អ៊ីរ៉ង់ គំរាម កម្ទេចមូលដ្ឋានយោធាអាមេរិកនៅកាតា ឲ្យខ្ទេចខ្ទាំ បើប៉ះទីក្រុងតេអេរ៉ង់ម្តងទៀត

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បាននិយាយកាលពីថ្ងៃទី ១៧ ខែធ្នូថា ប្រសិនបើសហរដ្ឋអាមេរិក បើកការវាយប្រហារលើទីក្រុងតេអេរ៉ង់ម្តងទៀត មូលដ្ឋានយោធាអាមេរិកនៅមជ្ឈិមបូព៌ា ក៏ត្រូវបានកំណត់គោលដៅដូចគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Araghchi បានធ្វើការកត់សម្គាល់នេះនៅក្នុងបទសម្ភាសន៍ជាមួយ Al Jazeera កាលពីថ្ងៃអង្គារ ខណៈពេលដែលកំពុងធ្វើអត្ថាធិប្បាយលើការវាយប្រហារដោយមីស៊ីលសងសឹករបស់អ៊ីរ៉ង់កាលពីខែមិថុនា លើមូលដ្ឋានទ័ពអាកាសអាមេរិកនៅកាតា បន្ទាប់ពីសហរដ្ឋអាមេរិកបានទម្លាក់គ្រាប់បែកលើទីតាំងនុយក្លេអ៊ែរអ៊ីរ៉ង់។

លោកមានប្រសាសន៍ថា «យើងមិនបានវាយប្រហារកាតាទេ ប៉ុន្តែមូលដ្ឋានអាមេរិកនៅកាតាអាចនឹងខ្ទេចខ្ទាំក្លាយជាផះ។ ប្រសិនបើសង្គ្រាមផ្ទុះឡើងរវាងយើង និងសហរដ្ឋអាមេរិក ហើយបើអាមេរិកវាយប្រហារទីតាំងនុយក្លេអ៊ែររបស់យើង ពួកគេប្រាកដជាដឹងហើយថា យើងវាយប្រហារមូលដ្ឋានយោធារបស់ពួកគេ។ វាមិនខុសគ្នាទេថា មូលដ្ឋានទាំងនោះស្ថិតនៅកន្លែងណា។

លោកបានបន្ថែមទៀតថា អ៊ីរ៉ង់រស់នៅដោយមិត្តភាពទាំងស្រុងជាមួយប្រទេសជិតខាង ក៏មិនមានបញ្ហាជាមួយកាតា និងប្រទេសក្នុងតំបន់ផ្សេងទៀតទេ។ ទោះជាយ៉ាងណាក៏ដោយ ពួកយើងក៏ដឹងថា មូលដ្ឋានអាមេរិកមានទីតាំងនៅលើទឹកដីរបស់ប្រទេសមួយចំនួនដែរ។

លោក Araghchi បានបញ្ជាក់សាជាថ្មីថា ដំណោះស្រាយដោយសន្តិវិធីចំពោះបញ្ហានុយក្លេអ៊ែររបស់អ៊ីរ៉ង់ គឺអាចសម្រេចបានទាំងស្រុង ដរាបណាភាគីទាំងពីរគោរពសិទ្ធិគ្នាទៅវិញទៅមក និងត្រៀមខ្លួនរួចជាស្រេចដើម្បីសម្រេចបានកិច្ចព្រមព្រៀងដោយផ្អែកលើផលប្រយោជន៍ទៅវិញទៅមក។

គួរបញ្ចាក់ដែរថា កាលពីថ្ងៃទី ២២ ខែមិថុនា កងកម្លាំងអាមេរិកបានទម្លាក់គ្រាប់បែកលើរោងចក្រនុយក្លេអ៊ែរអ៊ីរ៉ង់ចំនួនបី ដោយចូលរួមការវាយប្រហារររបស់អ៊ីស្រាអែលលើអ៊ីរ៉ង់ ដោយកាលណោះបានបង្កឲ្យមានជម្លោះរយៈពេល ១២ ថ្ងៃ។ វាបានកើតឡើងនៅពេលដែលអ៊ីរ៉ង់ និងសហរដ្ឋអាមេរិក ធ្វើកិច្ចចរចាដោយប្រយោលចំនួនប្រាំជុំលើកម្មវិធីនុយក្លេអ៊ែររបស់ទីក្រុងតេអេរ៉ង់ និងការដកចេញនូវទណ្ឌកម្មរបស់រដ្ឋអាមេរិក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

មកស្គាល់មុខមាត់ពិតរបស់រដ្ឋបាល ត្រាំ ជាអ្នកមានបំផុតក្នុងប្រវត្តិសាស្ត្រ អាមេរិក