សេដ្ឋកិច្ច

ការតភ្ជាប់ជើងហោះហើរតួកគី-កម្ពុជា បង្ហាញឱកាសថ្មីសម្រាប់វិស័យទេសចរណ៍ និងអាជីវកម្ម

បានផុស

៤ ខែ មុន

នៅ

ថ្ងៃសុក្រ ១២ ធ្នូ ២០២៥

ដោយ

ក្រុមហ៊ុនអាកាសចរណ៍ Turkish Airlines ដែលជាក្រុមហ៊ុនអាកាសចរណ៍ដែលហោះហើរទៅកាន់ប្រទេសជាច្រើនដែលច្រើនជាងក្រុមហ៊ុនដទៃទៀត បានឈានមួយជំហានទៀតដើម្បីពង្រីកវិសាលភាពជាសកលរបស់ខ្លួន ដោយបានបើកដំណើរការជើងហោះហើរមកកាន់រាជធានីភ្នំពេញ ដែលស្របទៅតាមគោលដៅយុទ្ធសាស្ត្ររបស់ខ្លួន។

ជាមួយនឹងគោលដៅថ្មីនេះ កម្ពុជាបានក្លាយជាប្រទេសទី ៧ ដែលបម្រើសេវាកម្មដោយក្រុមហ៊ុនអាកាសចរណ៍ជាតិនៅអាស៊ីអាគ្នេយ៍ ហើយរាជធានីភ្នំពេញបានចូលរួមក្នុងបណ្តាញជាទីក្រុងទី ១១ នៅក្នុងតំបន់។ ដើម្បីពង្រឹងទំនាក់ទំនងពាណិជ្ជកម្មរវាងសាធារណរដ្ឋតួកគី និងកម្ពុជា និងរួមចំណែកដល់កំណើនសេដ្ឋកិច្ចនៃទីផ្សារដែលកំពុងរីកចម្រើននេះ ផ្លូវហោះហើរពីរាជធានីភ្នំពេញទៅពង្រីកបណ្តាញចុងបូព៌ារបស់ក្រុមហ៊ុនអាកាសចរណ៍ដល់ទៅ ២០ ទីក្រុង និងអាកាសយានដ្ឋានចំនួន ២១។

ផ្លូវហោះហើរថ្មីនេះផ្តល់ជូនភ្ញៀវរបស់ក្រុមហ៊ុន Turkish Airlines នូវច្រកផ្លូវទៅកាន់គោលដៅសំខាន់ៗមួយក្នុងតំបន់បានកាន់តែងាយស្រួល និងបង្ហាញជាថ្មីម្តងទៀតអំពីការតភ្ជាប់ដែលមិនអាចប្រៀបផ្ទឹមបាន ដែលក្រុមហ៊ុនអាកាសចរណ៍នៃសាធារណរដ្ឋតួកគីយ៉េផ្តល់ជូន ក្នុងនាមជាក្រុមហ៊ុនអាកាសចរណ៍អឺរ៉ុបតែមួយគត់ដែលហោះហើរទៅកាន់គោលដៅនេះ។

ក្រុមហ៊ុនអាកាសចរណ៍ Turkish Airlines ដំណើរការជើងហោះហើរមកកាន់រាជធានីភ្នំពេញបីដងក្នុងមួយសប្តាហ៍។ ជើងហោះហើរពីទីក្រុងអ៊ីស្តង់ប៊ុលមកកាន់រាជធានីភ្នំពេញចេញដំណើរនៅថ្ងៃពុធ ថ្ងៃសុក្រ និងថ្ងៃអាទិត្យ ខណៈដែលជើងហោះហើរទៅមកទីក្រុងអ៊ីស្តង់ប៊ុលដំណើរការនៅថ្ងៃច័ន្ទ ថ្ងៃព្រហស្បតិ៍ និងថ្ងៃសៅរ៍។

លោក Bilal Ekşi នាយកប្រតិបត្តិក្រុមហ៊ុនអាកាសចរណ៍ TurkishAirlines មានប្រសាសន៍ថា៖ «ក្នុងនាមជាក្រុមហ៊ុនអាកាសចរណ៍របស់សាធារណរដ្ឋតួកគី យើងបន្តពង្រីកបណ្តាញតភ្ជាប់ទ្វីបនានា និងពង្រឹងការតភ្ជាប់របស់យើងជាមួយគោលដៅយុទ្ធសាស្ត្រ។ ការបន្ថែមកម្ពុជាជាប្រទេសទី ១៣២ របស់យើងទៅក្នុងបណ្តាញដែលមិនអាចប្រៀបផ្ទឹមបានរបស់យើង ហើយការដាក់ឱ្យដំណើរការជើងហោះហើរទៅកាន់រាជធានីភ្នំពេញ គឺជាជំហានដ៏សំខាន់មួយឆ្ពោះទៅមុខក្នុងគោលដៅនេះ។ ជើងហោះហើររបស់យើងមកកាន់កម្ពុជា នឹងបង្ហាញពីឱកាសថ្មីៗ សម្រាប់ទាំងវិស័យទេសចរណ៍ និងអាជីវកម្ម»។

ទីក្រុងភ្នំពេញ ជាមជ្ឈមណ្ឌលទេសចរណ៍ និងពាណិជ្ជកម្មដ៏សំខាន់បំផុតមួយនៅក្នុងតំបន់ ជាមួយនឹងរចនាសម្ព័ន្ធប្រវត្តិសាស្ត្រ បេតិកភណ្ឌវប្បធម៌ និងជីវិតទីក្រុងដ៏រស់រវើក។ ស្ថិតនៅចំណុចប្រសព្វនៃទន្លេមេគង្គ និងទន្លេសាប ទីក្រុងនេះផ្តល់ជូនភ្ញៀវទេសចរនូវបទពិសោធន៍វប្បធម៌ដ៏សម្បូរបែបជាមួយនឹងព្រះបរមរាជវាំង សារមន្ទីរជាតិ និងផ្សារប្រពៃណី។

យោងតាមក្រសួងទេសចរណ៍ កម្ពុជាបានស្វាគមន៍ភ្ញៀវទេសចរអន្តរជាតិជាង ៤,៧ លាននាក់ នៅក្នុងរយៈពេល ១០ ខែ ឆ្នាំ ២០២៥ ធ្លាក់ចុះ ១១,៦% ធៀបនឹងរយៈពេលដូចគ្នានៅឆ្នាំ ២០២៤។

ក្នុងចំណោមភ្ញៀវទេសចរអន្តរជាតិជាង ៤,៧ លាននាក់ ទេសចរណ៍វៀតណាមឈរនៅលំដាប់លេខរៀងទី១ ចំនួនជាង ១ លាននាក់ ធ្លាក់ចុះ ៦,៨% ចិន ១ លាននាក់ កើនឡើង ៤៤,៦% ថៃ ៩៩ ម៉ឺននាក់ ធ្លាក់ចុះ ៤២,៣% អាមេរិកជាង ១៦ ម៉ឺននាក់ ធ្លាក់ចុះ ២,៦% កូរ៉េជិត ១៤ ម៉ឺននាក់ ធ្លាក់ចុះ ១២%៕