សារព័ត៌មានធំៗលើពិភពលោក ផ្សាយពីការបាញ់ប្រហាររបស់ទាហានថៃ លើពលរដ្ឋខ្មែរ 

ក្រោយទាហានថៃបើកការបាញ់ប្រហារសម្លាប់ពលរដ្ឋខ្មែរម្នាក់និងរបួសច្រើននាក់នៅភូមិព្រៃចាន់ បណ្តាញសារព័ត៌មានធំៗលើពិភពលោក បានចុះផ្សាយព្រោងព្រាតអំពីទង្វើរបស់ទាហានថៃ។

សារព័ត៌មាន AP របស់អាមេរិកបានផ្សាយដោយដាក់ចំណងជើងធំៗថា៖ ជម្លោះព្រំដែនរវាងកម្ពុជានិងថៃ ក្តៅគគុកឡើងវិញ ខណៈមានរបាយការណ៍ថា ពលរដ្ឋខ្មែរម្នាក់ត្រូវបានសម្លាប់។ នាយករដ្ឋមន្ត្រីកម្ពុជាថ្លែងថា ពលរដ្ឋម្នាក់ត្រូវបានសម្លាប់ នៅពេលមានការបាញ់ប្រហារកើតឡើងកាលពី ថ្ងៃពុធ នៅតាមបណ្តោយព្រំដែនដ៏ផុយស្រួយជាមួយប្រទេសថៃ ខណៈបទឈប់បាញ់ ដែលសម្របសម្រួលពីសំណាក់ប្រធានាធិបតីសហរដ្ឋអាមេរិក ដូណាល់ ត្រាំ ត្រូវរលាយបាត់ទៅហើយ។

ទន្ទឹមនោះ សារព័ត៌មាន Reuters របស់អង់គ្លេស ផ្សាយថា៖ មនុស្សម្នាក់ត្រូវបានសម្លាប់នៅក្នុងប្រទេសកម្ពុជា ជម្លោះជាមួយប្រទេសថៃផ្ទុះឡើងជាថ្មីកាលពីថ្ងៃពុធ។

ចំណែកសារព័ត៌មាន Anadolu របស់តួកគីក៏ផ្សាយដែរថា ជនស៊ីវិលកម្ពុជា ៥ នាក់ ត្រូវរបួសកាលពីថ្ងៃពុធ ដោយសារការបាញ់ប្រហារនៅតាមបណ្តោយព្រំដែនជាមួយប្រទេសថៃ ត្រឹមតែប៉ុន្មានថ្ងៃប៉ុណ្ណោះ បន្ទាប់ពីភាគីថៃ ផ្អាកកិច្ចព្រមព្រៀងសន្តិភាព។

ដោយឡែក បើតាមការផ្សាយរបស់សារព័ត៌មានចិន Xinhua ដោយដកស្រង់សម្តីរដ្ឋមន្ត្រីក្រសួងព័ត៌មានកម្ពុជា, ទាហានថៃបានបើកការបាញ់ប្រហារទៅលើពលរដ្ឋកម្ពុជា នៅក្នុងជម្លោះព្រំដែនដែលកំពុងបន្ត ដោយបណ្តាលឲ្យមនុស្ស ប្រាំនាក់រងរបួស។

ការផ្សព្វផ្សាយយ៉ាងព្រោងព្រាតនៅលើពិភពលោកបែបនេះ កំពុងបង្ហាញពីអំពើព្រៃផ្សៃរបស់ថៃលើកម្ពុជា ហើយក៏សង្ឃឹមដែរថា កម្ពុជានឹងទទួលបានយុត្តិធម៌៕

អត្ថបទ៖ សុខ សុវណ្ណ

ចុចអាន៖ កាសែត Telegraph៖ ថៃ បញ្ជូនរថក្រោះទៅព្រំដែន កម្ពុជា បន្ទាប់ពីកិច្ចព្រមព្រៀងសន្តិភាពរបស់លោកត្រាំ ត្រូវរលាយ