មនុស្ស៨នាក់ស្លាប់ និង២នាក់បាត់ខ្លួន ខណៈព្យុះ Fengshen វាយប្រហារហ្វីលីពីន

ព្យុះត្រូពិក Fengshen បានបោកបក់ពាសពេញកោះ Luzon របស់ប្រទេសហ្វីលីពីន កាលពីថ្ងៃអាទិត្យ សម្លាប់មនុស្ស៨នាក់ និងបង្ខំឲ្យមនុស្សរាប់ម៉ឺននាក់ត្រូវជម្លៀសចេញពីផ្ទះសម្បែង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី២០ខែតុលា។

បើតាមប៉ូលិសក្នុងចំណោមជនរងគ្រោះទាំងអស់ មាន៥នាក់ជាគ្រួសារតែមួយ បានស្លាប់ដោយសារតែដើមឈើបាក់រលំលើផ្ទះរបស់ពួកគេ ក្នុងអំឡុងពេលមានព្យុះក្នុងទីក្រុងម៉ានីល។

ភ្នាក់ងារតាមដានអាកាសធាតុរបស់រដ្ឋហ្វីលីពីនបានឱ្យដឹងថា ព្យុះនេះមានកម្លាំងខ្យល់ខ្លាំងរហូតដល់ ៩០ គីឡូម៉ែត្រក្នុងមួយម៉ោង បានធ្វើដំណើរឆ្លងកាត់ភាគអាគ្នេយ៍នៃកោះ Luzon ពេញមួយយប់ ហើយបានបោកបក់លើឈូងសមុទ្រម៉ានីលនៅព្រឹកព្រលឹម។ អាជ្ញាធរបាននិយាយថា យ៉ាងហោចណាស់អ្នកស្រុកចំនួន ៤ម៉ឺន៧ពាន់ បានជម្លៀសទៅជ្រកកោននៅក្នុងជម្រកបណ្ដោះអាសន្នរបស់រដ្ឋាភិបាល ចំពេលមានការព្រមានអំពីបំណាក់ដី និងទឹកជំនន់នៅតាមឆ្នេរសមុទ្រ។

គួរបញ្ជាក់ថាហ្វីលីពីន ដែលរងការវាយប្រហារដោយព្យុះត្រូពិចប្រហែល ២០ ក្នុងមួយឆ្នាំ នៅតែងាយរងគ្រោះខ្លាំងចំពោះគ្រោះមហន្តរាយធម្មជាតិ។ អ្នក​វិទ្យាសាស្ត្រ​បាន​ព្រមាន​ថា ព្យុះ​បែប​នេះ​កំពុង​មាន​ឥទ្ធិពល​ខ្លាំង​ឡើង​ដោយសារ​ការ​ប្រែប្រួល​អាកាសធាតុ។ លើសពីនេះការមកដល់របស់ព្យុះ Fengshen ក៏កើតមាន ស្របពេលប្រទេសហ្វីលីពីនទើបតែឡើងវិញពីការរញ្ជួយដីនាពេលថ្មីៗនេះ ដែលបានសម្លាប់មនុស្សយ៉ាងហោចណាស់ ៨៧ នាក់ក្នុងរយៈពេលបីសប្តាហ៍កន្លងមកនេះ៕

អត្ថបទ៖ ប៊ុន សុភាព