មន្ត្រីសាលាឃុំអង្កោល បើករថយន្ដក្រឡាប់ស្លាប់​ខ្លួនឯងនៅផ្លូវធ្វើថ្មីជាប់មាត់សមុទ្រ

លោក ពោញ សំបូរ ជាមន្ត្រីសាលឃុំអង្កោល សង្កាត់កែប ក្រុងកែប បានបើករថយន្ដក្រឡាប់បុកបង្កាន់ដៃស្ពានបណ្ដាល​ឲ្យស្លាប់ខ្លួនឯងភ្លាមៗ។ ករណីក្រឡាប់រថយន្ដនេះ បានកើតឡើងកាលពីវេលាម៉ោង៩និង៤០នាទី យប់ថ្ងៃទី២៦ ខែមីនា ឆ្នាំ២០២៣ នៅចំណុចស្ពានព្រែកកែប ស្ថិតនៅភូមិកែប សង្កាត់កែប ក្រុងកែប ខេត្តកែប ។

បើតាមរបាយការណ៍របស់ស្នងការនគរបាលខេត្តកែប បានឲ្យដឹងថា ជនរងគ្រោះឈ្មោះ ពោញ សំបូរ ភេទប្រុស អាយុ៤២ឆ្នាំ មុខរបរជាមន្ត្រីសាលាឃុំអង្កោល រស់នៅភូមិទួលសាងាំ ឃុំអង្កោល ស្រុកដំណាក់ចង្អើរ ខេត្តកែប។ បើករថយន្ដម៉ាក camry បាឡែន ពណ៌ ស ពាក់ផ្លាកលេខ កែប ២B.០០៩៩។

របាយការណ៍បញ្ជាក់ថា ជនរងគ្រោះបើករថយន្ដលើបណ្ដោយផ្លូវថ្មីប្របមាត់សមុទ្រពីកែបទៅឆ្នេរអង្កោល ពេលបើកមកដល់ចំណុចកើតហេតុ ក៏ក្រឡាប់បុកបង្កាន់ដៃស្ពានស្លាប់ខ្លួនឯងតែម្ដង។ ក្រោយពេលកើតហេតុសពជនរងគ្រោះត្រូវបានរថយន្តរបស់មន្ទីរពេទ្យបង្អែកខេត្តកែប ដឹកយកទៅប្រគល់ជូនក្រុមគ្រួសារធ្វើបុណ្យតាមប្រពៃណី ចំណែករថយន្តសមត្ថកិច្ចបានប្រគល់ជូនក្រុមគ្រួសារយកទៅជួសជុលប្រើប្រាស់វិញ៕

អត្ថបទ៖ សុខុម