កូរ៉េខាងត្បូង ផ្អាកជើងហោះហើរក្នុងថ្ងៃសិស្សប្រឡងចូលមហាវិទ្យាល័យ

កូរ៉េខាងត្បូងបានផ្អាកជើងហោះហើរ និងពន្យារពេលម៉ោងធ្វើការ ខណៈដែលនិស្សិតជាង ៥៥ម៉ឺន​នាក់បានប្រឡងចូលមហាវិទ្យាល័យដ៏លំបាករបស់ប្រទេស ដែលត្រូវបានគេស្គាល់ជាភាសាកូរ៉េថា «Suneung»។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៣ខែវិច្ឆិកា។

ជើងហោះហើរត្រូវបានបញ្ឈប់រយៈពេល ៣៥ នាទីក្នុងអំឡុងពេលធ្វើតេស្តស្តាប់ភាសាអង់គ្លេស ហើយធនាគារ និងការិយាល័យនានាបានចាប់ផ្តើមធ្វើការនៅពេលក្រោយឬយឺតជាងមុន ដើម្បីជួយកាត់បន្ថយចរាចរណ៍នៅលើដងផ្លូវ។ ចំពោះប៉ូលិសវិញបានជួយនិស្សិតដែលមកយឺតទៅដល់មជ្ឈមណ្ឌលប្រឡង ខណៈពេលដែលឪពុកម្តាយបានទៅវត្តអារាម និងព្រះវិហារដើម្បីអធិស្ឋានសុំលទ្ធផលល្អ។

ការប្រឡង Suneung គឺមានសារៈសំខាន់ខ្លាំងណាស់នៅក្នុងប្រទេសកូរ៉េខាងត្បូង ព្រោះវាសម្រេចថានិស្សិតសាកលវិទ្យាល័យណាដែលអាចចូលរៀនបាន ហើយថែមទាំងអាចប៉ះពាល់ដល់ការងារ និងអាពាហ៍ពិពាហ៍នាពេលអនាគតរបស់ពួកគេ។ គ្រួសារជាច្រើនធ្វើតាមប្រពៃណីនៅថ្ងៃនេះ ដូចជាការជៀសវាងញាំស៊ុបសារ៉ាយសមុទ្រ ព្រោះវាត្រូវបានគេជឿថានាំមកនូវសំណាងអាក្រក់។

លើសពីនេះនៅឆ្នាំនេះ ជាលើកដំបូង សាកលវិទ្យាល័យទាំងអស់ត្រូវតែពិនិត្យមើលកំណត់ត្រាឬក៏ប្រវត្តិនៃការធ្វើបាបរបស់សិស្សមុនពេលទទួលយកពួកគេចូលរៀន បន្ទាប់ពីមនុស្សជាច្រើនបានស្នើសុំឱ្យមានច្បាប់តឹងរ៉ឹងជាងមុន។

ការប្រឡងនេះត្រូវបានគេមើលឃើញថាជាថ្ងៃមួយដ៏តានតឹងបំផុត ប៉ុន្តែមានអត្ថន័យបំផុតនៅក្នុងជីវិតរបស់និស្សិតកូរ៉េខាងត្បូង៕

អត្ថបទ៖ ប៊ុន សុភាព