ព័ត៌មានជាតិ

កម្ពុជារំពឹងបំបែកកំណត់ត្រាម្តងទៀត ១១ ខែឆ្នាំ២០២៥ អនុម័តគម្រោងវិនិយោគគិតជាទុនជាង ៩ ប៊ីលានដុល្លារ

បានផុស

៥ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

បើតាមការគូសបញ្ជាក់ពីលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី ១ ក្រុមប្រឹក្សាអភិវឌ្ឍន៍កម្ពុជាបានឲ្យដឹងថា នៅឆ្នាំ ២០២៥ កម្ពុជារំពឹងបំបែកកំណត់ត្រាម្តងទៀត ខណៈរយៈពេល ១១ ខែឆ្នាំ ២០២៥ កម្ពុជាបានអនុម័តគម្រោងវិនិយោគលើសពី ៦០០ គម្រោង គិតជាទំហំទុនវិនិយោគជាង ៩ បីលានដុល្លារ។

ថ្លែងនៅក្នុងពិព័រណ៍ពាណិជ្ជកម្មកម្ពុជានៅព្រឹកមិញនេះ លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា កម្ពុជារំពឹងនឹងអនុម័តគម្រោងវិនិយោគដែលមានលក្ខណៈសម្បត្តិគ្រប់គ្រាន់ (QIP) លើសពី ៦០០ គម្រោងនៅឆ្នាំ ២០២៥ ដែលជាកំណត់ត្រាថ្មី ខណៈនៅឆ្នាំ ២០២៤ កម្ពុជាបានបំបែកកំណត់ត្រាម្តងរួចមកហើយក្នុងការអនុម័តគម្រោងវិនិយោគច្រើនបំផុតក្នុងរយៈពេល ៣០ ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា គិតត្រឹមខែវិច្ឆិកាឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន ៦០៩ គម្រោង គិតជាទុនវិនិយោគប្រមាណ ៩,៥ ពាន់លានដុល្លារ ដែលកំណត់ត្រាឆ្នាំ ២០២៤ កម្ពុជាអនុម័តគម្រោងវិនិយោគចំនួន ៤១៤ គម្រោង។

បន្ថែមពីនេះ លោក ស៊ុន ចាន់ថុល បានលើកពីកំណើនទំហំពាណិជ្ជកម្មសរុបកម្ពុជា ដែលក្នុងរយៈពេល ១០ ខែឆ្នាំ ២០២៥ កើនឡើង ១៧% បើធៀបរយៈពេលដូចគ្នាឆ្នាំ ២០២៤។

លោកអះអាងថា ការធ្វើកំណែទម្រង់បានធ្វើឲ្យកម្ពុជាទទួលបានចំណាត់ថ្នាក់អន្តរជាតិខ្ពស់ លើការទាក់ទាញវិនិយោគពីបទេស។

កម្ពុជាជាប់ចំណាត់ថ្នាក់កំពូលពីទីផ្សាររីកចម្រើនឈានមុខគេសម្រាប់ទាក់ទាញការវិនិយោគ។ នៅឆ្នាំ ២០២៥ កម្ពុជាជាប់ចំណាត់ថ្នាក់លេខ ១ នៅអាស៊ីប៉ាស៊ីហ្វិក និងលេខ ៩ លើពិភពលោកលើសន្ទស្សន៍នៃការទាក់ទាញវិនិយោគផ្ទាល់របស់បរទេស (FDI) បើធៀបទំហំសេដ្ឋកិច្ចប្រទេស។

ក្នុងឱកាសនោះ លោកបន្តអំពាវនាវដល់អ្នកវិនិយោគឯកជនបន្តវិនិយោគឲ្យបានច្រើននៅក្នុងប្រទេសកម្ពុជា។ លោកឧបនាយករដ្ឋមន្រ្តីប្រកាសប្តេជ្ញាបន្តអនុវត្តកំណែទម្រង់ស៊ីជម្រៅ ដើម្បីលើកស្ទួយវិស័យឯកជនក្នុងការជំរុញកំណើនសេដ្ឋកិច្ចជាតិ៕