សន្តិសុខសង្គម

រថយន្តដឹកអ្នកដំណើរ បើកបុកបុរសម្នាក់កំពុងជិះម៉ូតូ រួចកិនបណ្តាលអោយស្លាប់ ក្បែរទូតបារាំង

បានផុស

៤ ខែ មុន

នៅ

ថ្ងៃចន្ទ ៥ មករា ២០២៦

ដោយ

បុរសម្នាក់វ័យប្រហែល៣០ឆ្នាំ ត្រូវបាត់បង់អាយុជីវិតភ្លាមៗ នៅនិងកន្លែងកើតហេតុ ក្រោយរថយន្តដឹកអ្នកដំណើរ ប្រភេទធន់ធំបុកពីក្រោយរួចកិនពីលើម៉ូតូបន្ថែមបណ្ដាលឲ្យជនរងគ្រោះដួលចូលក្រោមរថយន្ត។

ហេតុការណ៍នេះបានកើតឡើងកាលពីវេលាម៉ោង៥ នឹង ១០នាទីទៀបភ្លឺ ថ្ងៃទី០៥ ខែមករា ឆ្នាំ២០២៦ ស្ថិតតាមបណ្ដោយមហាវិថីព្រះមុនីវង្ស (មុខស្ថានទូតបារាំង) សង្កាត់ស្រះចក ខណ្ឌដូនពេញ រាជធានីភ្នំពេញ។

តាមការបញ្ជាក់ពីពលរដ្ឋនៅក្បែរកន្លែងកើតហេតុបានអោយដឹងថា មុនពេលគ្រោះថ្នាក់នេះកើតឡើង គេបានឃើញ បុរសម្នាក់ជិះម៉ូតូ មួយគ្រឿង ម៉ាក HONDA Dream ពាក់ស្លាកលេខ ភ្នំពេញ 1Y-5498 ធ្វើដំណើរតាមវង្វង់មូលគួចកាណុង គោលដៅឡើងមកតាមមហាវិថីព្រះមុនីវង្ស លុះពេលមកដល់ចំណុចកើតហេតុ ក៏ស្រាប់តែមានរថយន្ដដឹកអ្នកដំណើរធន់ធំ មិនចាំស្លាកលេខ បានបើកបុកពីក្រោយយ៉ាងពេញទំហឹងហើយថែមទាំងកិនទៀត បណ្តាលអោយស្លាប់យ៉ាងអាណោចអាធ័ម។ ភ្លាមៗនោះរថយន្ដបានបើកគេចចេញពីកន្លែងកើតហេតុបាត់ស្រមោល។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយកម៉ូតូទៅរក្សាទុកជាបណ្ដោះអាសន្ន និង ធ្វើការស្រាវជ្រាវរករថយន្តបង្កធ្វើការដោះស្រាយតាមផ្លូវច្បាប់។ ចំណែកឯសពជនរងគ្រោះសមត្ថកិច្ចធ្វើលិខិតប្រគល់ឲ្យសាច់ញាតិយកទៅធ្វើបុណ្យតាមប្រពៃណី៕ អត្ថបទ ៖ រដ្ឋា