ត្រាំ ប្រាប់នាយករដ្ឋមន្ត្រីថ្មីជប៉ុនថា៖ ចង់បានអ្វី និយាយមក

ចង់បានអ្វីនិយាយប្រាប់មក! នេះគឺជាសម្តីប្រធានាធិបតីអាមេរិក ដូណាល់ ត្រាំ ប្រាប់ទៅនាយករដ្ឋមន្ត្រីស្រ្តីទី១របស់ជប៉ុន សាណៃ តាកាអ៊ិឈិ នៅពេលទៅដល់ទីក្រុងតូក្យូសម្រាប់ដំណើរទស្សនកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ RT នៅថ្ងៃអង្គារទី២៨ខែតុលាឆ្នាំ២០២៥, នៅពេលទៅដល់ទីក្រុងតូក្យូភ្លាម លោកត្រាំ បានសរសើរប្រទេសជប៉ុនមិនដាច់ពីមាត់ ថាជាសម្ព័ន្ធមិត្តដ៏ខ្លាំងក្លាបំផុតរបស់អាមេរិកនិងបង្ហាញទំនុកចិត្តថា ទំនាក់ទំនងទ្វេភាគីនឹងរឹងមាំជាងពេលណាៗទាំងអស់។

ក្នុងអំឡុងពេលនោះដែរ លោក ត្រាំ បានប្រាប់ទៅលោកស្រីតាកាអ៊ិឈិថា៖ «ខ្ញុំចង់ប្រាប់អ្នកឲ្យដឹង នៅពេលអ្នកមានសំណួរ, សង្ស័យ, ការអនុគ្រោះណាមួយដែលអ្នកត្រូវការឬអ្វីក៏ដោយឲ្យតែអ្នកចង់បាន អ្វីក៏ដោយដែលខ្ញុំអាចធ្វើបានដើម្បីជួយប្រទេសជប៉ុន សូមអ្នកនិយាយមក យើងនឹងនៅទីនោះ»។

ដំណើរទស្សនកិច្ចរបស់លោកត្រាំទៅជប៉ុន នាពេលនេះ ត្រូវគេមើលឃើញថា ជាការខិតខំដើម្បីបង្កើនឥទ្ធិពលរបស់អាមេរិកនៅតំបន់ឥណ្ឌូប៉ាស៊ីហ្វិក ដើម្បីប្រឆាំងនឹងចិន។

អ្វីដែលគួរឲ្យចាប់អារម្មណ៍គឺថា ក្នុងដំណើរទស្សនកិច្ចនេះដែរ មេដឹកនាំអាមេរិកនិងជប៉ុន បានចុះហត្ថលេខាលើកិច្ចព្រមព្រៀងសហប្រតិបត្តិការលើរ៉ែកម្រនិងរ៉ែសំខាន់ៗ ក៏ដូចជាការសន្យាធ្វើការឆ្ពោះទៅរក «យុគសម័យមាសថ្មី» នៃសម្ព័ន្ធភាពប្រទេសទាំងពីរ៕

អត្ថបទ៖ សុខ សុវណ្ណ

ចុចអាន៖ ត្រាំ និងនាយករដ្ឋមន្ត្រីថ្មីជប៉ុន ចុះហត្ថលេខាលើកិច្ចព្រមព្រៀងរ៉ែកម្រ និងរ៉ែសំខាន់ៗ