ព័ត៌មានអន្ដរជាតិ

លោក Macron នឹងជ្រើសរើសនាយករដ្ឋមន្ត្រីថ្មីក្នុងរយៈពេល៤៨ម៉ោង

បានផុស

៧ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

Chheang

យោងតាមការចុះផ្សាយរបស់ BBC នាថ្ងៃព្រហស្បតិ៍ទី៩ខែតុលាឆ្នាំ២០២៥នេះ ប្រធានាធិបតីបារាំង Emmanuel Macron នឹងជ្រើសរើសនាយករដ្ឋមន្ត្រីថ្មីក្នុងរយៈពេល៤៨ម៉ោងខាងមុខ ដោយការតែងតាំងនេះមានគោលបំណងដើម្បីបញ្ចប់ភាពមិនប្រាកដប្រជានយោបាយជាច្រើនថ្ងៃ បន្ទាប់ពីនាយករដ្ឋមន្ត្រី Sébastien Lecornu បានលាលែងពីតំណែងកាលពីដើមសប្តាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសបារាំងបានជាប់គាំងក្នុងវិបត្តិនយោបាយ ចាប់តាំងពីការបោះឆ្នោតកាលពីខែកក្កដាឆ្នាំ២០២៤ នៅពេលដែលគ្មានគណបក្សណាមួយទទួលបានសំឡេងភាគច្រើនច្បាស់លាស់។ ប្រការនេះបានធ្វើឲ្យមានការលំបាកក្នុងការអនុម័តច្បាប់ និងកញ្ចប់ថវិកាជាតិ។ លោក Lecornu គឺជានាយករដ្ឋមន្ត្រីទី៣ហើយ ដែលលាលែងពីតំណែងក្នុងរយៈពេលតិចជាងមួយឆ្នាំ ដែលបង្ហាញពីការបែកបាក់យ៉ាងខ្លាំងនៅក្នុងសភាបារាំង។

យ៉ាងណាមិញ លោក Macron បានស្នើសុំឲ្យលោក Lecornu បន្តកាន់តំណែងរយៈពេលខ្លីសិន ដើម្បីជួបពិភាក្សាបន្ទាន់ជាមួយគណបក្សនយោបាយនានា។ នៅក្នុងបទសម្ភាសន៍តាមទូរទស្សន៍ លោក Lecornu បាននិយាយថា ប្រទេសនេះនៅតែត្រូវការអនុម័តកញ្ចប់ថវិកាថ្មីមួយ ដែលលោកគ្រោងនឹងបង្ហាញនៅសប្តាហ៍ក្រោយ។ លោកបានជំរុញឲ្យសមាជិកសភាពិភាក្សាយ៉ាងហ្មត់ចត់ ជាជាងបដិសេធភ្លាមៗ។

ប្រទេសបារាំងក៏កំពុងតស៊ូជាមួយនឹងបំណុលជាតិដ៏ធំ ប្រហែល ៣,៤ពាន់ពាន់លានអឺរ៉ូ ឬ ១១៤% នៃ GDP របស់ខ្លួន ដែលជាកម្រិតខ្ពស់បំផុតមួយនៅក្នុងទ្វីបអឺរ៉ុប។

ទន្ទឹមនឹងនេះ លោក Macron កំពុងប្រឈមមុខនឹងសម្ពាធកើនឡើង។ មេដឹកនាំបក្សប្រឆាំងដូចជា លោកស្រី Marine Le Pen និងលោកស្រី Mathilde Panot កំពុងទាមទារឲ្យមានការបោះឆ្នោតថ្មី និងឲ្យលោក Macron លាលែងពីតំណែង។ សូម្បីអតីតសម្ព័ន្ធមិត្តរបស់លោក Macron មួយចំនួនក៏បានចាប់ផ្តើមរិះគន់គាត់ផងដែរ។

ទោះជាយ៉ាងណាក៏ដោយ លោក Lecornu បាននិយាយថា នេះមិនមែនជាពេលវេលាសក្ដិសមនៅឡើយទេដើម្បីរកអ្នកជំនួសលោក Macron។

លោកបានមានប្រសាសន៍ថា៖ «ប្រទេសបារាំងត្រូវការស្ថិរភាព និងអ្នកដឹកនាំដ៏រឹងមាំមួយរូបនៅពេលនេះ»៕

ដោយ៖ ឈាង