នគរបាលឃាត់ខ្លួនជនសង្ស័យបីនាក់ ផឹកស៊ីបង្កហិង្សានៅក្រុងប៉ោយប៉ែត

ប៉ោយប៉ែត ៖ ជម្លោះក្នុងវង់ផឹកស៊ីបង្កការភ្ញាក់ផ្អើលដល់ពលរដ្ឋដទៃដោយសារតែមានអំពើហិង្សាប្រើកាំបិតនិងផ្ទុះអាវុធ បណ្ដាលឱ្យរងរបួសម្នាក់និងសមត្ថកិច្ចឃាត់ខ្លួនបីនាក់កាលពីរសៀលថ្ងៃទី ២៧ ខែមករា ឆ្នាំ២០២៥ ស្ថិតនៅក្នុងសង្កាត់ភាសាកណ្ដាលក្រុងប៉ោយប៉ែត ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីប្រជាពលរដ្ឋ នៃកន្លែងកើតហេតុបានឱ្យដឹងថា ឮស្នូលផ្ទុះអាវុធ ហើយក៏មានជនបីនាក់បានបើករថយន្តស៊េរីទំនើបបើករត់គេចខ្លួន ទើបដឹងថាមានអ្នករងរបួសម្នាក់នៅក្នុងផ្ទះ ស្ថិតនៅចំណុចកើតហេតុនៃខាងមុខរោងចក្រឌីស ក្នុងសង្កាត់ផ្សារកណ្ដាល ក្រុងប៉ោយប៉ែត។

តាមការពិនិត្យជាក់ស្ដែងនៃទីតាំងកើតហេតុ គឺមានឈាមនិងស្រោមដាវរួមនឹងសំបកគ្រាប់កាំភ្លើងមួយគ្រាប់ និងអ្នករងរបួសម្នាក់ជាបុរសខ្មែរ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

ករណីផ្ទុះអាវុធបង្កឱ្យរងរបួសនេះ ដើមឡើយប្រជាពលរដ្ឋដាក់ការសង្ស័យថា ជាករណីជនជាតិចិនប្រើហិង្សានិងបង្កការបាញ់ឱ្យរងរបួសលើជនជាតិចិនគ្នាឯង។

ចំពោះជនសង្ស័យ បន្ទាប់ពីបើករថយន្តគេចខ្លួនត្រូវបានសមត្ថកិច្ចនគរបាលក្រុងប៉ោយប៉ែតប្រមាញ់ចាប់បានភ្លាមៗនៅតាមផ្លូវក្នុងសង្កាត់ផ្សារកណ្តាល។

តាមសមត្ថកិច្ចនគរបាលក្រុងប៉ោយប៉ែតបានឱ្យដឹងថា ករណីផ្ទុះអាវុធនិងហិង្សាបណ្ដាលឱ្យរបួសនេះ គឺជាករណីជម្លោះក្នុងវង់ផឹកស៊ី រវាងជនរងគ្រោះនិងជនបង្កជាពលរដ្ឋខ្មែរ ដែលក្នុងនោះមានជនរងគ្រោះម្នាក់ត្រូវបានបញ្ជូនទៅមន្ទីរពេទ្យនិងជនសង្ស័យបីនាក់ ត្រូវបានសមត្ថភាពឃាត់ខ្លួនជាមួយនិងរថយន្តម៉ាករ៉ែងរ៉ូវើ ពាក់ស្លាក់លេខកម្ពុជាKONGBOSS នាំមកអធិការនគរបាលក្រុងប៉ោយប៉ែត និងកំពុងចាត់ការតាមនីតិវិធីច្បាប់៕

ដោយ ៖ អ ពៅ