ព័ត៌មានអន្ដរជាតិ

កាន់តែតានតឹង! នាវាផ្ទុកយន្តហោះចិនបង្កើនប្រតិបត្តិការផ្លូវអាកាសក្បែរប្រទេសជប៉ុន

បានផុស

៥ ខែ មុន

នៅ

ថ្ងៃចន្ទ ៨ ធ្នូ ២០២៥

ដោយ

Chheang

ក្រុមនាវាផ្ទុកយន្តហោះចិន បានបង្កើនប្រតិបត្តិការផ្លូវអាកាសយ៉ាងខ្លាំងក្លានៅជិតប្រទេសជប៉ុនកាលពីចុងសប្តាហ៍ ខណៈដែលប្រទេសទាំងពីរបានផ្លាស់ប្តូរការព្រមានការទូតដ៏ក្ដៅគគុក ដែលធ្វើឲ្យទំនាក់ទំនងតានតឹងរួចទៅហើយកាន់តែតានតឹងថែមទៀត។

*នាវាផ្ទុកយន្តហោះ Liaoning (រូបថត៖ ក្រសួងការពារជាតិជប៉ុន)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារព័ត៍មានរ៉យទ័រ កងកម្លាំងស្វ័យការពារជប៉ុន (SDF) បានប្រកាសនាថ្ងៃចន្ទទី៨ខែធ្នូឆ្នាំ២០២៥នេះថា នាវាផ្ទុកយន្តហោះ Liaoning របស់ចិន បានបង្ហោះ និងចុះចតយន្តហោះចម្បាំងចុះឡើងប្រហែល១០០លើក នៅពេលដែលវាបានធ្វើដំណើរទៅភាគខាងកើតចូលទៅក្នុងមហាសមុទ្រប៉ាស៊ីហ្វិកឆ្លងកាត់ប្រជុំកោះអូគីណាវ៉ា។

ទីក្រុងតូក្យូបានកោះហៅឯកអគ្គរដ្ឋទូតចិន លោក Wu Jianghao កាលពីថ្ងៃអាទិត្យ បន្ទាប់ពីចោទប្រកាន់យន្តហោះចម្បាំងចិនដែលហោះចេញពីនាវា Liaoning ថាបានតម្រង់ភ្លើងរ៉ាដា ទៅលើយន្តហោះជប៉ុនដែលកំពុងហោះតាមដានក្រុមនាវាចិនកាលពីមួយថ្ងៃមុននោះ។ ការបាញ់ពន្លឺរ៉ាដានេះ អាចជាសញ្ញានៃការត្រៀមរៀបចំសម្រាប់ការវាយប្រហារ និងបង្ខំឲ្យយន្តហោះដែលត្រូវបានកំណត់គោលដៅត្រូវចាត់វិធានការគេចវេះ។

ប្រទេសចិនបានបដិសេធការចោទប្រកាន់នេះ ដោយនិយាយថា យន្តហោះជប៉ុនបានបង្កគ្រោះថ្នាក់ដោយព្យាយាមចូលទៅជិតក្រុមនាវាផ្ទុកយន្តហោះ ដែលកំពុងបើកបរជាមួយនាវាពិឃាតមីស៊ីលចំនួន៣គ្រឿងផ្សេងទៀត។

ស្ថានទូតចិនបានរៀបរាប់នៅក្នុងសេចក្តីថ្លែងការណ៍ថា «ចិនទាមទារយ៉ាងដាច់ណាត់ឲ្យជប៉ុនបញ្ឈប់ការបង្ខូចកេរ្តិ៍ឈ្មោះ កំណត់យ៉ាងតឹងរ៉ឹងនូវសកម្មភាពជួរមុខរបស់ខ្លួន និងទប់ស្កាត់ឧប្បត្តិហេតុស្រដៀងគ្នានេះកុំឲ្យកើតឡើងម្តងទៀត»។

ប្រទេសជប៉ុនបានបដិសេធសេចក្តីរាយការណ៍របស់ទីក្រុងប៉េកាំង។ ប្រធានលេខាធិការគណៈរដ្ឋមន្ត្រី លោក Minoru Kihara បានលើកឡើងថា យន្តហោះជប៉ុនបានធ្វើសកម្មភាពត្រឹមត្រូវ ហើយទីក្រុងតូក្យូនឹង «ឆ្លើយតបដោយស្ងប់ស្ងាត់ ប៉ុន្តែម៉ឺងម៉ាត់ និងបន្តតាមដានចលនារបស់កងកម្លាំងចិននៅក្នុងដែនទឹកជុំវិញប្រទេសរបស់យើង»។

ការប្រឈមមុខគ្នាកាលពីចុងសប្តាហ៍ កើតឡើងចំពេលមានការបង្កើនវោហាសាស្ត្រលើបញ្ហាតៃវ៉ាន់។ នាយករដ្ឋមន្ត្រី លោកស្រី Sanae Takaichi បានព្រមានកាលពីខែមុនថា ជប៉ុនអាចនឹងឆ្លើយតបទៅនឹងសកម្មភាពយោធារបស់ចិនណាមួយប្រឆាំងនឹងតៃវ៉ាន់ ដែលគំរាមកំហែងដល់សន្តិសុខជប៉ុន។ ទីក្រុងប៉េកាំងក្រោយមកបានសម្ដែងការមិនពេញចិត្តជាខ្លាំង ហើយបានណែនាំប្រជាពលរដ្ឋរបស់ខ្លួនឲ្យជៀសវាងការធ្វើដំណើរទៅកាន់ប្រទេសជប៉ុន និងផ្អាកការនាំចូលអាហារសមុទ្រពីទីក្រុងតូក្យូ។

ចិនអះអាងថា តៃវ៉ាន់គឺជាទឹកដីរបស់ខ្លួន ហើយបានបង្កើនសម្ពាធយោធាលើដែនកោះមួយនេះ ដែលស្ថិតនៅចម្ងាយត្រឹមតែ១១០គីឡូម៉ែត្រ ពីកោះភាគខាងលិចបំផុតរបស់ជប៉ុនក្នុងខេត្តអូគីណាវ៉ា។

សព្វថ្ងៃ ជប៉ុនគឺជាកន្លែងប្រមូលផ្តុំដ៏ធំបំផុតនៃកងកម្លាំងយោធាអាមេរិកនៅបរទេស ដោយក្នុងនោះមានទាហានម៉ារីនអាមេរិករាប់ម៉ឺននាក់ឈរជើងនៅអូគីណាវ៉ា។ ក្រសួងការបរទេសអាមេរិក និងស្ថានទូតអាមេរិកប្រចាំទីក្រុងតូក្យូ មិនបានធ្វើអត្ថាធិប្បាយលើការអះអាងរបស់ជប៉ុនអំពីការប្រឈមមុខគ្នាចុងក្រោយនេះទេ។ ចំណែកឯប្រធានាធិបតីអាមេរិក ដូណាល់ ត្រាំ នៅតែរក្សាភាពស្ងៀមស្ងាត់ ខណៈដែលលោកត្រៀមខ្លួនទៅបំពេញទស្សនកិច្ចនៅទីក្រុងប៉េកាំងនៅឆ្នាំក្រោយសម្រាប់កិច្ចពិភាក្សាពាណិជ្ជកម្ម៕

ប្រែសម្រួល៖ ឈាង