លោក Roy Keane បង្ហាញហេតុផលធំ១ លោក Carrick មិនសមធ្វើគ្រូ Man United អចិន្ត្រៃយ៍

អតីតខ្សែបម្រើជើងចាស់របស់ Manchester United លោក Roy Keane មិនបានចាត់ទុកគ្រូបង្វឹកបណ្តោះអាសន្នលោក Michael Carrick ជាអ្នកសក្តិសម ដើម្បីដឹកនាំក្រុមបិសាចក្រហមជាអចិន្ត្រៃយ៍នាពេលអនាគតនោះទេ ទោះអតីតខ្សែបម្រើសញ្ជាតិ អង់គ្លេស រូបនេះ កំពុងដឹកនាំក្រុមបានល្អក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគាំទ្រក្រុមបិសាចក្រហមជាច្រើនកំពុងពេញចិត្ត​ថ្លើមជាមួយសមត្ថភាពដឹកនាំរបស់លោក Carrick បន្ទាប់ពីសប្តាហ៍មុនលោកបានដឹកនាំ Man United ឈ្នះក្រុមគូប្រជែងរួមទីក្រុង Manchester City ២-០ និងកាលពីថ្ងៃ អាទិត្យ ទី ២៥ ខែ មករា បានបន្តយកឈ្នះក្រុមកំពូលតារាង Arsenal ក្នុងលទ្ធផល ៣ ទល់នឹង ២។

ជុំវិញជ័យជម្នះ ២ ប្រកួតផ្ទួនៗកន្លងមកនេះ បានធ្វើឱ្យអ្នកគាំទ្រចុចឈ្មោះលោក Carrick ជាបេក្ខភាពដ៏សក្តិសម ដើម្បីដឹកនាំ Man United ជាអចិន្ត្រៃយ៍នាពេលអនាគត និងស្រោចស្រង់ក្រុមបិសាចក្រហមឱ្យខ្លាំងដូចពី​អតីតកាលវិញ។ ទោះបីជាយ៉ាងណា លោក Keane មិនយល់ដូច្នេះទេ ដោយលោកបានចេញមុខនិយាយជំទាស់ ថា លោក Carrick នៅមានសមត្ថភាពក្មេងខ្ចី ហើយតាមទស្សនៈរបស់លោក គឺចង់ឱ្យ Man United នាំយកគ្រូបង្វឹក ដែលមានបទពិសោធក្រាស់ក្រែលជាងនេះជំនួសវិញ។

ថ្លែងនៅក្នុងកម្មវិធីរបស់ Sky Sports លោក Keane បានមានប្រសាសន៍ ថា៖ «លទ្ធផលដ៏ធំ ២ ប្រកួតនេះ។ ខ្ញុំគិតថា ប្រសិនបើ Man United ឈ្នះគ្រប់ប្រកូតចាប់ពីឥឡូវនេះ រហូតដល់បញ្ចប់រដូវកាលក៏ដោយ ក៏ខ្ញុំនឹងនៅតែមិនផ្តល់ការងារឱ្យគាត់ដែរ។ ខ្ញុំគ្រាន់តែគិត ថា ពួកគេត្រូវការអ្នកចាត់ការ ដែលមានបទពិសោធជាងនេះ»៕

គួរឱ្យដឹង ថា លោក Carrick ធ្លាប់ទទួលការងារជាគ្រូបណ្តោះអាសន្នរបស់ Man United ២ លើកហើយ ដោយគិតទាំងលើកនេះ។ លោកតែងតែមានកំណត់ត្រាល្អៗ ដោយការដឹកនាំកន្លងៗមក លោកបានជួយឱ្យ Man United ឈ្នះក្រុមធំៗមួយចំនួនដូចជា ឈ Arsenal ៣-២ ឈ្នះ Man City ២-០ ឈ្នះ Villarreal ២-០ និងស្មើ Chelsea ១-១៕

ប្រែសម្រួល៖ សេម កុសល
ប្រភព៖ Metro