ព័ត៌មានអន្ដរជាតិ

Maduro ឲ្យបញ្ឈប់សង្គ្រាម ខណៈអាមេរិកដាក់ចេញប្រតិបត្តិការយោធាកម្ទេចគ្រឿងញៀន

បានផុស

៥ ខែ មុន

នៅ

ថ្ងៃសៅរ៍ ១៥ វិច្ឆិកា ២០២៥

ដោយ

ប្រធានាធិបតីវេណេស៊ុយអេឡា លោក Nicolas Maduro នៅថ្ងៃសុក្រ ទី១៤ វិច្ឆិកា បានថ្លែងសារប្រឆាំងសង្គ្រាម ទៅកាន់ប្រជាជនអាមេរិក ខណៈដែលលោកបានចូលរួមក្នុងកម្មវិធីបិទកិច្ចប្រជុំអ្នកច្បាប់អន្តរជាតិ ក្នុងការការពារច្បាប់អន្តរជាតិនៅទីក្រុងការ៉ាកាសរបស់វេណេស៊ុយអេឡា។

ប្រធានាធិបតីវេណេស៊ុយអេឡា លោក Nicolas Maduro ធ្វើកាយវិការក្នុងពេលដង្ហែរជាមួយយុវជនបក្ស នៅថ្ងៃទី១៣ខែវិច្ឆិកា REUTERS

លោក Maduro ត្រូវបានស្រង់សម្តីដូចបានថ្លែងថា៖ «បញ្ឈប់ភាពក្រែវក្រោធរបស់អ្នកដែលបញ្ជាឲ្យទម្លាក់គ្រាប់បែក សម្លាប់ និងនាំយកសង្គ្រាមមកអាមេរិកខាងត្បូង ដល់តំបន់ការាបៀន»។ ។ លោកបានបន្ថែមថា «បញ្ឈប់សង្រ្គាម, គ្មានទេសង្គ្រាម (Stop the war. No to war)»។

ព្រឹត្តិការណ៍រយៈពេលពីរថ្ងៃបានប្រមូលផ្តុំអ្នកជំនាញច្បាប់ និងអ្នកសិក្សាដើម្បីពិភាក្សាអំពីការគំរាមកំហែងដល់សន្តិភាព និងស្ថិរភាពក្នុងតំបន់។

លោក Maduro បានអំពាវនាវឱ្យយល់ពីទំហំនៃបញ្ហាប្រឈមអន្តរជាតិនាពេលបច្ចុប្បន្ននេះ ជាពិសេសការគំរាមកំហែងដែលកើតឡើងនៅសមុទ្រការ៉ាប៊ីន នៅតំបន់អាមេរិកខាងត្បូង ដែលជាលទ្ធផលនៃសកម្មភាពយោធាដែលធ្វើឡើងដោយរដ្ឋាភិបាលសហរដ្ឋអាមេរិកនៅក្នុងតំបន់នោះ។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានបង្កើនភាពតានតឹងនៅតំបន់សមុទ្រការ៉ាប៊ីនប៉ុន្មានសប្តាហ៍ចុងក្រោយក្នុងសកម្មភាពដែលលោក ហៅថា សង្គ្រាមប្រឆាំងគ្រឿងញៀន» ដែលនាំចូលគ្រឿងញៀនទៅកាន់សហរដ្ឋអាមេរិក ធ្វើឲ្យសហរដ្ឋអាមេរិកជួបបញ្ហាអសន្តិសុខ។ ការធ្វើសកម្មភាពនោះសំដៅដល់ទូកនាវាជាច្រើនគ្រឿងរបស់វេណេស៊ុយអេឡានៅសមុទ្រការ៉ាប៊ីន។

លោក Maduro បានធ្វើការកត់សម្គាល់បែបនេះ បន្ទាប់ពីក្រុងវ៉ាស៊ីនតោនបានប្រកាសអំពី«ប្រតិបត្តិការ SOUTHERN SPEAR» ដែលជាគំនិតផ្តួចផ្តើមយោធាដែលមានគោលបំណងកំណត់គោលដៅ «ភេរវករគ្រឿងញៀន»។

រដ្ឋមន្ត្រីការពារជាតិអាមេរិក លោក Pete Hegseth បាននិយាយនៅថ្ងៃព្រហស្បតិ៍ ១៣ វិច្ឆិកា ថា ប្រតិបត្តិការនេះនឹងដឹកនាំដោយបញ្ជាការខាងត្បូងរបស់សហរដ្ឋអាមេរិក ដែលត្រួតពិនិត្យសកម្មភាពយោធានៅទូទាំង ៣១ ប្រទេសនៅអាមេរិកខាងត្បូង និងកណ្តាល និងតំបន់ការីប៊ីន៕

រ៉ាន់ រើយ