤៤ ពាន់លានដុល្លារ កាលពីចុងឆ្នាំមុន ហើយបានបញ្ឈប់នាយកប្រតិបត្តិ និងបុគ្គលិកអស់ជាច្រើននាក់ ខណៈលោកក៏ធ្វើការផ្លាស់ប្ដូររចនាសម្ព័ន្ធជាច្រើនផងដែរ ជាពិសេសឡូហ្គោថ្មីនេះតែម្ដង ៕

ប្រែសម្រួល៖ នាង រតនៈ

ប្រភព៖ CNBC