ស្រវឹងស្រាបើករថយន្ដបុកម៉ូតូសណ្ដោងរ៉ឺម៉កពីក្រោយរបួសធ្ងន់ស្រាលជាង១០នាក់

មនុស្សក្មេងចាស់ ប្រុសស្រីជាង១០នាក់ បានរបួសធ្ងន់ស្រាល ក្រោយត្រូវរថយន្តមួយគ្រឿងបើកបរដោយបុរសម្នាក់ក្នុងស្ថានភាពស្រវឹងបុកម៉ូតូសណ្តោងរ៉ឺម៉កពីក្រោយនៅលើស្ពានជ្រោយចង្វារ។

ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២រំលងអធ្រាត្រ ឈានចូលថ្ងៃទី៩ ខែមករា ឆ្នាំ២០២៥ ស្ថិតនៅលើស្ពានជ្រោយចង្វារ ក្នុងមូលដ្ឋានសង្កាត់ស្រះចក ខណ្ឌដូនពេញ រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តម៉ាក​តូយូតាព្រូស ពាក់ស្លាកលេខ ភ្នំពេញ 2BS-5830 បើកបរក្នុងស្ថានភាពស្រវឹងស្រាជោគជាំ ក្នុងល្បឿនលឿនទិសដៅពីលិចទៅកើត បានបើកឆ្លងកាត់ស្ពានជ្រោយចង្វារមិត្តភាពកម្ពុជា-ជប៉ុន។ ប្រភពបានបន្តថា លុះមកដល់ចំណុចកើតហេតុជិតដល់ពាក់កណ្តាលស្ពាន រថយន្តខាងលើក៏បានបុកម៉ូតូសណ្តោងរ៉ឺម៉ក១គ្រឿង ពេញទំហឹង បណ្តាលឲ្យមនុស្សរួមដំណើរមានក្មេងចាស់ ប្រុសស្រីចំនួន១០នាក់ រងរបួសធ្ងន់ស្រាល។ ភ្លាមៗអ្នកបើករថយន្ដបង្កបានព្យាយាមបើករថយន្តរត់គេច តែត្រូវបានប្រជាពលរដ្ឋ និងសមត្ថកិច្ចឃាត់បានយកត្រឡប់មកវិញ។ រីឯជនរងគ្រោះទាំង១០នាក់ ត្រូវបានរថយន្តមន្ទីរពេទ្យកាល់ម៉ែត្រចំនួន២គ្រឿង និងមន្ទីរពេទ្យបង្អែកចតុមុខ១គ្រឿងមកទទួលយកទៅសង្គ្រោះជាបន្តបន្ទាប់ ខណៈក្មេងៗត្រូវបានបន្តយកទៅព្យាបាលនៅមន្ទីរពេទ្យគន្ធបុប្ផា។

ក្រោយកើតហេតុ សមត្ថកិច្ចបានឃាត់ខ្លួនម្ចាស់រថយន្តបង្ក យកទៅធ្វើការសាកសួរនាំ ព្រមទាំងបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយពេលក្រោយ៕

អត្ថបទ៖ រដ្ឋា