ចរាចរណ៍

ស្ត្រីម្នាក់ ជិះម៉ូតូសុខៗ ត្រូវរថយន្តដឹកថ្មបុករួចកិនស្លាប់យ៉ាងអាណោចអាធ័ម

បានផុស

២ years មុន

នៅ

ថ្ងៃចន្ទ ៦ មករា ២០២៥

ដោយ

រថយន្តដឹកដី ១ គ្រឿង បើកលឿនបុកម៉ូតូរួចកិនស្ត្រីម្នាក់សំប៉ែតស្លាប់ ហើយក៏បង្កឲ្យរថយន្តដឹកប្រេងឥន្ធនៈ ១ គ្រឿងទៀត ដែលកំពុងបើកពីក្រោយ បួងចង្កូតគេចទៅបុកទ្រព្យសម្បត្តិសាធារណៈអស់មួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១១ និង ២០ នាទីព្រឹក ថ្ងៃទី ៥ ខែមករា ឆ្នាំ ២០២៥ នៅត្រង់ចំណុចទល់មុខសាលាកូរ៉េ តាមបណ្ដោយផ្លូវទំនប់កប់ស្រូវ ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានឲ្យដឹងថា គេឃើញស្ត្រីម្នាក់ ជិះម៉ូតូ ១ គ្រឿង ម៉ាកសង់ឌ្រីម ឆ្នាំ ២០១៦ ពណ៌ខ្មៅ បើកបរតាមបណ្ដោយផ្លូវទំនប់កប់ស្រូវ ខណៈមកដល់ចំណុចកើតហេតុ ស្រាប់តែមានរថយន្តដឹកថ្ម ១ គ្រឿង ម៉ាកហ៊ីយ៉ាន់ដាយ ពាក់ស្លាកលេខ ព្រះសីហនុ 3A-8328 ធ្វើដំណើរទិសដៅស្របគ្នា។ ស្របពេលនោះ មិនដឹងជាអ្នកបើករថយន្តបង្កមានរឿងអ្វីនោះឡើយ បានបុកស្ត្រីជាអ្នកជិះម៉ូតូ រួចកិន បណ្ដាលឲ្យម៉ូតូ និងសពរងគ្រោះសំប៉ែតតែម្ដង។ ភ្លាមៗ នោះ ក៏មានរថយន្តដឹកប្រេងឥន្ធនៈ ១ គ្រឿង ពាក់ស្លាកលេខ ភ្នំពេញ 4A-8001 កំពុងបើកពីក្រោយ បានឃើញស្ថានភាពបែបនោះ ក៏បួងចង្កូតគេច តែជ្រុលបុកទ្រព្យសម្បត្តិសាធារណៈដូចជា បង្គោលស្លាកផ្សាយពាណិជ្ជកម្មចំនួន ១ ដើម និងបង្កឲ្យខូចខាតសួនច្បារមួយចំនួនធំផងដែរ។ ចំណែកបុរសជាអ្នកបើករថយន្តបង្ក បានបើកចេញពីកន្លែងកើតហេតុ ចម្ងាយជាង ១០០ ម៉ែត្រ រួចចុះពីលើរថយន្តគេចខ្លួនបាត់ស្រមោលតែម្ដង។

ក្រោយពេលកើតហេតុ សមត្ថកិច្ចជំនាញ បានចុះមកដល់ រួចវាស់វែងយករថយន្តបង្ក និងម៉ូតូ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយពេលក្រោយ៕

អត្ថបទ ៖ រដ្ឋា