មន្ទីរប្រឆាំងគ្រឿងញៀន បង្ក្រាបទីតាំងផលិត និងកែច្នៃ៥ទីតាំង រឹបអូសថ្នាំញៀន និងសារធាតុផ្សំជិត៤០គីឡូក្រាម

កម្លាំងនៃមន្ទីរប្រឆាំងបទល្មើសគ្រឿងញៀន សហការជាមួយកម្លាំងនគរបាលនៃស្នងការដ្ឋានរាជធានីភ្នំពេញ កាលពីថ្ងៃទី២៩ ខែវិច្ឆិកា ឆ្នាំ២០២៥ បានចុះបង្ក្រាបទីតាំងផលិត និងកែច្នៃគ្រឿងចំនួន៥គោលដៅ ឃាត់ខ្លួនជនសង្ស័យសរុប៧នាក់ និងរឹបអូសគ្រឿងញៀនជិត៤០គីឡូក្រាម។

តាមរាបាយការណ៍របស់មន្ទីរប្រឆាំងបទល្មើសគ្រឿងញៀនដែលទើបបង្ហាញនៅថ្ងៃទី៣ខែធ្នូនេះ ជនសង្ស័យដែលឃាត់ខ្លួនមានជនជាតិចិន៦នាក់ និងជនជាតិខ្មែរម្នាក់ និងត្រូវបានកម្លាំងជំនាញកសាងសំណុំរឿងបញ្ជូនខ្លួនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី។

ក្នុងប្រិតិបត្តការបង្ក្រាប កម្លាំងជំនាញបានរកឃើញ គ្រឿងញៀនប្រភេទកូកាអ៊ីន (Cocaine) ទម្ងន់ ១២,១៧៤.៨៩ក្រាម, គ្រឿងញៀនប្រភេទអ៊ិចស្ត្រាស៊ី (MDMA) ទម្ងន់៥,៨២១.៥៨ក្រាម, គ្រឿងញៀនប្រភេទ រុក្ខជាតិក្រៀម (កញ្ចា) ទម្ងន់ ៤៧៥.៤២ក្រាម, សារធាតុគីមីផ្សំ ទម្ងន់២២,៨៨៤ក្រាម។ សរុបរួមសារធាតុញៀនទម្ងន់ ១៧,៩៩៦.៤៧ក្រាម (១៧គីឡូ៩៩៦,៤៧ក្រាម), សរុបរួមសារធាតុគីមីផ្សំ ទម្ងន់២២,៨៨៤ក្រាម (២២គីឡូ ៨៨៤ក្រាម) ព្រមទាំងចាប់យកសម្ភារៈឧបករណ៍សម្រាប់ផលិត និងប្រើប្រាស់គ្រឿងញៀនមួយចំនួនធំ៕