ព័ត៌មានអន្ដរជាតិ

យោធាន័រវែសប្រាប់ពលរដ្ឋឲ្យប្រគល់សម្ភារឲ្យយោធា ពេលប្រទេសជួបសង្គ្រាម

បានផុស

៤ ខែ មុន

នៅ

ថ្ងៃអង្គារ ២០ មករា ២០២៦

ដោយ

ប្រជាជនន័រវែសរាប់ពាន់នាក់ត្រូវបានទទួលសំបុត្រពីយោធានៅថ្ងៃចន្ទ ដោយជូនដំណឹងដល់ពួកគេថា ផ្ទះ យានជំនិះ ទូក និងគ្រឿងចក្រផ្សេងទៀតអាចនឹងត្រូវទាមទារយកមកប្រើប្រាស់បន្ទាន់ ករណីបើប្រទេសមានសង្គ្រាម។ នេះបើតាម AFP ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាន័រវែស បាននិយាយនៅក្នុងសេចក្តីថ្លែងការណ៍មួយថា៖«ការស្នើសុំនេះ មានគោលបំណងធានាថា នៅក្នុងស្ថានភាពសង្រ្គាម កងកម្លាំងប្រដាប់អាវុធមានលទ្ធភាពទទួលបានធនធានគ្រប់គ្រាន់ សម្រាប់ការពារប្រទេស»។

បើតាមការព្យាករណ៍ តម្រូវការចាំបាច់ត្រៀមរៀបចំប្រហែល ១៣ ៥០០គ្រឿង នឹងត្រូវបានចេញសម្រាប់ឆ្នាំ២០២៦។

តែយ៉ាងណា សេចក្តីថ្លែងការណ៍មួយបានលើកឡើងថា សំបុត្រនោះមិនទាន់ជះឥទ្ធិពលជាក់ស្តែងនៅឡើយទេ វាគ្រាន់តែអនុញ្ញាតឱ្យម្ចាស់ទ្រព្យសម្បត្តិ បានដឹងថា យោធាអាចកាន់កាប់សម្ភារៈរបស់ពួកគេក្នុងករណីមានជម្លោះប៉ុណ្ណោះ។

សំណើនេះមានសុពលភាពរយៈពេលមួយឆ្នាំ ហើយប្រហែលពីរភាគបី នៃសំបុត្រដែលបានផ្ញើក្នុងឆ្នាំ២០២៦ គឺបានបន្តពីឆ្នាំមុនប៉ុណ្ណោះ។

ចំណែកប្រធានអង្គការយោធា លោក Anders Jernberg បានថ្លែងថា៖ «សារៈសំខាន់នៃការត្រៀមខ្លួនសម្រាប់វិបត្តិ និងសង្រ្គាមបានកើនឡើងយ៉ាងខ្លាំងរយៈពេលប៉ុន្មានឆ្នាំចុងក្រោយនេះ» ។

លោកបានបន្តថា៖ «ន័រវែសកំពុងស្ថិតក្នុងស្ថានភាពប្រុងជើងការ ផ្នែកសន្តិសុខកម្រិតខ្ពស់បំផុត មិនធ្លាប់មានចាប់តាំងពីសង្គ្រាមលោកលើកទី២ មកម្ល៉េះ។ ពិសេសសង្គមរបស់យើង ត្រូវតែត្រៀមខ្លួនសម្រាប់វិបត្តិផ្នែកសន្តិសុខ ហើយហេតុការណ៍ដែលអាក្រក់បំផុតគឺសង្រ្គាម»។ យើងកំពុងធ្វើការកសាងកម្លាំងយោធា និងការត្រៀមលក្ខណៈស៊ីវិលដ៏សំខាន់»។

គួរឱ្យដឹងផងដែរថា ប្រទេសន័រវែសដែលជាសមាជិកស្ថាបនិកអង្គការណាតូ បានបង្កើនការការពាររបស់ខ្លួនក្នុងប៉ុន្មានឆ្នាំចុងក្រោយនេះ៕

ប្រែសម្រួល៖ ណឺ មិនា