មន្ត្រីក្រសួងការងារ ប្រចាំការក្នុងឱកាសព្រះរាជពិធីបុណ្យអុំទូក ដើម្បីត្រៀមជួយដោះស្រាយបញ្ហារបស់កម្មករនិយោជិត

មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅទីស្ដីការក្រសួង និងមន្ត្រីមន្ទីរការងារ និងបណ្ដុះបណ្ដាលវិជ្ជាជីវៈ នៅទូទាំង ២៥រាជធានី-ខេត្ត រួមទាំងក្រុមអន្តរាគមន៍ និងក្រុម ១២៩៧ នាថ្ងៃទី៤ ខែវិច្ឆិកា ឆ្នាំ២០២៥ ដែលចំថ្ងៃទី១ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅបន្តប្រចាំការ ដើម្បីត្រៀមអន្តរាគមន៍ និងដោះស្រាយបញ្ហាផ្សេងៗ ជូនបងប្អូនកម្មករ-និយោជិត។ នេះបើតាមការឱ្យដឹងពីលោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ។

លោក ស៊ុន មេសា មានប្រសាសន៍នៅថ្ងៃទី៤ ខែវិច្ឆិកានេះថា ទោះបីជាថ្ងៃឈប់សម្រាកក្នុងឱកាសព្រះរាជពិធីបុណ្យអុំទូកក៏ដោយ ប៉ុន្តែក្រោមការចាត់តាំងរបស់លោក ហេង សួរ គឺមន្ត្រីរបស់ក្រសួងការងារ និងបណ្ដុះបណ្ដាលវិជ្ជាជីវៈ ទាំងនៅទីស្ដីការក្រសួង និងមន្ទីរនៅទូទាំង ២៥រាជធានី-ខេត្ត នៅតែបន្តមានអ្នកប្រចាំការ ដើម្បីរង់ចាំដោះស្រាយ និងសម្របសម្រួលបញ្ហាណាមួយ ដែលអាចកើតមានឡើងជាយថាហេតុ។

អ្នកនាំពាក្យក្រសួងការងារ លោក ស៊ុន មេសា បានបញ្ជាក់ថា មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ទាំងនៅទីស្ដីការក្រសួង និងមន្ទីរនៅទូទាំង ២៥រាជធានី-ខេត្ត នឹងបន្តប្រចាំការនៅថ្ងៃទី២ និងទី៣ នៃព្រះរាជពិធីបុណ្យអុំទូក បន្តទៀត៕