តៃវ៉ាន់៖ ចិនប្រើសមយុទ្ធ ដើម្បីបិទបាំងបញ្ហាសេដ្ឋកិច្ចក្នុង​ស្រុក

ទីភ្នាក់ងារសន្តិសុខកំពូលរបស់តៃវ៉ាន់ បាន​ប្រាប់​ថា សមយុទ្ធយោធាទ្រង់ទ្រាយធំរបស់ប្រទេសចិនជុំវិញកោះតៃវ៉ាន់កាលពីសប្តាហ៍មុន មានគោលបំណងប្រឆាំងនឹងការកើនឡើងនៃកិច្ចគាំទ្រអន្តរជាតិចំពោះកោះនេះ និងដើម្បីបង្វែរអារម្មណ៍ប្រជាជនក្នុងស្រុកពីបញ្ហាសេដ្ឋកិច្ចរបស់ទីក្រុងប៉េកាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងរបាយការណ៍ផ្ញើជូនសភាដែលទីភ្នាក់ងារ Reuters បានឃើញ​នា​ថ្ងៃ​ពុធ​ទី​៧មករា​នេះ ការិយាល័យសន្តិសុខជាតិតៃវ៉ាន់ (NSB) បានលើកឡើងថា សមយុទ្ធដែលមានឈ្មោះថា «បេសកកម្មយុត្តិធម៌២០២៥ (Justice Mission 2025)» បានបង្កប់នូវសារនយោបាយយ៉ាងច្បាស់លាស់ ដែលត្រូវបានរៀបចំឡើងដើម្បីរុញច្រានការគាំទ្រតៃវ៉ាន់ពីសំណាក់ដៃគូប្រជាធិបតេយ្យ ព្រមទាំងដើម្បីដុតបញ្ឆេះមនោសញ្ចេតនាជាតិនិយមនៅក្នុងស្រុកផងដែរ។

ក្នុងអំឡុងសមយុទ្ធនោះ ប្រទេសចិនបានបាញ់រ៉ុក្កែតរាប់សិបគ្រាប់សំដៅទៅរកតៃវ៉ាន់ និងបានដាក់ពង្រាយនាវាចម្បាំង និងយន្តហោះនៅក្បែរកោះនេះ ដែលបង្កការរំខានដល់ចរាចរណ៍ផ្លូវអាកាស និងបានទាក់ទាញការព្រួយបារម្ភពីសម្ព័ន្ធមិត្តក្នុងតំបន់ ក៏ដូចជារដ្ឋាភិបាលបស្ចិមប្រទេស។

ការិយាល័យ NSB បានបន្តថា សមយុទ្ធទាំងនេះគឺជាផ្នែកមួយនៃយុទ្ធនាការ «កូនកាត់» ដ៏ទូលំទូលាយ ដែលរួមបញ្ចូលគ្នានូវសម្ពាធយោធា ការវាយប្រហារតាមប្រព័ន្ធអ៊ីនធឺណិត និងការផ្សព្វផ្សាយព័ត៌មានមិនពិត ដើម្បីធ្វើឲ្យចុះខ្សោយនូវទំនុកចិត្តលើកងទ័ពតៃវ៉ាន់ លើប្រធានាធិបតី ឡៃ ឈីងតេ និងលើការគាំទ្រពីសហរដ្ឋអាមេរិក។

របាយការណ៍ដដែលបានឲ្យ​ដឹងទៀត​ថា ក្នុងអំឡុងពេលសមយុទ្ធ តៃវ៉ាន់បានកត់ត្រានូវការវាយប្រហារតាមប្រព័ន្ធអ៊ីនធឺណិតជាង ២លានដង ក្នុងរយៈពេលតែ ២ថ្ងៃប៉ុណ្ណោះ ខណៈដែលសារតាមអ៊ីនធឺណិតដែលរៀបចំទុកជាមុនជិត ១៩០០០​សារ ត្រូវបានចែកចាយពាសពេញបណ្តាញសង្គម។ របាយការណ៍បានកំណត់អត្តសញ្ញាណក្រុម Hacker ដែលមានទំនាក់ទំនងជាមួយកងទ័ពចិន (PLA) ដូចជាក្រុម APT24 និង BlackTech ថាជាក្រុមដែលសកម្មបំផុត។

ដោយឡែក ការិយាល័យកិច្ចការតៃវ៉ាន់របស់​ប្រទេស​ចិន បាននិយាយថា សមយុទ្ធនេះគឺមានបំណងការពារអធិបតេយ្យភាពជាតិ និងបូរណភាពទឹកដី។ ទីក្រុងប៉េកាំងទាមទារតៃវ៉ាន់ជាទឹកដីរបស់ខ្លួន ប៉ុន្តែតៃប៉ិបដិសេធ ដោយ​លើក​ឡើង​ថា មានតែប្រជាជននៅលើកោះនេះប៉ុណ្ណោះ ដែលអាចសម្រេចចិត្តលើអនាគតរបស់ពួកគេបាន៕

ប្រែសម្រួល៖ ឈាង