ត្រាំ៖ «គុយបា មិនអាចរស់បានទេ បើគ្មានប្រេងវ៉េណេស៊ុយអេឡា»

ប្រធានាធិបតីអាមេរិក ដូណាល់ ត្រាំ បានបញ្ជាក់យ៉ាងច្បាស់ថា គុយបា មិនអាចរស់បានទេ បើគ្មានប្រេងរបស់វ៉េណេស៊ុយអេឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយ Fox News កាលពីថ្ងៃព្រហស្បតិ៍ទី៨ខែមករាឆ្នាំ២០២៦ ពិធីករ Fox លោក Sean Hannity បានសួរទៅលោក ត្រាំ ថា តើគុយបាអាចរស់ដោយគ្មានប្រេងរបស់វ៉េណេស៊ុយអេឡាបានទេ?

រំពេចនោះ លោកត្រាំ ឆ្លើយថា៖ «ទេ! គុយបាពឹងផ្អែកទាំងស្រុងលើវ៉េណេស៊ុយអេឡា ទាំងប្រាក់និងប្រេង ហើយជាថ្នូរ ពួកគេផ្តល់ការការពារដល់វ៉េណេស៊ុយអេឡាវិញ។ នោះហើយជាកិច្ចព្រមព្រៀង»។

កិច្ចសម្ភាសនេះកើតឡើងបន្ទាប់ពី មន្ត្រីជាន់ខ្ពស់ទី​ក្រុង​វ៉ាស៊ីនតោន​បញ្ជាក់ថា សហរដ្ឋអាមេរិកចាំបាច់ត្រូវគ្រប់គ្រងការលក់ប្រេង និងចំណូលរបស់វ៉េណេស៊ុយអេឡាដោយមិនកំណត់ពេល ដើម្បីធ្វើឲ្យសេដ្ឋកិច្ចរបស់ប្រទេសនេះមានស្ថិរភាព និងធានាថាប្រទេសនេះធ្វើសកម្មភាពស្របតាមផលប្រយោជន៍របស់អាមេរិក។

តាមការឲ្យដឹងពីរដ្ឋមន្ត្រីក្រសួងថាមពលអាមេរិក Chris Wright, ទីក្រុងវ៉ាស៊ីនតោនត្រូវការអានុភាពលើចំណូលពីប្រេង ដើម្បីជំរុញការផ្លាស់ប្តូរនយោបាយ និងសេដ្ឋកិច្ច បន្ទាប់ពីកងកម្លាំងអាមេរិកបានផ្តួលរំលំប្រធានាធិបតី ម៉ាឌូរ៉ូ កាលពីចុងសប្តាហ៍មុន។

សូមជម្រាបថា ទំនាក់ទំនងរវាងគុយបានិងវ៉េណេស៊ុយអេឡា មិនមែនគ្រាន់តែជាមិត្តភាពនយោបាយធម្មតានោះទេ ប៉ុន្តែវាគឺជាការពឹងផ្អែកគ្នាទៅវិញទៅមក ជាពិសេសលើផ្នែកថាមពលនិងសេដ្ឋកិច្ច។

ក្រោមកិច្ចព្រមព្រៀងការ៉ាកាសតាំងពីសម័យលោក ហ៊ូហ្គោ ឆាវេស, វ៉េណេស៊ុយអេឡាបានផ្គត់ផ្គង់ប្រេងឲ្យគុយបា ចន្លោះពី ៥០ ០០០ ដល់ ១០០ ០០០ បារ៉ែលក្នុងមួយថ្ងៃ។

ក្នុងកិច្ចព្រមព្រៀងនោះ គុយបាមិនចាំបាច់បង់លុយសុទ្ធដូចតម្លៃទីផ្សារអន្តរជាតិឡើយ ប៉ុន្តែគិតគូរតាមរយៈការដោះដូរទំនិញ និងសេវាកម្មវិញ។

ជាការដោះដូរ គុយបាបានបញ្ជូនគ្រូពេទ្យជាង ៣០ ០០០នាក់ ឲ្យទៅជួយព្យាបាលប្រជាជនវ៉េណេស៊ុយអេឡានៅតាមតំបន់ក្រីក្រ ហើយគុយបាក៏ផ្ដល់ជំនួយផ្នែកចារកម្ម និងការការពារសុវត្ថិភាពផ្ទាល់ខ្លួនដល់មេដឹកនាំវ៉េណេស៊ុយអេឡា ផងដែរ៕

អត្ថបទ៖ សុខ សុវណ្ណ