អាជ្ញាធរសង្កាត់ផ្សារដេប៉ូទី ១ អ៊ុតកៅស៊ូ AC ចំនួន ៣ ផ្លូវ ក្នុងមូលដ្ឋានសង្កាត់ ដោយប្រើប្រាស់ថវិកាអភិវឌ្ឍន៍ឆ្នាំ ២០២៥

អាជ្ញាធរសង្កាត់ផ្សារដេប៉ូទី ១ បានប្រើប្រាស់ថវិកាអភិវឌ្ឍន៍ឆ្នាំ ២០២៥ ដើម្បីធើ្វការស្ថាបនាឡើងវិញ ឈូសឆាយ អ៊ុតកៅស៊ូ AC ចំនួន ៣ ផ្លូវ ក្នុងមូលដ្ឋានសង្កាត់ផ្សារដេប៉ូទី ១ ដើម្បីសម្រួលដល់ការធើ្វដំណើររបស់ប្រជាពលរដ្ឋប្រចាំថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងអាជ្ញាធរសង្កាត់ផ្សារដេប៉ូទី ១ បានធើ្វការស្ថាននាឡើងវិញនៅផ្លូវ ២៣៧ កែង ១៦២ ផ្លូវ ២២៣ កែង ១៥៦ និង ផ្លូវ ២២៩ កែង ១៦២ ក្នុងមូលដ្ឋានសង្កាត់ផ្សារដេប៉ូទី ១ ខណ្ឌទួលគោក រាជធានីភ្នំពេញ ដោយក្នុងមួយផ្លូវមានប្រវែង ១៣៦ ម៉ែត្រ សរុបទាំង ៣ ផ្លូវ ប្រវែងជាង ៤០០ ម៉ែត្រ។

អ្នកស្រី កន្និកា ជាប្រជាពលរដ្ឋរស់នៅតំបន់ខាងលើនោះ បានសម្ដែងក្ដីសប្បាយរីករាយ ក្រោយមានការយកចិត្តទុកដាក់ពីអាជ្ញាធរធើ្វការអ៊ុតកៅស៊ូផ្លូវឡើងវិញបានស្អាតដូច្នេះ។ អ្នកស្រី ថា ការជួសជុលផ្លូវជារឿងសំខាន់ ដើម្បីឆ្លើយតបតាមតម្រូវការរបស់ប្រជាពលរដ្ឋ និងជួយអភិវឌ្ឍន៍សាធារណៈជូនសហគមន៍ឲ្យកាន់តែល្អប្រសើរ។

ដោយឡែក លោក វីរៈ ជាប្រជាពលរដ្ឋរស់នៅតំបន់នោះដែរ បានសាទរក្រោយឃើញអាជ្ញាធរសង្កាត់យកចិត្តទុកដាក់ទៅលើប្រជាពលរដ្ឋធើ្វដំណើរប្រចាំថ្ងៃ ជាពិសេសនោះគឺផ្លូវសម្រាប់ធើ្វដំណើរប្រចាំថ្ងៃតែម្ដង។ លោកបាននិយាយថា ពីពេលនេះទៅ លែងពិបាកធ្វើដំណើរទៀតហើយ ងាយស្រួលក្នុងការធ្វើដំណើរមិនដូចពីមុនមានជង្ហុកធ្វើឲ្យរំខានដល់ការធើ្វដំណើរ។

ជាមួយគ្នានេះ លោកស្រី ពៅ សាម៉ោច ចៅសង្កាត់ផ្សារដេប៉ូទី ១ បានបញ្ជាក់ឲ្យកម្ពុជាថ្មីដឹងថា ដើម្បីសម្រួលដល់ការធើ្វដំណើររបស់ប្រជាពលរដ្ឋ អាជ្ញាធរសង្កាត់ បានប្រើប្រាស់ថវិកាអភិវឌ្ឍន៍សង្កាត់ឆ្នាំ ២០២៥ ធើ្វការអ៊ុតកៅស៊ូឡើងវិញនៅតាមបណ្តោយផ្លូវចំនួន ៣ ខ្សែ ក្នុងមូលដ្ឋានសង្កាត់។

លោកស្រី ក៏បានសំណូមពរទៅដល់ប្រជាពលរដ្ឋរស់នៅក្នុងមូលដ្ឋាន សូមមេត្តាចូលរួមទាំងអស់គ្នា កុំរំលោភលើចំណែកផ្លូវសាធារណៈ និងធ្វើការវេចខ្ចប់សំរាមទុកដាក់ឲ្យបានត្រឹមត្រូវ ជៀសវាងការហូរចូលប្រព័ន្ធលូ បង្កជាការជន់លិច។

គួរជម្រាបថា កន្លងមក កំណាត់ផ្លូវលេខ ២៣៧ ប្រជាពលរដ្ឋ​តែងតែត្អូញត្អែរពីការរំខានក្នុងការធើ្វដំណើរ ដោយសារមានជង្ហុកតែងបង្កគ្រោះថ្នាក់ដល់ពួកគាត់មើលមិនឃើញ ជាពិសេសនៅពេលយប់តែម្តង៕

អត្ថបទ ៖ ម៉េង